Mukanda Utangu wa Petulu 5:1-14
5 Kashika, yami mukulwana ni mukwenu wa mu chikungulwila, chela cha lamba lia Kristu, mukwa-kunjila mu uhenya uze makasolola, ngunechi kuli makulwana mukachi kenu ngwami:
2 Fungenu mapanga* ja Zambi waze ali mu moko jenu,* ha kukalakala ngwe tulayi, hi ha kunushinjila ko, alioze chilingenu ni mbunge yeswe kumeso ja Zambi; kanda nuchilinga ni usolo wa kuzuka yimwe, alioze ni chiseke cheswe,
3 kanda nulipwisa miata ja atu waze ali chihinga cha Zambi, alioze pwenu yilweza kuli mapanga.
4 Muze kafunga munene makasoloka, mba munukatambula chipangula cha uhenya chize kuchishi kupiha.
5 Chizechene nawa, yenu akweze, zeyelenu kuli makulwana. Alioze yenu eswe lijichikenu muya wa kulikehesa, mumu Zambi kakulimika ni akwa-kulinangamisa, alioze kakuhana chawana cha keke kuli akwa-kulikehesa.
6 Kashika, likehesenu kushi lia kwoko lia ndundo lia Zambi, hanga akanunangamise ha shimbu lialita.
7 Mbilenu yipikalo* yenu yeswe kuli iye, mumu iye kakunufunga.
8 Kanyamenu, laulenu! Mukwa-kole wenu, Ndiapu, kananufupu ngwe ndumba yoze unahuza ni kufupa yoze malia.
9 Alioze limikenu nenyi, jikizenu mu ufulielo, nyingikenu ngwenu mandumbu jenu waze ali hashi heswe no kanapalika mu lamba lino liene.
10 Alioze, muze hinwamona lamba ha shimbu likehe, Zambi mwene wa chawana cheswe cha keke, yoze wanusanyikine mu uhenya wenyi wa mutolo kupalikila muli Kristu, iye mwene makahwisa kunulongesa, makanujamisa, makanwaha tachi ni kunukwasa hanga nukamane nguu.
11 Ndundo jipwe kuli iye ndo ku miaka yeswe. Amene.
12 Nanusonekena maliji akehe ni ukwaso wa Silivanu, ndumbu yoze nakumona ngwami kashishika hanga ngunutakamise ni kushindakenya kuli yenu ngwami, chawana cha keke ya Zambi chili chamwenemwene. Nungenu ni kumanamo nguu.
13 Yoze uli mu Babilonia, yoze atongwele ngwe yenu, kananumeneka, ni mwanami Marku neye kananumeneka.
14 Limenekenu umwe ni mukwo ni mbeju ya zango.
Yenu eswe nwakulivwashana ni Kristu, pwenu ni sambukila.
Footnotes
^ Hanji “chizavu cha mapanga.”
^ Hanji “waze anuhele hanga nwafunge.”
^ Hanji “lamba lienu lieswe.”
