Kuli A-Hepreu 5:1-14
5 Mumu mwata mweswe wa asasendote a lutwe yoze akusakula hakachi ka atu, kakumusakula akalakalile Zambi hanga ayukise atu, ahane yawana ni yitapo mumu lia shili.
2 Iye mahasa kuvwila keke atu waze keshi chinyingi ni waze akuvulumuna, mumu neye kali ni ulelu,
3 mumu lia chino, neye katamba kuhana milambu ha shili yenyi mwene ngwe chizechene akuhana ha shili ya atu.
4 Niumwe mutu mahasa kulipwisa mwata wa asasendote a lutwe wakuhi, ndo muze mamusakula kuli Zambi ngwe chize asakwile Arone.
5 Chizechene nawa, Yesu kakalinangamishine mwene ni kulipwisa mwata wa asasendote a lutwe, alioze kanakamunangamisa kuli Yoze wambile kuli iye ngwenyi: “Yena uli mwanami; musono yami hinapwa tatenu.”
6 Ngwe chize iye ambile nawa ha chisoneko chikwo ngwenyi: “Yena uli sasendote ku miaka yeswe ngwe Melekizeteke.”
7 Muze Kristu apwile hano hashi, kalembele ni kuliumba, yakololoka chinji ni masoji ku meso kuli Yoze te uli ni ndundo ja kumulamwina ku kufwa. Chocho yamupanjika, mumu te kakuvwila Zambi woma.
8 Chipwe ngwe kapwile mwana, nihindu yalilongesa kwononoka ha lamba lize amwene.
9 Mba muze hamupwisa mungunu, yapwa mukwa-kuneha ulamwino wa mutolo kuli waze eswe akumwononokena,
10 mumu Zambi mwe wamutongwele hanga apwe mwata wa asasendote a lutwe, ngwe Melekizeteke.
11 Tuli ni yuma yinji yakunulweza hakutwala kuli iye, alioze chili chikalu kunulumbunwinayo, mumu hinwapwa yileya ha kwivwa.
12 Chipwe ngwe haliapwila te nwatamba kupwa alongeshi, alioze chatamba umwe kunulongesa cheka yikuma yitangu ya maliji asandu a Zambi, mumu nunafuna cheka kunyima ni kufupa kunwa yamwa, hi kulia cha tachi ko.
13 Mumu yoze unanungu ni kunwa yamwa, kanyingikine liji lia ululi, mumu kali kanuke.
14 Alioze kulia cha tachi, chili cha atu waze hakola, waze mumu lia fumbo anatambula, kali ni mana a kusa chinyingi hakachi ka chipema ni chipi.
