Mukanda Wamuchiali wa A-Korindu 9:1-15
9 Hakutwala ku mulimo wa kukwasa asandu, chafupiwile nawa kunusonekena,
2 mumu ngunanyingika ngwami, yenu nunazange kukwasa, ngunalisambe hali yenu kuli A-Masendoniya, hingunaalweze ngwami, mandumbu ku Akeya hanalilulieka ha mwaka wa muundu hanga akwase. Kashika mumu lia zango lienu linene, anji a kuli ayo no kanazange kukwasa.
3 Alioze hingunatumu mandumbu, hanga kulisamba chetu hali yenu kanda chipwa chamokomoko hakutwala ku chino, chikwo nawa, hanga nukapwe akulilulieka ngwe chizechene yami nambile.
4 Mumu nyi Akwa-Masendoniya meza hamwe ni yami mba mamona ngwo kanda nuchililulieka, sonyi jinji mutukevwa, alioze yenu munukevwa sonyi jinji kuhiana mumu twakunufuliela.
5 Kashika namwene ngwami, chinalite kukolweza mandumbu eze ni kunumeneka chitangu ni kulianga kululieka chawana chize nwalakenyene kuhana, hanga chikapwe chakululieka ngwe chawana chize munuhana ku zango lienu, hi ha kunushinjilako.
6 Alioze hakutwala ku chikuma chino, ngunambe ngwami, yoze makuwa mbuto yikepe, makacha nawa yikepe, yoze makuwa yinji, makacha yinji.
7 Mutu mweswe akahane kulita ni chize hanatese mu mbunge yenyi, hi ni uli* ko, hanji ngwe kanamushinjila, mumu Zambi kakuzanga mutu yoze wakuhana ni uwahililo.
8 Alioze, Zambi kali ni ndundo ja kunusolwela chawana chenyi chinene cha keke hanga kanda nukahona nichimwe, alioze nukapwe ni yeswe yize munufupiwa ha kulinga mulimo upema.
9 (Ngwe chize chinasonewa ngwo: “Iye kakuhana yuma yakulumbama kuli yiswale. Ululi wenyi wapwa wa mutolo.”
10 Yoze wakuhana mbuto yalumbama kuli chikuwa, ni mbolo ya kulia, makanwaha nawa ni kwokesa mbuto ya kukuwa hanga nukache mihuko yinji ya ululi.)
11 Mu yuma yeswe, kakunuwahisa hanga nukapwe yihanyi a kuvungumioka, chino chakukwasa anji kusakwilila Zambi kupalikila muli yetu;
12 mumu yawana yize munuhana, kuyichi kakwasa wika asandu mu kuhona cho, alioze muyikakwasa nawa atu kusakwilila chinji Zambi.
13 Yawana yize nwakuhana, yakusolola chize nwapwa. O makachichimieka Zambi mumu yenu nwakulinga yuma kulita ni sango jipema jize nwakwambujola hakutwala kuli Kristu. Chikwo nawa, nwapwa yihanyi kuli ayo ni kuli atu eswe.
14 Ni kuliumba cho hali yenu, o kakusolola ngwo kakunuzanga mumu lia chawana chinene cha keke ya Zambi hali yenu.
15 Tusakwililenu Zambi mumu lia chawana chenyi chahiana.
Footnotes
^ Hanji “chinyengo.”
