Mukanda Wamuchiali wa A-Korindu 3:1-18
3 Shina twatamba kulisolola cheka nawa kuli yenu? Nyi tunafupiwa kusoneka mikanda yize yakuhanjika yuma yipema hakutwala kuli yetu ngwe chize atu akwo akulinga? Shina tunafupiwa lume kusoneka mikanda ya mutapu au? Ka.
2 Mumu yenu nuli mukanda wetu wakusoneka mu mbunge yetu, uze ananyingika ni kuutanga kuli atu eswe.
3 Mumu chinasoloka pundu ngwo, yenu nuli mukanda wa Kristu wakusoneka kuli yetu tuvumbi twa Zambi, hi ni ulombo ko, alioze ni spiritu ya Zambi wa mwono, hi ha mawe ko, alioze ha mbunge ja misunya.
4 Tuli ni shindakenyo yino muli Zambi kupalikila muli Kristu.
5 Kutwambile ngwetu, twakuhasa kulinga mulimo wa Zambi ku tachi ja yetu ene, alioze Zambi mwe wakutujamisa hanga tulinge mulimo wacho.
6 Yoze watujamishine hanga tupwe tuvumbi a usendo waha, hi tuvumbi a shimbi yakusoneka ko, alioze a spiritu. Mumu shimbi yakusoneka yakutwala ku kufwa, alioze spiritu yakuhana mwono.
7 Chikwo nawa, shimbi yize yakuneha kufwa yize asonekene ha mawe yejile ni uhenya unji, uhenya uze chipwe ana a Izalele kahashile kuhulikila meso jo kuli Mose, mumu ha uhenya wa ku meso jenyi, uhenya uze te muuhwa.
8 Shina shimbi ya spiritu kuyatambile kupwa ni uhenya wahiana nyi?
9 Nyi shimbi yize yakuhisa atu yili ni uhenya, mulimo uze wakukwasa atu kupwa akwa-ululi uli ni uhenya unji kuhiana!
10 Kwamba pundu, chipwe yize ku mashimbu a kunyima alingile ni uhenya, hiyinatoko uhenya wayo mumu lia uhenya uze wapwa unene kuhiana.
11 Kashika, nyi yize muyikatoka yapwile ni uhenya, yize muyinunga ku miaka yeswe yikwete uhenya wahiana!
12 Amu tuli ni kutalatala chacho, kashika twakuhanjika ni hamu,
13 mumu kutushi ngwe Mose yoze te wakusa hina ku meso jenyi, hanga ana a Izalele achine kuhulikila meso jo ku yize te muyikatoka.
14 Alioze manyonga jo alayile. Ndo musono manyonga jo kali akufuka ni hina, ayo keshi kuhasa kuwana ulumbunwiso mu usendo ukulu, mumu hina liacho makalichiza wika kupalikila muli Kristu.
15 Chikwo nawa, ndo musono mbunge jo jichili ja kufuka, kashika kechi kuhasa kuwana ulumbunwiso mu yisoneko ya Mose.
16 Alioze muze umwe akufuna kuli Yehova,* hina liacho kakulichiza.
17 Yehova* iye Spiritu, kuze kuli spiritu ya Yehova* kwenako kuli utuswilo.
18 Yetu eswe twachijile hina ku meso, tuli ngwe katalilo yoze wakusolola uhenya wa Yehova,* hanatwalumuna hanga tupwe ngwe Zambi ni kusolola chinji uhenya wa Zambi, ngwe chize Yehova,* mwe Spiritu, anazange.
Footnotes
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
