Mukanda Utangu Kuli Timoteu 4:1-16
4 Alioze, spiritu ya Zambi hiyinambe kulu zwalala ngwo, kulutwe lia matangwa, amwe makapianguka ku ufulielo ha kupanjika malongeso a mahuza ni malongeso a andemoniu waze anasoloka ngwe kanakatuka kuli Zambi,
2 ni ku ulembekese wa atu waze akuhanjika mahuza, waze mbunge jo hijinakale mbe, ngwe ja kwocha* ni chikungo cha nge ni kahia.
3 Ayo kakukanjisa atu kulimbata, ni kwakanjisa ahone kulia yuma yize Zambi atangile, alioze Zambi katangile yuma yacho hanga atu waze ali ni ufulielo ni chinyingi cha umwenemwene ayilie ni kumusakwilila.
4 Mumu yuma yeswe yize Zambi atangile yili yipema, kuchalitele kulituna nichimwe nyi machitambula ni usakwililo,
5 mumu hanachipwisa chisandu ni liji lia Zambi ni yilemba.
6 Nyi muhana yiyulo yino kuli mandumbu, muopwa mukwa-mulimo mupema wa Kristu Yesu, yoze hakuta kanawa ni maliji a ufulielo ni malongeso apema waze wakukaula ni ushishiko weswe.
7 Litune yishima ya mahuza, yize yakuvulumuna yuma yisandu, ngwe yize akuta kuli tushinakaji a mapwo. Alioze, sako tachi hanga upwe ni chako cha kuwayila Zambi.
8 Mumu kufumba cha mujimba chakukwasa hakehe, alioze kuwayila Zambi chakukwasa mu yuma yeswe, chakutwaha kutalatala cha mwono haliapwila, ni wa kulutwe lia matangwa.
9 Maliji wano kali amwenemwene, twatamba kwajikijila ni kwatayiza.
10 Kashika twakukalakala chinji ni kusa tachi, mumu kutalatala chetu chili muli Zambi ya mwono, mwe Chilamwina cha atu a mutapu weswe, chipi-chipi waze ashishika.
11 Nunga ni kuhana shimbi jino, ni kujilongesa.
12 Kanda wecha niumwe akulelese mumu lia kupwa mukweze. Alioze, pwako chilweza kuli akwa-kushishika mu kuhanjika, mu yitanga, mu zango, mu ufulielo ni ha kulinanga.
13 Ndo muze mungwiza, nunga ni kulikolweza kutanga ha mbunga, kukolweza akwenu, ni kulongesa.
14 Kanda ulengulula chawana chize chili muli yena, chize akuhele kupalikila mu uprofeto muze chizavu cha makulwana a mu chikungulwila akusayikile moko.
15 Pukuna ha yuma yino, lihulikileho chinji, hanga kutatuka che ku ufulielo chisoloke zwalala kuli atu eswe.
16 Lifunge kanawa yena mwene ni kukanyama ha malongeso je. Nyongonona mu yuma yino, mumu ha kuchilinga, mukalilamwina yena mwene ni waze akukupanjika.
Footnotes
^ Hanji “ngwe chimbandu cha kahia.”
