Mukanda Wamuchiali wa A-Korindu 4:1-18
4 Amu tuli ni mulimo uno usandu mumu lia keke yize Zambi anakatusolwela, kashika kutushi kuhonga.
2 Alioze hitunalitunu yuma yakuhengama ya sonyi, kutwendele ni mahuza, chipwe kulongesa liji lia Zambi ni kalimbalimba; mba hakwambujola umwenemwene, twakusoloka kanawa kumeso ja atu ni kumeso ja Zambi.
3 Kwamba pundu, nyi sango jipema jize twakwambujola jinafukiwa,* jinafukiwa kuli waze anatoko,
4 hakachi ka waze zambi ya mwakono* hanapupuchisa manyonga ja waze keshi kufuliela, hanga pangu* lia sango jipema ja uhenya hakutwala kuli Kristu yoze wapwa chifwa cha Zambi, lihone kupanguka muli ayo.
5 Mumu kutushi kwambujola hakutwala kuli yetwene, alioze hakutwala kuli Yesu Kristu mwe Mwene, ni hakutwala kuli yetwene ngwe ndungo jenu mumu hali Yesu.
6 Mumu Zambi yoze wambile ngwenyi: “Pangu lipanguke mu milima,” mwenawo hanapanguka mu mbunge jetu mukutwaha kupanguka cha chinyingi cha uhenya wa Zambi kumeso ja Kristu.
7 Alioze tuli ni upite uno mu yikwachilo ya uma, hanga ndundo jahiana jikapwe ja kuli Zambi, hi ja kuli yetwene ko.
8 Twakupalika mu kapinda mweka ni mweka, alioze kutushi kukokoloka; twakuyambashana, nihindu kutushi kusakalala.
9 Kakutuhungumiona, nihindu keshi kutwehuka; kakutulamba hashi, nihindu keshi kutwonwona.
10 Ku yihela yeswayo kuze twakuya, twakupwa mu ponde ya kufwa ngwe chize Yesu apwile, hanga mwono* wetu upwe ngwe wa Yesu.
11 Mumu yetu tuli ni mwono, kakutukunjika ku kufwa matangwa eswe mumu hali Yesu, hanga mwono wa Yesu ukasoloke nawa mu musunya wetu wa kufwa.
12 Kashika, ponde ya kufwa yili kuli yetu, alioze mwono kuli yenu.
13 Haliapwila, amu tuli ni spiritu yimuwika ya ufulielo, ni kulita ni chize chinasonewa ngwo: “Nafulielele, kashika nahanjikile;” ni yetu nawa tunafuliela, kashika twakuhanjika.
14 Tunanyingika ngwetu, Yoze wahindwishile Yesu, makatuhindwisa ni yetu nawa hamwe ni Yesu, ni kutuhetesa kumeso jenyi hamwe ni yenu.
15 Yino yeswe yakulingiwa mumu hali yenu, hanga chawana cha keke chiliokese chinji kuhiana, mumu atu anji kanasakwilila ha uhenya wa Zambi.
16 Kashika kanda tukokoloka, chipwe ngwe mujimba wetu muuzeya, nihindu utu wetu wa muchima kakuupwisa waha tangwa ha tangwa.
17 Mumu chipwe ngwe lamba* lietu lili lia mashimbu akehe, chikwo nawa lilelu, nihindu liakutunehena uhenya walumbama wahiana,* uhenya wa mutolo.
18 Mumu kutushi kulihulikila ha yuma yize yakumoneka, alioze ha yuma yize kuyishi kumoneka. Mumu yuma yize yakumoneka yili ya mashimbu akehe wika, alioze yize kuyishi kumoneka yili ya mutolo.
Footnotes
^ Hanji “jakufuka ni hina.”
^ Hanji “ulumbunwiso.”
^ Chize Alisonekene, “hanga mwono wa Yesu ukasoloke nawa mu mujimba wetu.”
^ Hanji “yeseko yetu yili ya mashimbu akehe.”
^ Hanji “yilemu yize yapwa yinji kuhiana.”
