Kuli A-Fwilipu 1:1-30
1 Yami Paulu ni Timoteu, ndungo ja Kristu Yesu, kuli asandu eswe waze analinungu ni Kristu Yesu atwama mu Fwilipu, ni tulayi ni tuvumbi:
2 Chawana cha keke ni sambukila ya kuli Zambi, Tata yetu, ni ya Mwene Yesu Kristu yikapwe hamwe ni yenu.
3 Nakusakwilila mashimbu eswe kuli Zambi yami muze nakunwiwuluka
4 mu kuliumba chami cheswe hali yenu. Kuliumba cheswe nakuchilinga ni uwahililo,
5 mumu lia kulihana chenu ha kwambujola sango jipema chize ha tangwa litangu ndo musono.
6 Mumu nguli ni shindakenyo ha chikuma chino ngwami, yoze waputukile mulimo upema muli yenu, makaumanununa ndo ha tangwa lia Kristu Yesu.
7 Chinalite yami kunyonga chocho hakutwala kuli yenu, mumu yenu eswe nwatwama mu mbunge yami, ewa, yenu eswe nuli ni chihanda ni yami mu chawana cha keke, nwangukwashile muze napwile mu zuwo lia ususu, mba kupalikila mu shimbi nwambujolwele sango jipema chakuhona yikwiko.
8 Mumu Zambi kali chela chami ngwami, yenu eswe ngunanuvwila usona unji ni zango linene ngwe lia Kristu Yesu.
9 Yino ye nakununga ni kwita mu yilemba ngwami, zango lienu likalumbame hamwe ni chinyingi cha umwenemwene ni mana.
10 Nukase shindakenyo ha yuma yahiana ulemu, hanga nukapwe kunushi kapalia, ni kuhona kutalingisa akwenu ndo ha tangwa lia Kristu.
11 Nukazale too ni muhuko wa ululi uze wakwiza kupalikila muli Yesu Kristu, hanga nukalemese ni kuhalisa Zambi.
12 Mandumbu, ngunazange nunyingike ngwenu, yuma yize yinalingiwa kuli yami yakukwasa kusenyesa sango jipema kulutwe.
13 Mumu tufunga ja mwanangana wa A-Roma ni atu akwo eswe hanyingika ngwo, nguli mu zuwo lia ususu mumu lia Kristu.
14 Haliapwila, anji a kuli mandumbu muli Mwene hatakama ha kungumona mu zuwo lia ususu. O kanasolola hamu ha kuhanjika hakutwala ku liji lia Zambi chakuhona woma.
15 Chamwenemwene lume, amwe kakwambujola Kristu mumu lia chipululu ni ukwa, alioze, akwo kakwambujola ni nyonga lialita.
16 Wano akasula kakwambujola Kristu ni zango, mumu kananyingika ngwo hanangutongola hanga ngukalile sango jipema.
17 Alioze, atangu kakwambujola ni kulihamikina, hi ni nyonga lialita ko, mumu kanazange kungunehena kapinda shimbu nguchili mu zuwo lia ususu.
18 Ni kufumbuka chika? Mumu chipwe ngwe manyonga jo kali a ulembekese, hanji amwenemwene, nihindu kanambujola Kristu, mba ngunawahilila. Kwamba umwenemwene, mungununga ni kuwahilila,
19 mumu ngunanyingika ngwami, kufumbuka muchikapwa ulamwino wami, mumu lia kuliumba chenu hamwe ni ukwaso wa spiritu ya Yesu Kristu.
20 Chino chinalite ni kutalatala chami ni kufuliela ngwami, chichi kevwa sonyi nijimwe. Alioze, mumu lia kuhanjika chami ni hamu, Kristu makamuchichimieka ngwe chizechene akumuchichimieka kulu kupalikila mu mujimba wami, chipwe mungupwa ni mwono, hanji mungufwa.
21 Mumu kuli yami, mwono uli Kristu, kufwa chili kufumbuka.
22 Alioze nyi mungununga ni kutwama kulita ni musunya, mungulilulieka ha kulinga mulimo wa Kristu. Kashika, chichi kahanjika hakutwala ku yize mungukasakula.
23 Ngunalitachika hakachi ka yino yuma yiali, mumu ngunazange kutusuka ngukapwe ni Kristu, chino chili chipema chinji kuhiana.
24 Alioze, chize chinanupemena chili yami kununga ni kutwama kulita ni musunya.
25 Ha chikuma chino, yami ngunanyingika ngwami mungununga ni mwono, ewa, mungununga hamwe ni yenu hanga nukole mu milimo yenu kuli Zambi ni kuwahilila mu ufulielo wenu.
26 Kashika, uwahililo wenu muukalumbama muli Kristu Yesu mumu hali yami, muze mungukapwa cheka nawa ni yenu.
27 Endenu mu jila yalita kulita ni sango jipema hakutwala kuli Kristu, hanga chipwe mungwiza ni kunumeneka, chipwe chishiko, ngukevwe sango hakutwala kuli yenu ni kunyingika ngwo nunamana nguu mu spiritu yimuwika, ni mu alma* yimuwika, ni kulikolweza sali ni sali ha ufulielo wa sango jipema.
28 Kanda nwecha akwa-kole jenu anuvwise woma. Yuma yino yakusolola ngwo, o makaonwona, alioze yenu makanulamwina. Yino yinakatuka kuli Zambi.
29 Mumu yenu nwatambwile chiwape chino ha kulingila Kristu, hi ha kumufuliela wika ko, alioze nawa ha kumona lamba mumu hali iye.
30 Chizechene ngwe nwangumwene mungulikolweza, ni yenu nawa nunalikolweza ha kapinda yoze nunapalika. Ngwe chize nunanyingika, ni yami munguchinunga ni kulikolweza.
Footnotes
^ Hanji “ni nyonga limuwika.”
