Mukanda Wamuchiali wa A-Korindu 1:1-24
1 Yami Paulu, postolo wa Yesu Kristu ku upale wa Zambi, ni ndumbwetu Timoteu, ku chikungulwila cha Zambi chize chili ku Korindu, hamwe ni asandu eswe waze ali mu Akeya:
2 Chawana cha keke ni sambukila ya Zambi Tata ni ya Mwene Yesu Kristu, yikapwe hamwe ni yenu.
3 Zambi kanda Tato ya Mwene wetu Yesu Kristu, akafumane, Tata ya keke, kanda Zambi ya utakamiso,
4 yoze wakututakamisa* mu lamba lietu lieswe, hanga ni utakamiso uze twakutambula kuli Zambi, ni yetu tuhase kutakamisa akwetu mu lamba* lieswalio.
5 Mumu ngwe chizechene lamba lietu muli Kristu lili linji, chizechene nawa utakamiso uze twakutambula kupalikila muli Kristu, uli unji.
6 Haliapwila twakumona lamba* mumu ha utakamiso ni ulamwino wenu. Kakututakamisa hanga ni yenu nutakame, chino muchinukwasa kunyongonona muze munumona lamba, lize ni yetu twakumona.
7 Kutalatala chetu hali yenu chili chikolo, mumu tunanyingika ngwetu, chizechene nwakumona lamba ngwe yetu, chizechene nawa makanutakamisa ngwe yetu.
8 Mumu tunazange mandumbu nunyingike hakutwala ku lamba lietu lize liatuwanyine mu mbonge ya Azia. Chize twalemewene kuhiana tachi jetu, chocho yitunyonga ngwetu, kutuchi kumona mwono.
9 Kwamba pundu, twevwile ngwe twatambula upatwilo wa kufwa, chino chalingiwile hanga tujikijile hali Zambi yoze wakuhindwisa afu, hi hali yetu ene ko.
10 Iye hanatupulwila, chikwo nawa makatupulwila ku ponde yinene ya kufwa. Kashika tuli ni kutalatala muli iye ngwetu, manunga ni kutupulwila.
11 Yenu munuhasa nawa kutukwasa ha kutulembela kuli Zambi. Mumu nyi anji matulembela kuli Zambi, iye kumakanwivwa ni kutukwasa, ni anji nawa makasakwilila.
12 Tuli ni shimbi ya mbunge yipema, mumu chipwe ngwe twatwama hakachi ka atu a hano hashi, chipi-chipi hakachi ka yenu, nihindu twatwama mu usandu, ni umwenemwene uze wakwiza kuli Zambi. Chikwo nawa, kutuchi kutwama kulita ni mana a hano hashi, alioze kulita ni chawana cha keke ya Zambi. Kashika twakulisamba mumu lia yuma yino.
13 Tunanusonekena yuma yize yapwa yashi kutanga ni kunyingika, tunashimbwila ngwetu munununga ni kunyingika kanawa yuma yino.
14 Chizechene ngwe amwe a kuli yenu nunanyingika, ewa, amwe a kuli yenu hinunanyingika ngwenu yetu tuli chitela cha kulisamba chenu, ni yetu nawa mutukalisamba hali yenu ha tangwa lia Mwene Yesu.
15 Chocho ni nyonga lino, ami te ngunazange chitangu kuya ni kunumeneka hanga nupwe ni chikuma chamuchiali cha kuwahilila* nacho.
16 Mumu ngunanyongo kuya ni kunumeneka muze mungukaya ku Masendoniya, ni ha kuhiluka ku Masendoniya hanga nukangushinjikile yimwe ndambu mu wenyi wami wa kuya ku Yundeya.
17 Shina muze nanyongene kulinga chino, nachilingile ni lwelia nyi? Nyi hanji nakunyonga kulinga yuma kulita ni utu* mba mungwamba ngwami: “Ewa, ewa,” kulutwe ngwami: “Ka, ka”?
18 Alioze ngwe chizechene Zambi ashishika, yuma yize twakunulweza kuyishi kupwa “ewa” ni “ka” ha chisuho chimuwika.
19 Mumu Mwana wa Zambi, Kristu Yesu yoze yami, Silivanu, ni Timoteu twambujolwele hakachi kenu, kakambile ngwenyi “ewa” ni “ka” ha shimbu limuwika, alioze “ewa” yoze ambile kumakapwa “ewa” ku mashimbu eswe.
20 Mumu yilakenyo yeswe ya Zambi yapwa “ewa” kupalikila muli iye. Kupalikila muli iye nawa twakwamba ngwetu “Amene” kuli Zambi, chuma chize chakumwaha uhenya mumu hali yetu.
21 Alioze, yoze wakutwaha shindakenyo ngwo yetu ni yenu tuli ambala a Kristu ni yoze watuwayishile kali Zambi.
22 Iye nawa wasele chijikilo chenyi hali yetu, chijikilo chacho chili spiritu yisandu mu mbunge yetu, che chilakenyo cha yize muyikeza.
23 Ami chazangile kwiza ku Korindu haliapwila hanga nguchine kunuvwisa yinyengo yinji. Zambi kananyingika ngwenyi chino chili chamwenemwene.
24 Kuchapwile ngwe yetu tuli miata a ufulielo wenu, alioze tuli akwa-milimo-ni-akwenu mumu ha uwahililo wenu. Yenu kununamane nguu ha ufulielo wenu.
Footnotes
^ Hanji “kulembejeka.”
^ Hanji “luyinda.”
^ Hanji “luyinda.”
^ Kota nawa, “hanga nuyuke kamuchiali.”
^ Chize Alisonekene, “kulita ni musunya.”
