Kuli A-Fwilipu 2:1-30
2 Nyi nunazange kuhana umwe utakamiso kupalikila muli Kristu, nunazange kulianyina kulembejeka chimwe mumu lia zango, kulihulumba cheswacho, hanji zango, chipwe keke mumu hali ayo,
2 chilingenu hanga nuzale too ni uwahililo, nusolole nawa ngwenu, nukwete kunyonga chimuwika, zango limuwika, nunalinungu, ni kupwa ni mbunge yimuwika.
3 Kanda nulinga nichimwe chuma ni ukwa, hanji kulizata, alioze ni kulikehesa* cheswe, monenu akwenu ngwenu kanuhiana.
4 Mutu mweswe kanda atala ku yuma yenyi wika, alioze ku yuma ya akwo nawa.
5 Pwenu ni kunyonga chizechene Kristu Yesu apwile nacho.
6 Chipwe ngwe kalifwa ni Zambi, nihindu kakanyongene kutambula chihela cha Zambi, hanji ngwetu, kweseka kupwa ngwe Zambi.
7 Alioze, iye wechele yuma yeswe yize apwile nayo, walipwishile ndungo ni kulifwa ni atu.*
8 Kuhiana chino, muze ejile ngwe mutu,* walikehesele ni kwononoka ndo ku kufwa, ewa, kufwa ha mutondo* wa lamba.
9 Hamukunda wa chino, Zambi wamunangamishine kuhiana ni kumwaha jina lize lili helu lia majina eswe,
10 hanga mu jina lia Yesu, makungunwa eswe akaliumbe—waze ali mwilu, ni hashi ni kushi lia hashi—
11 ni malimi eswe akanyingike zwalala ngwo, Yesu Kristu iye Mwene ha uhenya wa Zambi mwe Tata.
12 Kashika akwetu a zango, chizechene ngwe nwononokene matangwa eswe hi kumeso jami wika ko, alioze kuhiana haliapwila muze chishiko, senu tachi hanga numanunune ulamwino wenu ni woma ni kuchikima.
13 Mumu Zambi kali yoze kulita ni chize chamupemena, kakunwaha tachi ja kulinga yuma yeswe yize iye akuzanga.
14 Nungenu ni kulinga yuma yeswe chakuhona kulinyenyeta chipwe kulihangujola,
15 hanga nukapwe kunushi chitela, kunushi chipi, ana ja Zambi, kunushi kapalia mukachi ka chisemuko cha uhenge ni cha pami. Hakachi ko nwakupanguka hano hashi ngwe temo.
16 Nungenu ni kulikwachilila chikolo ku liji lia mwono. Chocho mungukapwa ni chimwe cha kulisamba nacho ha tangwa lia Kristu, ha kunyingika ngwami, chazombokele chamokomoko, chipwe kukilikita chami kuchapwile chamokomoko.
17 Kashika, chipwe ngwe mangutehuna ngwe mulambu wa vinyu ha chitapo ni mulimo usandu uze nwakulinga mumu lia ufulielo wenu, nihindu nakuwahilila ni kulianyina uwahililo wami hamwe ni yenu eswe.
18 Chizechene nawa, ni yenu nwatamba kuwahilila ni kulianyina uwahililo wenu ni yami.
19 Ngunashimbwila muli Mwene Yesu kunutumina ni kawashi Timoteu, hanga ngutakame muze mungutambula sango hakutwala kuli yenu.
20 Mumu chishi ni mukwo yoze wakulihana ngwe iye, yoze makanufunga kanawa.
21 Mumu akwo eswe kakufupa yuma yo ene, hi ya Yesu Kristu ko.
22 Alioze, yenu nunanyingika kanawa yitanga yipema ya Timoteu, iye kakalakalile hamwe ni yami ngwe ndungo ha kwambujola sango jipema, ngwe chize mwana akulinga ni tato.
23 Kashika, iye ngunazange kutuma muze mungunyingika yize muyikalingiwa kuli yami.
24 Kwamba pundu, ngunafuliela muli Mwene ngwami, ni yami mwene nawa mungukeza ni kawashi.
25 Alioze, haliapwila ngunamono ngwami, muchilita kunutumina Epafwonditu, ndumbwami, mukwa-milimo-ni-mukwetu, kanda kajita-ni-mukwetu, yoze nwangutuminyine hanga angukwase ha yize te mungufupiwa,
26 mumu iye kanazange chinji kunumona nulieswe, mba kanahongo ku mbunge mumu nwevwile ngwenu, iye kanayiji.
27 Kwamba pundu, iye wayijile, wapwile hakamwihi ni kufwa; alioze Zambi wamuvwilile keke, hi iye wika ko, alioze ni yami nawa, hanga nguchine kwivwa chinyengo chinji kuhiana chize te ngunevu.
28 Kashika ngunamutumu ni kawashi hanga muze munukamumona, nukawahilile cheka nawa, ni yami nguchine kusakalala chinji.
29 Mutambulenu ni uwahililo weswe ngwe chize chakulingiwa mukachi ka waze akulingila Mwene. Nungenu ni kulemesa atu ngwe iye,
30 mumu iye wapwile hakamwihi ni kufwa hamukunda wa mulimo wa Kristu.* Yasa mwono* wenyi mu ponde hanga angukwase ha yize yenu kunwahashile kungukwasa, mumu kunushi hamwe ni yami.
Footnotes
^ Hanji “kulikehesa mu mbunge.”
^ Chize Alisonekene, “ni kupwa mutu.”
^ Chize Alisonekene, “muze alifwile ni atu.”
^ Kota nawa, “wa mulimo wa Mwene.”
^ Hanji “yasa alma yenyi mu ponde.”
