Mukanda Utangu wa Petulu 1:1-25
1 Yami Petulu, postolo wa Yesu Kristu, ngunasonekena yenu ngeji hano hashi nunamwangashana mu chifuchi cha Ponto, Ngalashia, Kapatoshia, Azia ni Mbitiniya, waze atongwele
2 kulita ni chinyingi cha Zambi Tata, ni kunupwisa asandu kupalikila mu spiritu, hanga nupwe akwa-kwononoka a kusapwila manyinga ja Yesu Kristu:
Chawana cha keke ya Zambi ni sambukila yilumbame kuli yenu.
3 Zambi, Tato ya Mwene wetu Yesu Kristu afumane, mumu kulita ni keke yenyi yalumbama, hanatwehe kusemuka chaha, hanga tupwe ni kutalatala cha mwono kupalikila mu uhindukilo wa Yesu Kristu hakachi ka afu,
4 hanga tupwe ni chihinga chize kuchishi kupola, chishi chipeka, chikwo nawa, chishi kujimuka. Kananutulikilacho mu malilu,
5 yenu waze anafungu ku ndundo ja Zambi kupalikila mu ufulielo, hanga nukamone ulamwino uze kwasala hakehe ausolole ku matangwa akusula.
6 Mumu lia chino, nwakuwahilila chinji, chipwe ngwe haliapwila munuhasa kwivwa chinyengo ha shimbu likehe mumu lia yeseko yeka ni yeka,
7 hanga ufulielo wenu uze aneseka, uze uli ulemu chinji kuhiana oru yize yakutoka chipwe ngwe hayeseka ni kahia, unukwase kutambula uhaliso, uhenya ni ulemu ha tangwa lize Mwene Yesu Kristu makasoloka.
8 Chipwe ngwe kanda nuchimumona kama, nihindu nwakumuzanga. Chipwe ngwe kunushi kumumona haliapwila, nihindu nwakufuliela muli iye, nwakuwahilila chinji ni uwahililo wa uhenya uze keshi kuhasa kuulumbununa,
9 muze nunakundama ku fweto ya ufulielo wenu, we ulamwino wenu.
10 Hakutwala ku ulamwino uno, aprofeta waze aprofetezele hakutwala ku chawana cha keke ya Zambi chize anululiekelele, kahulile ni kuhengwola kanawa hakutwala ku ulamwino uno.
11 Zambi yalianga kwalweza kupalikila mu spiritu yisandu hakutwala ku lamba lize Kristu te mamona ni uhenya uze te mapwa nawo, ayo kapwile ni kufupa hanga anyingike tangwa ni mwaka uze te yuma yacho muyilingiwa kuli Kristu.
12 Zambi yaasolwela ngwenyi yuma yize apwile ni kuprofeteza hi ya ayo ene ko, alioze ya yenu. Yuma yize anwambulwila, ye ahanjikile waze anwambulwilile sango jipema ni ukwaso wa spiritu yisandu yize atumine kukatuka mwilu. Yuma yino ye angelo akuzanga chinji kunyingika.
13 Kashika, luliekenu manyonga jenu nulinge milimo yikolo, fungenu kanawa manyonga jenu, jikijilenu ha chawana cha keke chize makanunehena ha kusoloka cha Yesu Kristu.
14 Amu nuli ana waze akwononoka, echenu usolo uze nwapwile nawo kunyima muze te kanda nuchinyingika Zambi,
15 alioze ngwe chizechene apwa Musandu yoze wanusanyikine, pwenu asandu mu kwenda chenu cheswe,
16 mumu chinasonewa ngwo: “Pwenu asandu, mumu Yami nguli musandu.”
17 Nyi nwakusanyika ngwenu Tata, yoze wakusopesa chakuhona katonde kulita ni yitanga ya mutu ni mutu, endenu ni woma ha mashimbu wano nuli ngeji hano hashi.
18 Mumu nunanyingika ngwenu kakanutuswile ni yuma yize ya kupola, ni prata hanji oru ku yitanga yenu yamokomoko, yize nwahingile kuli tulamba twenu.
19 Alioze kanutuswile ni manyinga alemu, ngwe manyinga a mwana-panga yoze keshi kapalia, keshi chipeka, a Kristu.
20 Kwamba pundu, iye kaliangile kumunyingika shimbu te kanda achitanga hashi, alioze yamusolola ku songo lia miaka mumu lia yenu.
21 Kupalikila muli iye nwakufuliela muli Zambi, yoze wamuhindwishile hakachi ka afu ni kumwaha uhenya, hanga ufulielo wenu ni kutalatala chenu yipwe muli Zambi.
22 Haliapwila, amu hinwalipemesa mumu lia kwononoka chenu ha umwenemwene ni kupwa ni zango lia undumbu lize kulishi ulembekese, lizangenu umwe ni mukwo ni mbunge yeswe.
23 Mumu hananwehe kusemuka chaha, hi ku mbuto jize ja kupola ko, alioze ku mbuto jize kujishi kupola, kupalikila mu liji lia Zambi wa mwono yoze wakununga ku miaka yeswe.
24 Mumu “atu eswe kali ngwe mwambu, uhenya wo weswe uli ngwe chitemo cha mu yambu; mwambu wa kuuma, chitemo chakuholoka,
25 alioze, liji lia Yehova* liakununga ku miaka ya mutolo.” “Liji” liacho lili sango jipema jize anakanwambulwila.
Footnotes
^ Tala Apendice A5.
