Mukanda Wamuchiali wa Yoano 1:1-13
1 Yami mukulwana* ngunasonekena yena ndumbwami wa pwo* wakusakula ni ana je, waze nazanga chinji, hi yami wika ko, alioze ni waze eswe nawa anyingika umwenemwene,
2 mumu lia umwenemwene uli muli yetu, uze nawa muununga ni yetu ndo ku miaka yeswe.
3 Chawana cha keke, ni keke ni sambukila ya kuli Zambi Tata, ni ya Mwanenyi Yesu Kristu, ni umwenemwene, ni zango yikapwe hamwe ni yetu.
4 Ngunakawahilila chinji ha kunyingika ngwami, amwe a kuli ana je kanende mu umwenemwene kulita ni shimbi yize twatambwile kuli Tata.
5 Haliapwila ndumbwami wa pwo, ngunakwichi hanga nulizange umwe ni mukwo. (Shimbi yino ngunakusonekena hi yaha ko, alioze yizeyene tukwete chize ku uputukilo.)
6 Zango linalumbunuka chino, ngwo tunungenu ni kwenda kulita ni shimbi ja Zambi. Yino ye shimbi yenyi, ngwe chize nwevwile chize ku uputukilo, nwatamba kununga ni kwenda mu zango.
7 Mumu akwa-kupiangula anji, hanalimwanga hano hashi, o keshi kutayiza ngwo, Yesu Kristu haneza mu musunya. Atu jacho kali akwa-kupiangula, akwa-kulimika ni Kristu.
8 Kashika, kanyamenu hanga nuchine kutokesa yuma yize hitunalingi. Alioze likolwezenu nukatambule fweto yeswe.
9 Mutu yoze wakulituna malongeso a Kristu ni kuhona kwakaula, keshi ni utayizo wa Zambi. Alioze yoze wakukaula malongeso jenyi, mwe uli ni utayizo wa Zambi ni wa Mwanenyi.
10 Nyi mutu meza kuli yenu, alioze keshi ni malongeso a Kristu, kanda numutambula ku mazuwo jenu chipwe kumumeneka, ka.
11 Mumu yoze mamumeneka, malichinga nenyi mu yitanga yenyi yipi.
12 Chipwe ngwe nguli ni yuma yinji ya kunusonekena, alioze chazangile kunusonekenayo ha papilo* ni ulombo. Mumu ngunazange kwiza ni kunumeneka ni kuhanjika ni yenu meso ni meso hanga uwahililo wenu woke.
13 Ana ja ndumbwe wa pwo yoze hanatongola, kanakumeneka.
