Mukanda Utangu Kuli Timoteu 1:1-20
1 Yami Paulu, postolo wa Kristu Yesu kulita ni shimbi ya Zambi, Chilamwina chetu, ni shimbi ya Kristu Yesu, kutalatala chetu,
2 ngunakusonekena yena Timoteu,* mwanami wamwenemwene mu ufulielo:
Chawana cha keke, keke ni sambukila ya kuli Zambi, Tata, ni ya Mwene wetu Kristu Yesu yikapwe hamwe ni yena.
3 Ngwe chizechene nakukolwezele hanga usale mu Efwesu muze te ngunambe kuya ku Masendoniya, che ngunakulweze nawa haliapwila, hanga ukanjise amwe atu achine kulongesa malongeso eka,
4 chipwe kupanjika yishima ya mahuza ni sango hakutwala ku yisemuko. Yuma yacho kuyishi ni mashina ni masongo, alioze yakutwala atu ambe yuma yize keshi ni shindakenyo, yize kuyishi kulita ni yitanga yize Zambi akutulongesa hanga tukolese ufulielo wetu.
5 Kwamba pundu, chikuma chilemu cha longeso lino chili zango lize liakukatuka mu mbunge yipema ni ku mbunge yitoma ni ku ufulielo uze kuushi ulembekese.
6 Amwe hanalitunu yuma yino, hanapu ni chako cha kuhanjika pande ja mokomoko.
7 Ayo kanazange kupwa alongeshi a shimbi, alioze kanyingikine chipwe ulumbunwiso wa yuma yize akwamba, hanji wa yuma yize akushindakenya chinji.
8 Tunanyingika ngwetu Shimbi yili yipema nyi mutu mayikaula kanawa,
9 ha kunyingika ngwo shimbi kakajisele mumu lia akwa-ululi, alioze mumu lia waze keshi kwononokena shimbi, yihulia, atu api, yivulumunyi, waze keshi kushishika, waze keshi kuvumbika Zambi, waze akushiha yisemi,* yingalwe,
10 yitanji,* akwa-utumwa,* akwa-kukwata atu ni kwasweka, akwa-mahuza, akwa-kulishinga ni shingo lia mahuza, ni yuma yeswe yize yakulimika ni malongeso apema,*
11 waze analite ni uhenya wa sango jipema ja Zambi ya uwahililo, jize anguhele.
12 Ngunasakwilila Kristu Yesu, Mwene wetu, yoze wanguhele ndundo, mumu kamwene ngwo nashishika kashika angutongwele hanga ngulinge mulimo,
13 chipwe ngwe kunyima napwile mukwa-kutukana, mukwa-kuhungumiona, chikwo nawa te chishi kuvumbika atu. Nihindu, yangusolwela keke mumu napwile ni kulinga yuma chakuhona kunyingika, chikwo nawa te chishi ufulielo.
14 Alioze chawana cha keke cha Mwene wetu chalumbamine chinji hali yami hamwe ni ufulielo ni zango lize lili muli Kristu Yesu.
15 Maliji wano kali amwenemwene twatamba kwajikijila ni kwatayiza: Kristu Yesu kejile hano hashi hanga alamwine yivulumunyi. Hakachi ka yivulumunyi jacho, yami mwe mutangu.
16 Alioze, hanangusolwela keke hanga kupalikila muli yami chivulumunyi mutangu, Kristu Yesu asolole uhumikizo wenyi weswe, ha kungupwisa chilweza kuli waze mafuliela muli iye hanga apwe ni mwono wa mutolo.
17 Haliapwila Mwanangana wa miaka yeswe, yoze keshi kufwa, keshi kumoneka, mwe Zambi umuwika, ulemu ni uhenya yipwe kuli iye ndo ku miaka ya mutolo. Amene.
18 Mwanami Timoteu, ngunakwehe malongeso wano kulita ni uprofeto uze aprofetezele hakutwala kuli yena, hanga akukwase ununge ni kwasa jita yipema,
19 ni kufunga ufulielo ni mbunge yitoma, mbunge yitoma yize amwe alitunyine mba yatokesa ufulielo wo.
20 Hemeneu ni Alexandre kali hakachi ka atu jacho, hinaakunjika kuli Satana hanga fumbo lialongese alitwamine kushililika* Zambi.
Footnotes
^ Ulumbunwiso, “yoze wakuvumbika Zambi.”
^ Hanji “tata ni mama.”
^ Hanji “lunga yoze wakulimona ni lunga ni mukwo.”
^ Hanji “malongeso waze akukwasa mutu apwe kanawa.”
^ Hanji “kutuka.”
