Kuli A-Efwesu 3:1-21
3 Kashika, yami Paulu, funge mumu lia Kristu Yesu mumu hali yenu atu a ku mavungu—
2 nyi chamwenemwene hinunevu ngwo, natambula chiteli cha kunukwasa hanga nuyuke ha chawana cha keke ya Zambi,
3 ngwo chijimbikilo chisandu hanangunyingikisacho kupalikila mu umwe usolwelo, ngwe chize nasonekene mu maliji akehe.
4 Kashika, muze munutanga chino, munuhasa kumona chinyingi chize nguli nacho hakutwala ku chijimbikilo chisandu cha Kristu.
5 Mu yisemuko yikwo, chijimbikilo chino kachinyingikishine kuli ana ja atu ngwe chize achisolola haliapwila kuli apostolo jenyi asandu ni aprofeta kupalikila mu spiritu.
6 Chijimbikilo chili chino: Waze hi A-Yunda ko analinungu ni Kristu Yesu, kumakahinga yize Kristu hahinga ni kupwa chihanda cha mujimba. O kumakatambula yuma yizeyene Zambi hanatulakenya mumu lia sango jipema.
7 Yami napwile kavumbi ka chijimbikilo chino chisandu, mumu lia chawana chinene cha keke ya Zambi. Iye wanguhele chawana chino kulita ni ndundo jenyi.
8 Kuli yami, nguli mukepe wahiana eswe hakachi ka asandu eswe, hanangwehe chawana chino cha keke hanga ngukambulwile mavungu sango jipema hakutwala ku upite wa Kristu, uze niumwe mahasa kunyingika,
9 ni kukwasa atu hanga amone chize Zambi yoze watangile yuma yeswe anasolola chijimbikilo chenyi chisandu chize aswekele ha mashimbu anji.
10 Chino chalingiwile, hanga haliapwila kupalikila mu chikungulwila anyingikise manguvulu, ni akwa-kuyula mu yihela ya mwilu, milali yeka ni yeka ya mana a Zambi.
11 Chino chinalite ni upale wenyi wa mutolo uze atesele hakutwala kuli Kristu Yesu, Mwene wetu,
12 kupalikila muli yoze tuli ni utuswilo uno wa kuhanjika ni kuhasa kukundama kuli Zambi ni shindakenyo, kupalikila mu ufulielo wetu muli Kristu.*
13 Kashika, ngunaliumbu kuli yenu ngwami, kanda nuhonga mumu lia lamba lize ngunamono hali yenu, se chino chinalumbunuka uhenya kuli yenu.
14 Ha chikuma chino, nakuliumba ni makungunwa hashi kuli Tata,
15 yoze muli iye asoko eswe mu malilu ni hashi hanaaluku majina.
16 Nakulemba kuli Zambi yoze ukwete uhenya walumbama, hanga atakamise mbunge ni manyonga jenu ni ndundo jize spiritu yakuhana.
17 Hanga ha ufulielo wenu, Kristu akatwame mu mambunge jenu ni zango. Yenu kumunukamana nguu ngwe chizechene mutondo unene wakutanda miji,
18 hanga hamwe ni asandu eswe, nukahase kunyingika kanawa utohwe, usuhwe, usuhwe kwilu ni usuhwe kushi,
19 ni kunyingika zango lia Kristu, lize liahiana chinyingi, hanga nukazale too ni yitanga yize Zambi akuhana.
20 Zambi kali yoze kulita ni ndundo jenyi jize jili muli yetu, mahasa kulinga yuma yinji kuhiana yize mutumwita hanji mutunyonga.
21 Uhenya akauhane kuli iye kupalikila mu chikungulwila ni muli Kristu Yesu, ku yisemuko yeswe ndo ku miaka ya mutolo. Amene.
Footnotes
^ Chize Alisonekene, “muli iye.”
