Mukanda Wamuchiali Kuli Timoteu 1:1-18
1 Yami Paulu, postolo wa Kristu Yesu ku upale wa Zambi, kulita ni chilakenyo cha mwono uze muwiza kupalikila muli Kristu Yesu,
2 ngunakusonekena yena Timoteu, mwanami nazanga:
Chawana cha keke, ni keke ni sambukila ya kuli Zambi Tata, ni ya Kristu Yesu Mwene wetu, yikapwe ni yena.
3 Ngunasakwilila Zambi, yoze nakulingila mulimo usandu ni mbunge yitoma ngwe chize tulamba twami amulingilile, chishi kukuvulama muze nakuliumba kuli Zambi ufuku ni mwalwa.
4 Muze nakwiwuluka masoji je, nakwivwa usona wa kukumona hanga nguwahilile chinji.
5 Mumu ngunewuluka ufulielo we uze kuushi ulembekese, uze wapwile chitangu muli kakenu Loye ni muli noko Unise, ngunafuliela nawa ngwami uli muli yena.
6 Kashika, ha chikuma chino, ngunazange kukwiwulula hanga usosele ngwe kahia chawana cha Zambi chize watambwile muze nakusayikile moko.
7 Mumu Zambi kakatuhele spiritu ya mwongo, alioze ya ndundo, ya zango ni mana.
8 Kashika, kanda wivwa sonyi ja kuhana uchela hakutwala kuli Mwene wetu, chipwe kunguvwila sonyi yami funge mumu lia Kristu. Alioze, jikijila ha ndundo ja Zambi hanga wambujole sango jipema chipwe ngwe unamono lamba.
9 Iye hanatulamwina, ni kutusanyika ni chimwe kusanyika chisandu, hi mumu lia milimo yetu ko, alioze mumu lia upale wenyi ni chawana chenyi cha keke. Hanatwehe chawana chino kupalikila muli Kristu Yesu shimbu miaka te kanda yichiputuka,
10 alioze haliapwila hichinasoloka zwalala ha kusoloka cha Chilamwina wetu, Kristu Yesu, iye hanachiza kufwa, hanatusolwela nawa zwalala kupalikila mu sango jipema chize mutukapwa ni mwono uze kuushi kupola.
11 Hakutwala ku sango jino jipema, hanangutongola ngupwe mukwa-kwambujola, postolo ni longeshi.
12 Kashika ni yami nakumona lamba, alioze chishi kwivwa sonyi. Mumu ngunanyingika kanawa Yoze nakufuliela, nguli ni shindakenyo ngwami, iye kali ni ndundo ja kufunga chuma chize nakuhele ndo ha tangwa lize atongwele.
13 Kakaminya ku chilweza cha maliji apema waze wevwile kuli yami, ni ufulielo ni zango, yize yakwiza ha kulivwashana ni Kristu Yesu.
14 Kupalikila mu spiritu yisandu yize yili muli yetu, funga chuma chilemu chize akuhele.
15 Yena unanyingika ngwe, Akwa-Azia eswe kanakangwehuka, chipwe Fwijelu ni Hemojene.
16 Mwene evwile kama keke usoko wa Oneseforu, mumu iye kapwile ni kungutakamisa chinji, kakanguvwilile sonyi mumu ngwo nguli mu zuwo lia ususu.
17 Alioze, muze apwile mu Roma, yangufupa chinji, chocho yanguwana.
18 Mwene amukwase hanga Yehova* amuvwile kama keke ha tangwa lize hanatongola. Yena unanyingika kanawa milimo yeswe yize iye alingile ku Efwesu.
Footnotes
^ Tala Apendice A5.
