Mukanda Wamuchiali wa A-Korindu 10:1-18
10 Haliapwila, yami Paulu, yoze amwe a kuli yenu akwamba ngwo nakulikehesa muze nguli mukachi kenu, alioze nguli mukalu muze nguli kusuku, ngunaliumbu kuli yenu ha kushimbika ni upeme wa Kristu.
2 Ngunaliumbu ngwami, muze mungupwa hamwe ni yenu, kanda ngupwa mukalu ni kukwata yiyulo yikalu ngwe chize ngunanyongo kulinga kuli atu amwe waze akutumona ngwe twakwenda kulita ni musunya.
3 Mumu, chipwe ngwe twatwama kulita ni musunya, nihindu kutushi kwasa jita kulita ni chize twapwa ku musunya.
4 Mumu mata jetu a jita hi a musunya ko, alioze a tachi ja Zambi hanga tupuzule yipanga ya tachi ya mawe.
5 Twakupupa malinjekela ni yuma yeswe yakulizata nayo yize yakulinangamisa ni kulimika ni chinyingi cha Zambi. Twakutwala manyonga eswe ku ufunge hanga ononoke kuli Kristu.
6 Hitwalilulieka hanga muze mutumona ngwetu nwakwononoka kanawa, tupatwile waze keshi kwononoka.
7 Yenu nwakupatwila yuma kulita ni chize yakusoloka. Kashika, nyi umwe kali ni shindakenyo ngwenyi kali wambala wa Kristu, katamba kunyonga cheka nawa ha chikuma chino. Chizechene ngwe iye ali wambala wa Kristu, ni yetu nawa tuli ambala a Kristu.
8 Mwene hanatwehe chiyulo cha kukolesa ufulielo wenu, hi kuwonwona ko. Chipwe ngwe mungulisamba yimwe ndambu ha chiyulo chize twatambwile, nihindu chichi kwivwa sonyi.
9 Alioze, chazangile hanga nunyonge ngwenu, ngunanusonekena mikanda hanga ngunuvwise woma.
10 Mumu amwe kakwamba ngwo: “Mikanda yenyi yikwete ulemu ni tachi, alioze muze iye mwene ali hamwe ni yetu keshi hamu, ni kuhanjika chenyi chili chamokomoko.”
11 Mutu wacho katamba kunyingika ngwenyi, yuma yize twakuhanjika* ha mikanda muze kutushi hamwe no, ye mutukalinga* muze mutukapwa hamwe no.
12 Kutwazangile kupwa akwa-kulizata, chipwe kupwa ngwe ayo, o kakulipatwila kulita ni yize ayo ene akwamba ngwo yili yipema. Ha kulinga chino, kakusolola ngwo keshi malinjekela.
13 Kutuchi kulisamba ha kulinga yuma yize kuyatalile ha mulimo uze atutumine kulinga, alioze mutulisamba ha kulinga milimo yize Zambi atuhele kulinga. Chino chinatale nawa ha kunwambulwila sango jipema.
14 Yetu kutwalingile chuma nichimwe chize Zambi katutumine kulinga, alioze twapwile atu atangu waze anwambulwilile sango jipema hakutwala kuli Kristu.
15 Ka, yetu kutushi kulisamba ha mulimo uze katutumine kulinga, hanji ngwetu ha kukilikita cha akwetu. Alioze, twakushimbwila ngwetu, muze ufulielo wenu muununga ni kukola, ni mulimo uze twalingile muununga ni kukola mu njiza yenu.
16 Mba mutukahasa nawa kutwala sango jipema mu njiza jize janujingilika, hi ni kulisamba ko ha yize atu akwo alingile mu njiza jo.
17 “Alioze yoze malisamba, alisambe muli Yehova.”*
18 Yehova* kakunangamisa mutu yoze iye akutayiza, alioze keshi kutayiza mutu yoze wakulinangamisa iye mwene.
Footnotes
^ Chize Alisonekene, “chize twapwa mu maliji.”
^ Chize Alisonekene, “ye mutukapwa mu yitanga.”
^ Tala Apendice A5.
^ Tala Apendice A5.
