Mukanda Utangu Kuli Timoteu 5:1-25
5 Kanda ukumika mukulwana ni maliji akalu. Alioze hanjika nenyi kanawa ngwe tatenu, akweze a malunga hanjika no ngwe mandumbu je,
2 makulwana a mapwo hanjika no ngwe anoko, akweze a mapwo hanjika no ngwe mandumbu je a mapwo, chilinge ni nyonga lialita.*
3 Vumbika tuliwa a mapwo waze ali lume tuliwa.*
4 Alioze nyi pwo tuliwa kali ni ana hanji ajikulu, wano chitangu alilongese kuwayila Zambi mu usoko wo, ni kuhana kuli yisemi jo ni akako yize anahono, mumu chino chili chipema kumeso ja Zambi.
5 Pwo tuliwa yoze uli lume tuliwa, keshi ni chuma nichimwe, kakujikijila muli Zambi, kakununga ni kuliumba ni kulemba ufuku ni mwalwa.
6 Alioze pwo tuliwa yoze unalihana mu kulinga usolo wa mujimba, hanafu, chipwe ngwe kali ni mwono.
7 Kashika, nunga ni kuhana shimbi jino, hanga apwe atu waze keshi ni chitela cha kwasumina mulonga.
8 Kwamba pundu, nyi mutu keshi kuhana kuli atu jenyi yize anahono, chipi-chipi kuli asoko jenyi, iye hanalikale ufulielo, kanapiha chikolo kuhiana yoze keshi kufuliela.
9 Katamba kusoneka mu mukanda pwo tuliwa, nyi kali kama ni miaka 60, yoze wapwile ni lunga umuwika,
10 yoze ananyingika ngwo kakwete yitanga yipema, walelele ana, mukwa-kuzumbula ngeji, wasanyishine molu ja asandu, wakwashile waze apwile mu kapinda, yoze nawa walihanyine hanga alinge milimo yeswe yipema.
11 Alioze kanda usoneka mu mukanda tuliwa a mapwo waze achili akweze, mumu nyi usolo wo wakulisumbakenya muulimika ni mulimo uze akulingila Kristu, ayo mazanga kuya malo.
12 Ayo kakulinehena ene usopeso mumu lia kwecha ufulielo uze apwile nawo ku uputukilo.*
13 Chikwo nawa, hejilila kutwama chakuhona kukalakala, ni kuyaya ku mazuwo ambala; keshi kulitwamina wika kulinga mulimo, alioze kakuyenga nawa akwo ni kulinjisa mu milonga yambala ni kuhanjika yuma yize kuyalitele.
14 Kashika, ngunazange hanga akweze tuliwa a mapwo aye malo, aseme ana, afunge akwa-zuwo lio hanga ahone kuhana kuli mukwa-kole unjililo wa kwamba yuma yipi.
15 Kwamba pundu, amwe hanapianguka ni kukaula Satana.
16 Nyi ndumbu wa pwo kali ni tuliwa mu usoko, aakwase hanga achine kuhana yilemu yacho mu chikungulwila. Mba chikungulwila chihase kukwasa mapwo waze ali lume tuliwa.
17 Makulwana a mu yikungulwila, waze akusongwela kanawa, kanatela kwawezela vumbi, kuhiana chikolo waze akukilikita chinji ha kuhanjika ni kulongesa.
18 Mumu chisoneko chinambe ngwo: “Kanda ukasa ngombe ku kanwa muze anazungula mbuto,” chikwo nawa ngwo: “Mukwa-mulimo katela fweto yenyi.”
19 Kanda utayiza mulonga uze analamikiza mukulwana wa mu chikungulwila, shina wika muze mukupwa yela aali hanji atatu.
20 Kumika kumeso ja mbunga atu waze akuvulumuna, hanga chipwe chilweza* kuli atu akwo.
21 Ngunakwehe shimbi kumeso ja Zambi, ni Kristu Yesu ni angelo akusakula ngwami, ononokena maliji wano chakuhona kunyongena atu yuma yipi chipwe kusolola katonde.
22 Kanda ulipupwisa kusayika* moko hali umwe mutu, chipwe kulinjisa mu shili ya atu akwo; nunga ni kulinanga.
23 Kanda unwa nawa meya,* alioze nwako ndambu ya vinyu mumu lia lufu we ni kuyiza-yiza che.
24 Shili ya atu amwe kakuyimona kuli atu eswe ni kwasopesa hazehene, alioze shili ya atu akwo yakusoloka muze hikwapalika mashimbu.
25 Chizechene nawa, yitanga yipema kakuyinyingika kuli atu eswe, chipwe ngwe kuyishi kusoloka zwalala, nihindu kuyishi kuhasa kuswama.
Footnotes
^ Hanji “ni kulinanga cheswe.”
^ Hanji “waze keshi mutu yoze maakwasa.”
^ Hanji “shingo lio litangu.”
^ Hanji “atu akwo evwe woma.”
^ Hanji “kumwaha chiteli.”
^ Hanji “kanda unwa wika meya.”
