Mukanda Wamuchiali wa A-Korindu 13:1-14
13 Chino chili chisuho chamuchitatu chize mungwiza ni kunumeneka. “Chikuma cheswe, katamba kuchishindakenya kuli yela aali hanji atatu, mba tunyingike nyi yize amba yili yamwenemwene, hanji ka.”
2 Chipwe ngwe haliapwila chishi hamwe ni yenu, nihindu chili ngwe nguli hamwe ni yenu ha chisuho chamuchiali. Kashika ngunatoweza waze avulumwine kunyima, ni atu akwo nawa ngwami, muze mungwiza kuli yenu ha chisuho chikwo, chichi kanuvwila keke,
3 ha kulinga chino mungukasolola ngwami, Kristu kakuhanjika kupalikila muli yami. Chikwo nawa, Kristu hi mulelu ko mukachi kenu, alioze kakusolola ndundo jenyi jinene.
4 Mumu kwamba umwenemwene, iye kamushihile ha mutondo ngwe mutu mulelu, alioze kali ni mwono mumu lia ndundo ja Zambi. Kwamba pundu, ni yetu nawa tuli alelu muli iye, alioze mutukatwama ni mwono hamwe nenyi, kupalikila mu ndundo ja Zambi hali yenu.
5 Nungenu ni kulihengwola yenwene hanga numone nyi nuli mu ufulielo; nungenu ni kusolola chize nwapwa. Nyi kunwanyingikine ngwenu, Yesu Kristu kali hamwe ni yenu? Nyi ka, nyingikenu ngwenu kunushi ni utayizo wa Zambi.
6 Yetu tuli ni utayizo wa Zambi, kashika nguli ni shindakenyo ngwami, yenu nunanyingika kanawa chikuma chino.
7 Twakulemba kuli Zambi hanga nuchine kulinga nichimwe chuma chipi. Chapwile ngwe hanga tusoloke ngwetu tuli ni utayizo, alioze hanga yenu nulinge yuma yipema, chipwe mutusoloka ngwe kutushi ni utayizo.
8 Mumu kutuchi kuhasa kulinga chuma nichimwe chize muchilimika ni umwenemwene, alioze chize wika muchilita ni umwenemwene.
9 Kwamba pundu, twakuwahilila mashimbu eswe muze yetu tunalele, alioze yenu munutakama. Chikwo nawa, twakwita mu yilemba hanga nululieke cheka nawa manyonga jenu.
10 Kashika ngunanusonekena yuma yino shimbu nguchili kusuku, hanga muze mungukapwa hamwe ni yenu, kanda ngupwa mukalu ha chiyulo chize Mwene anguhele, cha kunutakamisa, hi kunuhisa ko.
11 Kusulaho mandumbu, nungenu ni kuwahilila, ni kululieka manyonga jenu, ni kulitakamisa, pwenu ni kunyonga chimuwika, pwenu ni sambukila; mba Zambi ya zango ni sambukila, kumakapwa hamwe ni yenu.
12 Limenekenu umwe ni mukwo ni mbeju yisandu.
13 Asandu eswe kananumeneka.
14 Chawana cha keke cha Mwene Yesu Kristu, ni zango lia Zambi, ni yiwape ya spiritu yisandu yikapwe hamwe ni yenu.
