Kuli A-Efwesu 2:1-22
2 Chikwo nawa, Zambi hananwehe mwono, chipwe ngwe nwafwile mumu lia uhenge wenu ni shili,
2 yize ku mashimbu a kunyima nwapwile ni kwenda kulita ni yuma ya mwakono ya chifuchi chino, kulita ni nguvulu wa chiyulo cha mu tetela, spiritu yize haliapwila yili ni tachi hali waze keshi kwononoka.
3 Ewa, ha miaka ya kunyima, yetu eswe twendele hakachi ko mu usolo wa musunya wetu, ni kulinga upale wa mujimba ni wa kunyonga chetu. Kashika chize ku kusemuka chetu, twapwile atu waze te atela utenu wa Zambi, chizechene ngwe atu akwo.
4 Alioze, Zambi kazala too ni keke, mumu lia zango lienyi linene lize atuzangile nalio,
5 watuhele mwono hamwe ni Kristu, chipwe muze te hitunafu mumu lia uhenge wetu—yenu kanulamwinyine kupalikila mu chawana cha keke.
6 Chikwo nawa, Zambi watuhindwishile hamwe nenyi ni kututwamisa hamwe nenyi mu yihela ya mu malilu mukulinunga ni Kristu Yesu.
7 Zambi kakulinga chino hanga mu chifuchi chaha chize muchiza, akasolole utu wenyi walumbama muze makalinga yuma yipema hali yetu twalinunga ni Kristu Yesu.
8 Mumu lia chawana chino cha keke, yenu hananulamwina kupalikila mu ufulielo. Chino hi cha kuli yenu ko; kwamba pundu, chili chawana cha Zambi.
9 Chino chakalingiwile mumu lia mulimo uze nwalingile, hanga niumwe kanda apwa ni chitela cha kulisamba nacho.
10 Yetu tuli yilinga ya ku moko ja Zambi, atutangile mukulinunga ni Kristu Yesu tulinge milimo yipema yize Zambi aliangile kutesa hanga tulinge.
11 Kashika, iwulukenu ngwenu, yenu waze nwasemukine* ngwe akwa-mavungu, chitangu te kakunuvuluka ngwo “yilima” kuli waze akwavuluka ngwo, “ngalami” uze akulinga ku musunya ku moko ja atu.
12 Ha miaka yize, kunwakapwile ni Kristu, nwapwile kusuku ni vungu lia Izalele, yilambala mu usendo wa chilakenyo. Kunwakapwile ni kutalatala, nwapwile kunushi ni Zambi hano hashi.
13 Alioze, mukulinunga ni Kristu Yesu, yenu waze hatangu nwapwile kusuku, haliapwila nuli mukamwihi kupalikila mu manyinga ja Kristu.
14 Mumu iye kali sambukila yetu, yoze wachingile yizavu yiali hanga chipwe chimuwika ni kupuzula chikalakala chize chapwile ni kwahandununa hakachi ko.
15 Kupalikila mu musunya wenyi, wahwishile kole, hanji ngwetu Shimbi, hanga alinge ku yizavu yiali yize yinalinungu hamwe nenyi, mutu mwaha, ni kuneha sambukila.
16 Iye te mahasa kukwasa kanawa yizavu yino yiali hanga yipwe mujimba umuwika ni kulivwashana ni Zambi kupalikila ha mutondo* wa lamba, mumu iye wahwishile kole kupalikila muli iye mwene.
17 Mba iye wejile, wanwambulwilile sango jipema ja sambukila, yenu waze nwapwile kusuku, ni sambukila kuli waze apwile mukamwihi.
18 Chino chakulingiwa mumu chitapo chenyi chakutukwasa hanga yetu eswe mu yizavu yino yiali tulembe kuli Tata wa mu malilu, mumu yetu eswe hitunatambula spiritu yimuwika.
19 Chocho, yenu hi nuli njize ko nawa chipwe yilambala, alioze nuli enyaho-ni-akwo ja asandu ni atu a mu usoko wa Zambi,
20 anukolesele ha fundamentu ya apostolo ni ya aprofeta, ni Kristu Yesu mwene wapwile liwe lia ha mbango ya fundamentu.
21 Mukulinunga nenyi, yihanda ya zuwo lieswe yili yakutokeka kanawa, kuyinakolo hanga yipwe tembele yisandu ya Yehova.*
22 Mukulinunga nenyi, ni yenu nawa kananukolesa hamuwika hanga nukapwe chihela chize Zambi matwama kupalikila mu spiritu.
