Kuli A-Efwesu 4:1-32
4 Kashika, yami funge muli Mwene, ngunaliumbu hanga nwende mu jila yalita kulita ni kutambika chize anutambikile nacho,
2 ni kulikehesa* cheswe hamwe ni kushimbika, ni uhomboloji, lihumikizenu umwe ni mukwo mu zango,
3 ha kulikolweza chinji hanga nupwe ni sambukila umwe ni mukwo, ni kufunga kulinunga chenu chize nwazukile kupalikila mu spiritu yisandu.
4 Kuli mujimba umuwika ni spiritu yimuwika, chizechene ngwe kuli kutalatala chimuwika chize anutambikile nacho;
5 kuli Mwene umuwika, ufulielo umuwika ni upapachiso umuwika;
6 Zambi umuwika ni Tato ya eswe, yoze uli helu lia eswe, wakukalakala kupalikila muli yetu eswe, ni ndundo jenyi jakukalakala mu majila eswe.
7 Mutu mweswe hakachi ketu hanatambula chawana cha keke kulita ni chawana chize Kristu ahanyine.
8 Mumu Yisoneko kuyinambe ngwo: “Muze iye azezukile mwilu, watwalile funge hamwe nenyi; wahanyine atu ngwe yawana.”
9 Mba maliji wano “wazezukile” yika analumbunuka? Kanalumbunuka ngwo, chitangu iye wahulumukine nawa kushi, hanji ngwetu hashi.
10 Yoze wahulumukine, mwenawo wazezukile nawa helu lia malilu eswe, hanga kupalikila muli iye yuma yeswe yikamanunuke.
11 Iye wahanyine amwe ngwe apostolo, akwo ngwe aprofeta, eka ngwe akwa-kwambujola, amwe nawa ngwe tufunga ni alongeshi,
12 hanga akafumbe asandu mu milimo ya chikungulwila mukukolesa mujimba wa Kristu,
13 ndo muze eswe mutukalinunga mu ufulielo umuwika, ni kupwa ni chinyingi cha umwenemwene hakutwala kuli Mwana wa Zambi, hanga tupwe ngwe atu waze hajama ndo muze yitanga yetu yeswe muyipwa ngwe ya atu waze hakola, ngwe Kristu.
14 Kashika, kutwatambile nawa kupwa ngwe twanuke, mumu waze akukaula malongeso a mahuza ja atu waze akupiangula akwo, makapwa ngwe ulungu uze akuhungumuna sali ni sali ku fuji ni mikanya ya mu kalunga-lwiji.
15 Kashika, twatamba kuhanjika umwenemwene ni kusolola zango, chino muchitukwasa kupwa atu ajama mu majila eswe ha kwimbulula Kristu we mutwe.
16 Kupalikila muli iye mujimba weswe wakulinunga kanawa, mba yihanda yeswe yakulikwasa hanga yihane yize musunya unafupiwa. Nyi chihanda ni chihanda muchikalakala kanawa, chino muchikwasa mujimba kutatuka hanga mujimba weswe ukole mu zango.
17 Kashika, ngunambe ni kunutoweza muli Mwene ngwami: Kanda nununga ni kwenda ngwe chize akwenda atu akwa-mavungu mu kunyonga cho chamokomoko.
18 Kunyonga cho chili mu milima, kali kusuku ni mwono uze Zambi akuhana mumu lia kuhona cho cha mana, ni mumu lia kukala cha mbunge jo.
19 O hanatokesa mana eswe ni kulihana ku yuma ya sonyi* hanga alinge ni kuzo yuma yeka ni yeka ya luchisa.
20 Alioze, yenu kunwakalilongesele ngwenu, Kristu che apwa,
21 nyi chamwenemwene lume nwamupanjikile ni kunulongesa kulita ni umwenemwene uze Yesu alongesele.
22 Kanulongesele ngwenu, nwatamba kumbila utu ukulu uze unalite ni kupwa chenu cha kunyima chize anapiangula kulita ni usolo wa kwonga.
23 Kashika, nungenu ni kwalumuka hanga nupwe aha mu kunyonga chenu,
24 ni kuzala utu waha uze atangile kulita ni upale wa Zambi, mu ululi wamwenemwene* ni ushishiko.
25 Kashika, amu hinunambila mahuza, mutu mweswe ahanjike umwenemwene kuli umwe ni mukwo, mumu eswe tuli yihanda ya umwe ni mukwo.
26 Tenukenu, alioze kanda nuvulumuna; kanda nwivwa uli ndo ku kutoka cha tangwa.
27 Kanda nuhana unjililo* kuli Ndiapu.
28 Yoze wakwiya, kanda eya nawa; alioze, shinaho akakilikite, akalinge milimo yipema ni moko jenyi, hanga akapwe ni chimwe chuma cha kulianyina ni yoze unahono.
29 Mu kanwa lienu kanda mutuhuka nilimwe liji lipi, alioze shinaho lize lipema ha kukolesa hanga likayukise waze makevwa.
30 Kanda nuvwisa chinyengo spiritu yisandu ya Zambi, yize anujikile nayo ndo ha tangwa lize makanutusula kupalikila mu ukuule.
31 Mbilenu mutapu weswe wa toto, ni ufwatulo, ni utenu, ni zungo, ni matuka, ni yuma yeswe yipi.
32 Alioze, sololenu utu kuli umwe ni mukwo, pwenu akwa-keke ni kulikonekena umwe ni mukwo ni mbunge yeswe chizechene ngwe Zambi hanatukonekena kupalikila muli Kristu.
