Mukanda Utangu Kuli Timoteu 3:1-16
3 Maliji wano kali amwenemwene, twatamba kwajikijila ni kwatayiza: Nyi umwe lunga malikolweza hanga apwe mukulwana* wa mu chikungulwila, kanazange mulimo upema.
2 Mukulwana wa mu chikungulwila katamba kupwa mutu yoze keshi chitela cha kumusumina mulonga, lunga wa pwo umuwika, mukwa-yitanga yipema, mukwa-mana, mukwa-kululieka kanawa yuma, mukwa-kuzumbula ngeji, wajama hanga alongese.
3 Katambile kupwa-chizengi, chipwe mukwa-mbwanja,* alioze katamba kupwa chimbovu, hi mukwa-vunda ko. Katambile kuzanga mbongo.
4 Katamba kusongwela kanawa usoko wenyi. Ana jenyi katamba kumuzeyela ni vumbi lieswe.
5 (Mumu nyi mutu keshi kuhasa kusongwela kanawa usoko wenyi, kuchi mahasa kufunga chikungulwila cha Zambi?),
6 katambile kupwa mutu mwaha mu ufulielo, hanga achine kulizata ni kuholokela mu usopeso uze makasopesa nawo Ndiapu.
7 Chikwo nawa, katamba kupwa mutu yoze uli ni lufuma mupema kuli akwa-haze, hanga ahone kumulelesa ni kufwa mu muheto wa Ndiapu.
8 Chizechene nawa, tuvumbi katamba kupwa atu waze mahasa kujikijila, malunga a liji limuwika, katambile kunwa walwa unji, hi akwa-mahuza ko, hi akwa-kuzo* ko ya kuzuka yuma mu jila yize kuyalitele,
9 katamba kulalaminya ku chijimbikilo chisandu cha ufulielo ni mbunge yitoma.
10 Chikwo nawa, katamba kwahengwola chitangu hanga amone nyi kanatela kulinga mulimo wacho; mba akalakale ngwe tuvumbi, nyi keshi ni chitela cha kwasumina mulonga.
11 Chizechene nawa, mapwo no katamba kupwa atu a kujikijila, hi akwa-kuyenga-yenga ko akwo, akwa-yitanga yipema, ashishika mu yuma yeswe.
12 Kavumbi katamba kupwa lunga wa pwo umuwika, mukwa-kusongwela kanawa ana jenyi, ni usoko wenyi.
13 Mumu atu waze akulinga kanawa milimo yo, kakupwa ni lufuma mupema, chikwo nawa, mahasa kuhanjika ni hamu lieswe hakutwala ku ufulielo muli Kristu.
14 Chipwe ngwe ngunazange kwiza kuli yena ni kawashi, alioze ngunakusonekena yuma yino
15 hanga nyi mungulaluka, unyingike yitanga yize watamba kusolola mu usoko wa Zambi, che chikungulwila cha Zambi ya mwono, che kwamba, nguji ni fundamentu ya umwenemwene.
16 Kwamba pundu, chijimbikilo chisandu cha uwayilo wa Zambi chili chilemu chinji: ‘Iye kamusolwele mu musunya, yamupwisa mukwa-ululi mu spiritu, yasoloka kuli angelo, yamwambujola hakachi ka mavungu, yamufuliela kuli akwa-hashi, yamutambula mwilu ni uhenya.’
