Mukanda Wamuchiali Kuli A-Tesalonika 2:1-17
2 Kashika mandumbu, hakutwala ku kwiza cha Mwene wetu Yesu Kristu, ni muze mutukapwa hamwe nenyi, tunaliumbu kuli yenu ngwetu:
2 Kanda nulivundangenya nyi umwe manulweza ngwenyi, tangwa lia Yehova* hiliaheta, kanda nulipikala chipwe o mamba ngwo, lusango wacho kali wa kuli Zambi hanji manutangila mukanda uze muusoloka ngwe yetu e twausonekene.
3 Mutu niumwe kanda anwonga* chipwe hakehe, mumu tangwa lize kulichi keza shimbu utanganyanyi kanda wiza, ni kusolola mukwa-kulimika ni shimbi, mwe mwana wa kwonwona.
4 Iye kali chimika, chikwo nawa kakulinangamisa helu lia chuma cheswe chize avuluka ngwo zambi, hanji chuma cheswacho chize atu akuwayila. Kashika akutwama mu tembele ya Zambi ni kulisolola ngwenyi, kali umwe zambi.
5 Shina hinwavulama ngwenu, muze napwile hamwe ni yenu te nakunulweza yuma yino nyi?
6 Haliapwila yenu nunanyingika kanawa yoze unakwika mutu mupi, hanga akahase kumusolola ha shimbu lialita.
7 Kwamba pundu, upi wa mutu yono uze wapwa chijimbikilo, haliapwila unakalakala, alioze muununga ngwe chijimbikilo ndo muze yoze wapwa chikwiko kechi kapwako nawa.
8 Chocho, mutu yoze keshi shimbi kumakamusolola, mba Mwene Yesu kupalikila mu ndundo ja maliji jenyi ni kusoloka chenyi, kumakonwona mutu yoze keshi shimbi.
9 Alioze kwiza cha mutu yoze keshi shimbi, chakusoloka zwalala mu yilinga ya Satana ni yitanga yenyi yeswe ya ndundo, ni yilayi, ni yikomokeso ya mahuza,
10 ni uhenge weswe ni mahuza kuli waze makonwona. Fweto yo muyikapwa kwonwona mumu o katayijile ni kuzanga umwenemwene, nyi ngwe kachilingile, kachi te kumaalamwina.
11 Kashika Zambi akwecha chitalingiso chaapiangule hanga afuliele ha mahuza,
12 ni kupatwila eswe waze kafulielele mu umwenemwene, alioze awahililile mu uhenge.
13 Kashika mandumbu, chatutamba kusakwilila kuli Zambi mashimbu eswe hali yenu waze Yehova* azanga. Mumu chize ku uputukilo, Zambi wanutambikile ku ulamwino ha kunupwisa asandu ni spiritu yenyi, ni ha ufulielo wenu mu umwenemwene.
14 Mumu lia chino, anusanyikine kupalikila mu sango jipema jize twanwambulwilile hanga nukazuke uhenya wa Mwene wetu Yesu Kristu.
15 Kashika mandumbu, manenu nguu ni kulikwachilila ku mianda yize anulongesele, chipwe ngwe kanulongeseleyo kupalikila mu maliji hanji mu mikanda yetu.
16 Chikwo nawa, Mwene Yesu Kristu ni Zambi Tata yetu, yoze watuzangile, ni kutwaha utakamiso wa mutolo, ni kutalatala chipema kupalikila mu chawana cha keke,
17 akalembejeke mbunge jenu ni kunutakamisa ni yitanga yeswe yipema ni maliji.
