Mukanda Utangu wa A-Korindu 5:1-13
5 Atu eswe kanachambulula ngwo, utanji* uli hakachi kenu, utanji ngwe uze keshi kuulinga chipwe hakachi ka akwa-mavungu. Mumu kanambe ngwo, kuli umwe hakachi kenu yoze watwama* ni pwo lia tato.
2 Shina yenu nunawahilila nyi? Te kunwatambile kunenganyana ni kuchiza lunga yoze walinga shili yino mukachi kenu nyi?
3 Alioze chipwe ngwe nguli kusuku ni yenu mu mujimba, nihindu nguli hamwe ni yenu mu manyonga.* Chikwo nawa, hingunapatwila kulu lunga yoze walingile yuma yacho ngwe nguli hamwe ni yenu.
4 Muze munulikungulula mu jina lia Mwene wetu Yesu, nyingikenu ngwenu hamwe ni yenu nguli mu manyonga* ni tachi ja Mwene wetu Yesu.
5 Kunjikenu lunga wacho kuli Satana hanga ndako jipi jize anehene mu chikungulwila jihone kulitanda, ni kufunga yitanga yipema ya mu chikungulwila.
6 Kulisamba chenu kuchawahile. Shina kunwanyingikine ngwenu futunwiso yikepe muyihasa kufutunwisa mwaha weswe nyi?
7 Chizenu futunwiso yikulu hanga nupwe mwaha waha, uze kuushi futunwiso ngwe chize nwapwa. Mumu kwamba pundu, Kristu mwana-panga wetu wa Chizomboka hanamulambula kulu.
8 Kashika tufungenu chiwanyino hi ni futunwiso yikulu ko, hanji ni futunwiso ya uhuka ni ya ungulungulu, alioze ni mbolo yize kuyishi futunwiso, yipema ni ya umwenemwene.
9 Ha mukanda wami uze nanusonekenene nanulwezele ngwami, kanda nulikata* ni waze akulinga utanji,*
10 chambile ngwami, kunwatambile kulikata ni atu eswe a hano hashi waze akulinga utanji,* hanji akwa-kuzo, hanji eji, hanji akwa-kukombelela mahamba. Mumu nyi chenacho, kachi chanutamba kukatuka hano hashi.
11 Alioze, haliapwila ngunasoneka kuli yenu ngwami, kanda nulikata* ni umwe yoze anavuluka ngwo ndumbu nyi mapwa chitanji,* hanji mukwa-kwivwa kuzo, hanji mukwa-kukombelela mahamba, hanji mukwa-kutukana,* hanji mukwa-kuzengewa, hanji mwiji. Mutu ngwe yono, chipwe kulia, kanda nulia hamwe nenyi.
12 Mumu hi nichami ko kupatwila waze ali haze lia chikungulwila, yenu nwatamba kupatwila waze ali mukachi ka chikungulwila,
13 alioze Zambi makapatwila akwa-haze. “Chizenu mutu mupi mukachi kenu.”
Footnotes
^ Chize Alisonekene, “yoze wakupomba.”
^ Chize Alisonekene, “spiritu.”
^ Chize Alisonekene, “spiritu.”
^ Hanji “nuliendela.”
^ Hanji “nuliendela.”
^ Hanji “mutu yoze wakulemeka ni maliji.”
