Kuli A-Hepreu 6:1-20
6 Kashika, amu hitwahichika longeso litangu hakutwala kuli Kristu, tusenu tachi hanga tununge ni kujama, kanda tusa cheka nawa fundamentu, che kwamba, kulikonyeka ku yitanga yamokomoko ni kufuliela muli Zambi,
2 ni longeso lia upapachiso weka ni weka, kusayika* moko hali atu, uhindukilo wa afu ni upatwilo wa mutolo.
3 Yino ye mutulinga, nyi Zambi mapala.
4 Hakutwala kuli atu atangu waze hanaasolwela pangu, waze hanapaka chawana cha mwilu, hanaahe spiritu yisandu,
5 ni waze haneseka liji lipema lia Zambi, ni ndundo ja yuma ya kulutwe lia matangwa,
6 alioze yapianguka, chili chikalu kwahilwisa cheka alikonyeke, mumu ene hanahate cheka nawa ha mutondo wa lamba mwe Mwana wa Zambi ni kumulelesa ha mbunga.
7 Mumu mavu kakutambula chiwape cha Zambi muze vula akunokaho yisuho yinji, mba muhasoka yilima-lima yipema ya atu waze akuyilima.
8 Alioze nyi ha mavu muhasoka mbimbo ni mikalale, mavu jacho kakulitunawo, ni kupwa hakamwihi ni shingo, mba ku songo maocha.
9 Kashika, mandumbu a zango, chipwe ngwe tunahanjika chocho, tuli ni shindakenyo ya yuma yipema hali yenu, yuma yize yinatale ha ulamwino.
10 Mumu Zambi hi chihenge ko hanga avulame mulimo wenu, ni zango lize nwasolwele ha jina lienyi ha kulingila asandu ni kununga ni kwalingila.
11 Alioze tunazange mutu mweswe wa kuli yenu asolole mbunge ya kulihana chikolo, ngwe chize asolwele ku uputukilo, hanga apwe ni shindakenyo ya kutalatala ndo ku songo,
12 hanga nuchine kupwa yileya, alioze nupwe akwa-kwimbulula atu waze akuhinga yilakenyo mumu lia ufulielo ni uhumikizo.
13 Mumu muze Zambi alakenyene Apalahama, amu kukushi mutu mukwo wamuhiana, yalishinga mu jina lienyi mwene,
14 ni kwamba ngwenyi: “Pundu lume mungukuwahisa, pundu lume mungukakwokesa.”
15 Kashika, muze Apalahama asolwele uhumikizo, yazuka chilakenyo chacho.
16 Mumu muze atu akulishinga, kakulishinga mu jina lia mutu munene wahiana ayo, shingo lio liakuhwisa kulitachika cheswe, mumu liakusolola kuli ayo ngwo kahanjika umwenemwene.
17 Chizechene nawa, muze Zambi azangile kusolola zwalala kuli akwa-kuhinga chilakenyo ngwenyi upale wenyi kuushi kwalumuka, iye wachishindakenyene ni shingo,
18 hanga kupalikila mu yuma yiali yize kuyishi kwalumuka, yize Zambi kechi kuhasa kulionga, yetu waze twachinyina mu uchinyino, tutambule utakamiso wa tachi hanga tukakaminye chinji ku kutalatala chize asele kulutwe lietu.
19 Tuli ni kutalatala chino ngwe ankora* ya mwono, chili chamwenemwene, kuchakola, chakunjila ndusu ndo muchima, kunyima lia chikalakala cha hina,
20 muze Yesu, mwe tetekeli anjilile hanga atuyukise, yoze hapwa mwata wa asasendote a lutwe, miaka yeswe ngwe Melekizeteke.
