Mukanda Wamuchiali wa A-Korindu 2:1-17
2 Hinakwata chiyulo ngwami, chichi kunuvwisa nawa chinyengo muze mungukaya ni kunumeneka.
2 Mumu nyi yami mungunuvwisa chinyengo, iya yoze makapwako hanga anguvwise chiseke shina wika waze yami nevwishile chinyengo?
3 Nanusonekenene mukanda hanga muze mungwiza koko, kanda nunenganyana ni waze te atamba kunguvwisa chiseke, mumu nguli ni shindakenyo ngwami, yize yakunguvwisa kuwaha, yenayo ni yenu yakunuvwisa kuwaha.
4 Mumu nanusonekenene ni chinyengo, ni yikola yinji mu mbunge ni masoji anji, hi hanga ngunuvwise ko chinyengo, alioze nukanyingike zango lize ngukwete hali yenu.
5 Nyi umwe hanevwisa mukwo chinyengo, hi yami wika ko anevwisa chinyengo, alioze yenu eswe, kashika chazangile kuhanjika chinji ha chikuma chino.
6 Yenu hinunapatwila kulu mutu yoze walingile shili yacho;
7 haliapwila nwatamba kumukonekena, ni kumutakamisa hanga achine kwivwa chinyengo* chinji kuhiana.
8 Kashika ngunaliumbu kuli yenu ngwami, kolesenu zango lienu kuli iye.
9 Mumu hachino nawa, nanusonekenene hanga ngunyingike ha kunweseka nyi munwononoka ha yuma yeswe.
10 Mba hakutwala kuli yami, nyi nakonekena umwe ha chimwe chuma chipi, nakuchilinga hanga ngunukwase, nakuchilinga nawa kumeso ja Kristu,
11 hanga achine kutukumba* kuli Satana, mumu tunanyingika miheto* yenyi.
12 Muze nahetele ku Troa hanga ngwambujole sango jipema hakutwala kuli Kristu, angwazulwilile pito lia milimo muli Mwene,
13 alioze nalipikalile chinji mu mbunge mumu chawanyine Titu ndumbwami. Chocho yingulishika ni mandumbu a koko ni kuya ku Masendoniya.
14 Alioze tusakwililenu kuli Zambi, yoze wakutusongwela mashimbu eswe ngwe maswalale waze akumba jita hamwe ni Kristu. Mba kupalikila muli yetu kakumwanga vumba lia chinyingi chenyi ku yihela yeswe.
15 Mumu kuli Zambi tuli vumba lipema lia Kristu mukachi ka waze ali mu jila ya ulamwino,* ni mukachi ka waze ali mu jila ya kwonwona;*
16 kuli wano akasula, vumba lia kufwa lize liakutwala ku kufwa. Kuli atangu, vumba lia mwono lize liakutwala ku mwono. Mba iya mahasa kulinga yuma yino?
17 Yetu tunajame mumu kutushi akwa-kulanjisa liji lia Zambi ngwe chize anji akulinga, alioze yetu twakwambujola umwenemwene weswe ngwe tumbaji twa Kristu, ewa tuli waze atumine kuli Zambi, kashika tunalingi milimo yino kumeso ja Zambi.
Footnotes
^ Hanji “kulela chinji kuhiana.”
^ Hanji “kutwonga.”
^ Hanji “yitaka yenyi.”
^ Hanji “waze analamwina.”
^ Hanji “waze anatoko.”
