Mukanda Wamuchitatu wa Yoano 1:1-14
1 Yami mukulwana, ngunakusonekena yena mukwetu wa zango, Ngayu, yoze nakuzanga chinji.
2 Mukwetu wa zango, ngunalembe hanga yuma yeswe yinunge ni kwenda kanawa kuli yena, upwe ni tachi ja mujimba ngwe chize ulinajo haliapwila.
3 Mumu ngunakawahilila chinji muze mandumbu ejile ni kuhana uchela ngwo, unakakaminya ku umwenemwene, chikwo nawa ngwo unanungu ni kwenda mu umwenemwene.
4 Kukushi chuma chikwo muchingwaha uwahililo ngwe chino: kwivwa ngwo ana jami kananungu ni kwenda mu umwenemwene.
5 Mukwetu wa zango, solola ushishiko we ha yize wakulingila mandumbu, chipwe ngwe kuwaanyingikine.
6 Ayo kahana uchela mu chikungulwila hakutwala ku zango lize wakusolola. Ngunaliumbu, muze maya, akwase kulita ni chize Zambi akuzanga.
7 Mumu ayo kakatukile hanga ambujole jina lia Zambi, kakatambwile chuma nichimwe kuli akwa-mavungu.
8 Kashika, twatamba kuzumbula mandumbu ngwe wano, hanga tupwe akwa-kukalakala hamuwika mu umwenemwene.
9 Nasonekena chikungulwila mukanda, alioze Ndiutrefwe, yoze wakuzanga kupwa ha chihela chitangu hakachi ko, keshi kutayiza ni kuvumbika yuma yize twakwamba.
10 Kashika, nyi neza, mungunulweza yuma yize akulinga ni mahuza waze akumwanga hakutwala kuli yetu. Hi wika ko chino, iye kakulituna kuzumbula mandumbu ni vumbi; ni waze akuzanga kuzumbula mandumbu jacho, kakwakwika ni kwahuma mu chikungulwila.
11 Mukwetu wa zango, kanda wimbulula yuma yipi, alioze imbulula yipema. Yoze wakulinga yipema kali wa kuli Zambi. Alioze yoze wakulinga yipi, kanyingikine Zambi.
12 Atu eswe kanahanjika yuma yipema hakutwala kuli Ndemetriu, chipwe umwenemwene unashindakenya ha chikuma chino. Ni yetu tunahana uchela hakutwala kuli iye, ni yena unanyingika ngwe, uchela uze twakuhana uli wamwenemwene.
13 Te nguli ni yuma yinji ya kukusonekena, alioze chazangile kukusonekenayo yeswe ha mukanda.
14 Mumu, kwasala hakehe tulimone, mba mutuhanjika meso ni meso.
Sambukila yipwe kuli yena.
Mwoyo unji anakutumina kuli masepa. Ngumenekene masepa, mutu ni mutu ha jina lienyi.
