Mukanda Utangu wa A-Korindu 6:1-20
6 Nyi umwe hakachi kenu kali ni mulonga ni mukwo, mumu liaka nwakuya ni kuusopela kuli atu waze keshi kukaula majila a Zambi? Chikwo nawa, mumu liaka kunushi kuya kuli mandumbu asandu?
2 Nyi kunwanyingikine ngwenu, asandu kumakapatwila akwa-hashi? Mba nyi yenu kumunukapatwila akwa-hashi, shina kunushi kuhasa kupatwila yikuma yikehe-yikehe nyi?
3 Shina kunwanyingikine ngwenu, kumutukapatwila angelo? Nyi chenacho, mumu liaka kutwatambile kupatwila yikuma ya mwakono?
4 Mba nyi nuli ni yikuma ya mwakono hanga nuyipatwile, mumu liaka nwakusakula ngwe ngaji atu waze mandumbu keshi kufuliela?
5 Ngunahanjika chino ngunukolese sonyi. Kuma, hakachi kenu kuheshi mukwa-mana niumwe yoze mahasa kupatwila mandumbu jenyi nyi?
6 Alioze ndumbu matwala ndumbwenyi mu chota, kwe kumeso ja waze keshi kufuliela!
7 Pundu, hinwalilelesa yenwene ha kulitwala umwe ni mukwo kuli ngaji. Mumu liaka kunwatayijile muze mandumbu jenu manulinga chimwe chuma chipi? Shina kuchichi kulita kwecha hanga o azuke yuma yenu?
8 Alioze, yenu nwakulinga yuma ya uhenge ni kalimbalimba kuli mandumbu jenu.
9 Nyi hanji kunwanyingikine ngwenu, yihenge kechi kahinga Wanangana wa Zambi? Kanda nulionga. Waze akulinga utanji,* akwa-kukombelela mahamba, mapangala, akwa-kulinga yuma ya luchisa, akwa-utumwa,*
10 eji, akwa-kuzo, akwa-kuzengewa, akwa-kutukana* ni akwa-kuhianyisa ndando, kechi kahinga Wanangana wa Zambi.
11 Ni amwe a kuli yenu che apwile. Alioze hananusanyisa; hananupwisa asandu; hananupwisa akwa-ululi mu jina lia Mwene Yesu Kristu ni spiritu ya Zambi yetu.
12 Yuma yeswe yinalite ni shimbi hali yami kulinga, alioze hi yeswe ko yakufumbuka. Yuma yeswe yinalite ni shimbi hali yami kulinga, alioze chichi kuliecha akanguzeyese* ku chuma nichimwe.
13 Yakulia yili mumu lia jimo, ni jimo lili mumu lia yakulia, alioze Zambi makahwisa yeswe yiali. Mujimba hi wakulinga nawo utanji* ko, alioze mulimo wa Mwene, ni Mwene mahana yize mujimba unafupiwa.
14 Zambi hanahindwisa Mwene, ni yetu nawa kumakatuhindwisa ku kufwa kupalikila mu ndundo jenyi.
15 Shina kunwanyingikine ngwenu, mijimba yenu yili yihanda ya mujimba wa Kristu nyi? Kutala natamba kuchiza yihanda ya mujimba wa Kristu ni kuyipwisa yihanda ya chikoi nyi? Ka, hi chocho ko!
16 Kuma kunwanyingikine ngwenu, yoze malinunga ni chikoi mapwa mujimba umuwika nenyi nyi? Mumu iye hanambe ngwenyi, “eswe aali makapwa musunya umuwika.”
17 Alioze yoze malinunga ni Mwene, kanalinungu nenyi mu spiritu yimuwika.
18 Chinenu utanji!* Mumu shili yeswe yize mutu malinga, yili haze lia mujimba wenyi, alioze yoze malinga utanji mavulumuna mujimba wenyi mwene.
19 Shina kunwanyingikine ngwenu, mujimba wenu uli tembele ya spiritu yisandu yize yatwama muli yenu, yize anuhele Zambi nyi? Chikwo nawa, hi nuli a yenwene ko,
20 mumu hananulande ni ndando. Kashika, chichimiekenu Zambi mu mujimba wenu.
Footnotes
^ Hanji “malunga waze akulisumbakenya ni malunga akwo.” Chize Alisonekene, “malunga waze akulipomba ni malunga akwo.”
^ Hanji “akwa-kulemeka ni maliji.”
^ Hanji “kupwa mushi lia chiyulo.”
