Mukanda Utangu wa Yoano 2:1-29
2 Ana jami a zango, ngunanusonekena yuma yino hanga nuchine kulinga shili. Alioze nyi umwe malinga shili, tuli ni chikwashi* yoze uli hamwe ni Tata, Yesu Kristu, mukwa-ululi.
2 Iye kali chitapo chize chakufuka* shili yetu, hi ha shili yetu wika ko, alioze ni ha shili ya akwa-hashi eswe.
3 Mutusolola ngwetu tunamunyingika, nyi mutununga ni kwononokena shimbi jenyi.
4 Yoze mamba ngwenyi, “ngunamunyingika,” chipwe chocho mehuka shimbi jenyi, kali mukwa-mahuza, umwenemwene kuushi muli iye.
5 Alioze, mweswawo mononokena liji lia Zambi, pundu, zango lia Zambi hanalipwisa lingunu muli iye. Nyi twachilinga, mutusolola ngwetu tunalinungu nenyi.
6 Yoze mamba ngwenyi kanalinungu nenyi, neye katamba kununga ni kwenda ngwe chize iye endele.
7 Mandumbu a zango, shimbi ngunanusonekena hi yaha ko, alioze yikulu, yize nwatwama nayo chize ku uputukilo. Shimbi yino yikulu yili liji lize nwevwile.
8 Cheka nawa, ngunanusonekena shimbi yaha, chuma chamwenemwene, chinatale hali iye ni hali yenu, mumu milima yinayi ni kuhwa, pangu liamwenemwene linahenya.
9 Yoze mamba ngwenyi mu pangu ali, alioze kakuvwila ndumbwenyi kole, uchili mu milima.
10 Yoze wakuzanga ndumbwenyi, kananungu mu pangu, muli iye kumushi chitalingiso.
11 Alioze, yoze wakuvwila ndumbwenyi kole, kali mu milima, kanende mu milima, kanyingikine kuze anayi, mumu milima yinapupuchisa meso jenyi.
12 Ngunanusonekena, ana jami a zango, mumu shili yenu hanayikonekena mumu lia jina lienyi.
13 Ngunanusonekena, yenu a tata, mumu yoze watwamako chize ku uputukilo nunamunyingika. Ngunanusonekena, yenu akweze, mumu hinunakumbu mwe mupi. Ngunanusonekena, yenu ana jami a zango, mumu nunanyingika Tata.
14 Ngunanusonekena, yenu a tata, mumu yoze watwamako chize ku uputukilo nunamunyingika. Ngunanusonekena, yenu akweze, mumu nunajikiza, ni liji lia Zambi linanungu muli yenu, yenu hinunakumbu mwe mupi.
15 Kanda nuzanga hashi, chipwe yuma ya hashi, nyi mutu mazanga hashi, zango lia Tata kulishi muli iye;
16 mumu yuma yeswe yize yili hano hashi, usolo wa musunya, usolo wa meso ni kutembesa* cha yuma yize mutu ali nayo, yitanga yino yeswe kuyishi kukatuka kuli Tata, alioze yakukatuka hano hashi.
17 Chikwo nawa, hashi hanapalika, ni usolo waho newo, alioze yoze wakulinga upale wa Zambi, manunga ndo ku miaka ya mutolo.
18 Ana jami a zango, yino ye ola ya kasula, ngwe chize nwevwile kulu ngwo, mukwa-kulimika ni Kristu makeza, chipwe haliapwila hikweza akwa-kulimika ni Kristu anji. Kashika tunanyingika ngwetu yino ye ola ya kasula.
19 Ayo kakatukile mukachi ketu, alioze, te hi a kuli yetu ko, mumu nyi te a kuli yetu, kachi kanungine ni yetu. Alioze kakatukile muli yetu, hanga chisoloke ngwo, hi eswe ko kali a yetu.
20 Yenu eswe nuli ni chinyingi, kanuwayishile kuli mwe musandu.
21 Ngunanusonekena, kuchapwile ngwe kunwanyingikine umwenemwene, alioze nunaunyingika, mumu kukushi mahuza niamwe waze akukatuka ku umwenemwene.
22 Mukwa-mahuza iya, hi yoze ko wakulikala ngwenyi Yesu hi Kristu ko? Mwenawo wakulimika ni Kristu, yoze wakulikala Tata ni Mwana.
23 Mweswawo malikala Mwana, chipwe Tata keshi nenyi. Alioze yoze matayiza Mwana, chipwe Tata kali nenyi.
24 Alioze hakutwala kuli yenu, yize nwevwile chize ku uputukilo yatamba kununga muli yenu. Nyi yize nwevwile chize ku uputukilo muyinunga muli yenu, ni yenu munununga ni kulivwashana ni Mwana, ni kulivwashana nawa ni Tata.
25 Chizechene nawa, chino che chilakenyo chize iye mwene atulakenyene, mwono wa mutolo.
26 Ngunanusonekena yuma yino hakutwala kuli waze anafupu kunupiangula.
27 Alioze hakutwala kuli yenu, kuwayisa chize anuwayishile kuli iye, chinanungu muli yenu, kunwafupile niumwe anulongese; alioze kuwayisa chenyi, chize chili chamwenemwene, hi cha mahuza ko, chinanulongesa yuma yeswe. Ngwe chize hichinanulongesa, nungenu ni kulivwashana nenyi.
28 Kashika, ana jami a zango, nungenu ni kulivwashana nenyi, hanga muze mamusolola, yetu tuhase kuhanjika ni hamu, tuhone kusosoloka kuli iye mumu lia sonyi ha tangwa lia kusoloka chenyi.
29 Nyi nunanyingika ngwenu iye kali mukwa-ululi, nunanyingika nawa ngwenu mweswawo wakulinga ululi, hanasemuka kuli iye.
Footnotes
^ Hanji “mukwa-kutuhakwila, mukwa-kutuhanjikila, mukwa-kutukalila.”
^ Hanji “chitapo chize chakutukwasa kulivwashana ni Zambi.”
^ Hanji “kulizata cha mutu mumu lia yuma yize ali nayo.”
