Mukanda Wamuchiali Kuli Timoteu 4:1-22
4 Ngunakwehe shimbi kumeso ja Zambi ni Kristu Yesu, yoze makasopesa a mwono ni afu ha kusoloka chenyi ni Wanangana wenyi ngwami:
2 Ambujola liji; chilinge ni kawashi-washi ha mashimbu apema ni ha mashimbu akalu; kumika, kanjisa, kanyamisa ni kulihumikiza cheswe ni utotombo wa kulongesa.
3 Mumu mukukapwa mashimbu waze kechi katayiza malongeso apema, alioze kulita ni usolo wo, makafupa alongeshi waze makaakula-kula ku matwi.*
4 Makalituna kwivwa umwenemwene, alioze makapanjika yishima ya mahuza.
5 Alioze yena, funga manyonga je mu yuma yeswe, nyongonona mu yipikalo, linga mulimo wa mukwa-kwambujola, manununa kanawa mulimo we.
6 Mumu kanangutehuna ngwe mulambu wa vinyu, ola ya utuswilo wami hiyakundama.
7 Hinasa jita yipema, hinazomboka ndo ku songo, hinatwama kulita ni ufulielo.
8 Haliapwila, kanangutulikila chipangula cha ululi, chize Mwene, sopi wa ululi, makangwaha ngwe fweto ha tangwa lize atesele, hi kuli yami wika ko, alioze ni kuli waze eswe akushimbwila kusoloka chenyi.
9 Sako tachi hanga wize kuli yami ni kawashi.
10 Mumu Ndima hanguhichika, iye kakuzanga yuma ya hano hashi, haya ku Tesalonika, Kresene haya ku Ngalashia, Titu neye haya ku Ndalamashia.
11 Luka wika uli ni yami. Tweya ni Marku, mumu kakungukwasa chinji mu mulimo.
12 Natuma Techiku ku Efwesu.
13 Muze muwiza, ungunehena chikuto chize nahichikile mu limbo lia Troa maha Karpu, neha nawa yivungo, chipi-chipi yivungo ya malambu.
14 Alexandre, mukwa-kufula unengu yuma yinji yipi angulingile. Yehova* makamufweta kulita ni yitanga yenyi.
15 Ni yena nawa watamba kukanyama nenyi, mumu iye kalimikine chikolo ni sango jetu.
16 Muze angusopesele ha chisuho chitangu, niumwe wapwile ni yami wakuhi, eswe kanguchinyine, Zambi aakonekene.
17 Alioze, Mwene kapwile hamwe ni yami, yangutakamisa hanga kupalikila muli yami mulimo wa kwambujola aulinge kanawa, mavungu eswe akevwe. Iye hanangulamwina ku kanwa lia ndumba.
18 Mwene mangupulwila ku yuma yeswe yipi ni kungulamwina hanga ngunjile mu Wanangana wenyi wa mu malilu. Uhenya ukapwe kuli iye ndo ku miaka ya mutolo. Amene.
19 Ungumenekena Priska ni Akwila, ni usoko wa Oneseforu.
20 Erastu kasalile ku Korindu, alioze Trofimu namuhichikile ku Miletu, te kanayiji.
21 Sako tachi wize kawashi, muze mashimbu a chishika kanda achiheta.
Upulu kakumeneka, ni Pudene, Linu, Klautia, ni mandumbu eswe.
22 Mwene apwe hamwe ni spiritu yize wakusolola. Chawana chenyi cha keke chipwe hamwe ni yenu.
