Mukanda Wamuchiali wa A-Korindu 8:1-24
8 Haliapwila mandumbu, tunazange hanga nunyingike, chize Zambi asolwele chawana cha keke ku yikungulwila ya mu Masendoniya.
2 Akwa-yikungulwila yacho, chipwe ngwe kamwene lamba liahiana, chipwe ngwe kapwile yiswale, nihindu yasolola ngwo kapwa yihanyi anene.
3 Mumu yize alingile, kayilingile kulita ni uhashi wo, ewa, nguli chela ngwami, kalingile chinji kuhiana uhashi wo.
4 Mumu mandumbu aze, ku zango lio ene aliumbile chinji kuli yetu hanga ahane yawana ni kulihana mu mulimo wa kukwasa asandu.
5 O kalingile yuma yinji kuhiana yize twanyongene, mumu chitangu kalihanyine kuli Mwene, mba ku upale wa Zambi yalihana nawa kuli yetu.
6 Chocho, yitukolweza Titu hanga amanunune mulimo wa kutambula yawana yenu ya zango, mumu iye mwe waputukile mulimo wacho mukachi kenu.
7 Kashika, chizechene ngwe nuli pichi mu yuma yeswe, mu ufulielo, mu maliji, mu yinyingi, mu zango lia kulinga milimo, ni mu zango lietu hali yenu, pwenu nawa pichi hakutwala ku yawana yino ya zango.
8 Chambile chino, ngwe shimbi, alioze ngunanulweze chize atu amwe apwile ni zango lia kukwasa hanga ni yenu nusolole zango lienu liamwenemwene.
9 Mumu nunanyingika chawana cha keke cha Mwene wetu Yesu Kristu, chipwe ngwe kapwile pichi, nihindu yalipwisa chiswale mumu hali yenu, hanga nukapwe pichi kupalikila mu uswale wenyi.
10 Ha chikuma chino, ngunahana nyonga liami: Ngunalingi chino ha upeme wenu, mumu hikwapalika mwaka umuwika chize haze nwaputukile mulimo uno ni kusolola nawa zango lia kuulinga.
11 Haliapwila, manununenu mulimo uze nwaputukile kulita ni uhashi wenu, ngwe chize nwapwile ni kulinga ku uputukilo.
12 Mumu nyi mutu mazanga kuhana chawana, chawana chenyi machitayiza kulita ni chize alinacho, hi kulita ko ni chize keshi nacho.
13 Mumu chazangile kwashiwisa mwono wa atu amwe ni kukalisa mwono wenu;
14 kashika, ha kulumbama chenu, kwasenu waze anahono, hanga ha kuhona chenu, ayo no akanukwase ha kulumbama cho. Ha kulinga chino, eswe munukapwa chimuwika.
15 Ngwe chize chinasonewa ngwo: “Yoze wakungile yinji, kakapwile nayo kuhiana, ni yoze wakungile yikepe, kakahonene.”
16 Tunasakwila Zambi yoze hanahane zango linji kuli Titu lia kunukwasa, ngwe chize ni yetu nawa tunazange kunukwasa,
17 mumu iye kakatayijile wika kulinga yize twamulwezele, alioze yazanga nawa kulinga yize twamwichile, kashika ku zango lienyi mwene yatayiza kwiza kuli yenu.
18 Hitwanutumina hamwe nenyi ndumbu umwe yoze akuchichimieka mu yikungulwila yeswe mumu lia yize akulinga ha sango jipema.
19 Hi yino wika ko, alioze iye kamutongwele nawa ku yikungulwila yeswe hanga aye hamwe ni yetu atukwase kuteta yawana yize mandumbu ahanyine. Yawana yacho mutuyihana hanga tuhalise Mwene, chino muchisolola ngwo twalilulieka hanga tukwase akwetu.
20 Ha kulinga chino, mutwehuka hanga niumwe kanda atusuma mulonga hakutwala ku yawana yize twakufunga.
21 Mumu ‘twakufunga yuma yeswe kanawa, hi kumeso ja Yehova* wika ko, alioze ni kumeso ja atu nawa.’
22 Chikwo nawa, hitunatumu hamwe no ndumbwetu yoze hitunamono zango lienyi lia kulinga yuma ha yisuho yinji ni ha yikuma yinji, haliapwila iye kanasolola zango linji lia kulinga yuma mumu lia ujikijilo uze akwete hali yenu.
23 Alioze, nyi nunayambashana hakutwala kuli Titu, iye kali sepa liami kanda mukwa-mulimo-ni-mukwetu ha kunukwasa. Chikwo nawa, nyi nunayambashana hakutwala kuli mandumbu jetu, o kali apostolo a mu yikungulwila mukuhalisa Kristu.
24 Kashika, sololenu zango lienu kuli ayo, ni kusolola kumeso ja yikungulwila chikuma cha kulisamba chetu hali yenu.
Footnotes
^ Tala Apendice A5.
