Mukanda Wamuchiali wa A-Korindu 6:1-18
6 Twakukalakala chimuwika ni Zambi, kashika tunanukolweza ngwetu, kanda nutayiza chawana chinene cha keke ya Zambi mokomoko.
2 Mumu iye kanambe ngwenyi: “Ha mwaka upema nakupanjikile ni kukukwasa ha tangwa lia ulamwino.” Tala! Haliapwila uno we mwaka upema chikolo. Tala! Haliapwila lino lie tangwa lia ulamwino!
3 Yetu kutushi kulinga chuma nichimwe chakutalingisa, hanga achine kusaula mulimo wetu;
4 alioze twakulisolola mu majila eka ni eka ngwe tuvumbi twa Zambi, ha kunyongonona mu yeseko yinji, mu luyinda, ha mashimbu akalu, mu yipikalo,
5 muze akutulamba, muze akutusa mu mazuwo a ususu, muze tuli mu chizungo-zungo, hakukilikita chikolo, ha mashimbu waze kutushi kupomba, ha mashimbu waze kutushi kulia;
6 ha kupwa ni mwono walinanga, muze twakutwama kulita ni chinyingi, muze twakupwa yihomboloji, muze twakusolola keke, muze twakwecha hanga spiritu yisandu yisongwele mwono wetu, twakusolola zango lize kulishi ulembekese,
7 twakuhanjika umwenemwene, twakujikijila ha ndundo ja Zambi; twakukwata mata a ululi ku kwoko lia utata ni ku kwoko lia umama.
8 Kakutulemesa ni kutulelesa, kakutukumika ni kutuchichimieka, kakutumona ngwe tuli akwa-mahuza, alioze twakuhanjika umwenemwene,
9 ngwe katunyingikine, alioze Zambi kanatunyingika, ngwe tuli afu, nihindu tuli ni mwono, kakutumwesa lamba nihindu kutushi kufwa.
10 Atu kakunyonga ngwe tunanenganyana, alioze twakuwahilila mashimbu eswe, ngwe tuli yiswale, alioze twakuhana yuma yinji yipema kuli anji, ngwe kutushi ni chuma nichimwe, nihindu twapita yuma yeswe.
11 Twakuhanjika zwalala* ni yenu A-Korindu, ni kunwazulwila mbunge jetu.
12 Kutwanuswekelele manyonga jetu, alioze yenu hinunatuswekela manyonga jenu.
13 Ngunahanjika kuli yenu ngwe ana jami, kashika lingenu ni yenu chizechene kuli yetu, azululenu* mbunge jenu.
14 Kanda nulilema kanga* yimuwika ni waze kafulielele. Mumu kulita chika chili hakachi ka ululi ni ungulungulu?* Hanji kulita chika chili hakachi ka pangu ni milima?
15 Kulita chika chili hakachi ka Kristu ni Mbeliale?* Hanji kulita chika chili hakachi ka mukwa-kufuliela* ni yoze kafulielele?
16 Chikwo nawa, kulita chika chili hakachi ka tembele ya Zambi ni mahamba? Mumu yetu tuli tembele ya Zambi ya mwono, ngwe chize Zambi ambile ngwenyi: “Mungukatwama hakachi ko, ni kwenda hakachi ko, kumungukapwa Zambi yo, o kumakapwa atu jami.”
17 “‘Kashika, tuhukenu mukachi ko, lihandununenu no,’ chocho anambe Yehova.* ‘Kanda nukwata ku chuma cha luchisa,’” “‘mba mungukanutambula.’”
18 “‘Mba yami kumungukapwa tata kuli yenu, yenu kumunukapwa ana jami a malunga ni a mapwo,’ chocho anambe Yehova* mukwa-Ndundo-Jeswe.”
Footnotes
^ Hanji “twakupakula makanwa jetu hanga tuhanjike.”
^ Hanji “tohwesenu.”
^ Hanji “kanda nulichinga.”
^ Hanji “yize yakulimika ni shimbi.”
^ Liji lino linakatuka mu limi lia Hepreu linalumbunuka ngwo “mupi.” Linatale hali Satana.
^ Hanji “washishika.”
^ Tala Apendice A5.
^ Tala Apendice A5.
