Mukanda Wamuchiali Kuli A-Tesalonika 3:1-18
3 Kusulaho mandumbu, nungenu ni kutulembela hanga liji lia Yehova* linunge ni kulimwanga ni kawashi, akalihalise, ngwe chize chakulingiwa mukachi kenu,
2 hanga akatupulule kuli atu api ni yingulungulu. Mumu hi atu eswe ko akufuliela.
3 Mwene kashishika, iye makanutakamisa ni kunufunga kuli mwe mupi.
4 Chikwo nawa, tunafuliela muli Mwene ngwetu, nwakukaula usongwelo uze twanuhele, mba munununga ni kuchilinga.
5 Mwene anunge ni kusongwela kanawa mbunge jenu ku zango lia Zambi ni kunyongonona muli Kristu.
6 Mandumbu, tunanwehe usongwelo mu jina lia Mwene wetu Yesu Kristu, hanga nulihandunune ni ndumbu mweswawo yoze keshi kwononoka ni kwenda kulita ni mianda yize yenu* nwatambwile kuli yetu.
7 Mumu nunanyingika chize nwatamba kutwimbulula. Muze twapwile mukachi kenu, kutwakapwile ngwe atu jacho waze keshi kwononoka.
8 Kutwalile chawana kulia cha mutu niumwe. Alioze ni kukilikita ni kuhondangana, twalingile milimo ufuku ni mwalwa hanga tuchine kupwa yilemu kuli niumwe wa kuli yenu.
9 Kuchapwile ngwe kutushi ni ulite wa kutambula chimwe chuma kuli yenu, alioze twazangile kupwa chilweza chize munwimbulula.
10 Mumu chipwe muze twapwile hamwe ni yenu, twanuhele shimbi yino ngwetu: “Nyi mutu umwe kazangile kukalakala, katambile kulia.”
11 Mumu twevwile ngwo, amwe mukachi kenu keshi kwononoka; keshi kukalakala, chikwo nawa kakulinjisa mu yuma yize kuyaatalile.
12 Kuli atu ngwe wano, tunaahe shimbi ni kwatoweza muli Mwene Yesu Kristu ngwetu, akalakale ni kulia, kulia cha ku matukuta jo.
13 Hakutwala kuli yenu mandumbu, kanda nuhonga kulinga yuma yipema.
14 Alioze, nyi ngwe umwe keshi kwononoka ha yize tunambe ha mukanda uno, musenu chinyingi ni kwecha kulikata nenyi, hanga akevwe sonyi.
15 Nihindu, kanda numumona ngwe mukwa-kole, alioze nungenu ni kumukanyamisa ngwe ndumbwenu.
16 Mwene wa sambukila, anwehe sambukila mashimbu eswe, ni mu majila eswe. Mwene apwe hamwe ni yenu.
17 Yami Paulu, ngunasoneka maliji wano ni kwoko liami mwene ngwami: Mwoyo wenu. Chino chili chilayi mu mikanda yeswe; chenacho nakusoneka.
18 Chawana cha keke cha Mwene wetu Yesu Kristu chikapwe hamwe ni yenu.
