Mukanda wa A-Kolosu 2:1-23
2 Mumu ngunazange nunyingike chize nakulitachika chikolo hali yenu, ni hali waze atwama mu Laotisea, ni eswe waze kanda achingumona meso ni meso.*
2 Nyonga liami lili kutakamisa mbunge jo, hanga alinunge mu zango ni kupwa ni upite weswe uze wakwiza ha shindakenyo ya malinjekela jo, hanga akapwe ni chinyingi chamwenemwene hakutwala ku chijimbikilo chisandu cha Zambi, chenacho Kristu.
3 Upite weswe wa mana ni yinyingi kuyahengama muli iye.
4 Ngunambe chino hanga niumwe kanda anwonga ni maliji a kulembejeka.
5 Mumu chipwe ngwe chishi ni yenu mu musunya, nihindu nguli hamwe ni yenu mu spiritu, ni kuwahilila ha kumona kululika chenu chipema, ni kujikiza cha ufulielo wenu muli Kristu.
6 Kashika, chizechene ngwe nwatayijile Kristu Yesu mwe Mwene, nungenu ni kwenda mukulinunga nenyi,
7 nukatande miji ni kumana nguu muli iye ni kujikiza mu ufulielo ngwe chizechene anulongesele, ni kulumbama mu kusakwilila.
8 Kanyamenu hanga mutu niumwe kanda anupwisa ndungo* kupalikila mu mana a hano hashi, ni kwonga chamokomoko yize yakukatuka mu mianda ya atu, mu yuma yamokomoko ya hano hashi, hi muli Kristu ko;
9 mumu yitanga yeswe ya Zambi, yakumanunuka muli Kristu.
10 Yenu hinunazuku yuma yeswe kupalikila muli iye, iye kali mutwe wa nguvulu mweswe ni chiyulo cheswe.
11 Mukulinunga nenyi, anupwishile ngalami hi ku moko ja atu ko, alioze anutuswile ku mujimba wa shili, mumu tuvumbi a Kristu che atamba kwapwisa ngalami.
12 Mumu anufunjile hamwe nenyi mu upapachiso wenyi, mba mukulinunga nenyi ni yenu anuhindwishile hamwe nenyi mumu lia ufulielo wenu ha ndundo ja Zambi yoze wamuhindwishile hakachi ka afu.
13 Chikwo nawa, chipwe ngwe nwapwile afu mumu lia uhenge wenu ni ulima wenu mu musunya, nihindu Zambi wanuhele mwono hamwe nenyi. Iye ku keke yenyi wakonekenene uhenge wetu weswe
14 ni kujimuna mukanda uze wapwile ni shimbi jize te jakulimika ni yetu. Iye hanauchiza ni kuuhachila ha mutondo* wa lamba.
15 Kupalikila mu mutondo wa lamba, iye wakumbile manguvulu ni akwa-kuyula ni kwapwisa funge, wevwishile sonyi kumeso ja atu eswe ni kusolola ngwenyi kapwa ni kukumba chinene hali ayo.
16 Kashika, niumwe kanda anusopesa ha yize munulia hanji mununwa, hanji hakutwala ku chiwanyino cha ha mwaka, hanji ha kakweji mwaha, hanji tangwa lia Sambata.
17 Yuma yino yili chizulie cha yize muyiza, alioze umwenemwene uli muli Kristu.
18 Kanyamenu ni waze akulikehesa wika hanga aamone kuli atu ni waze akuwayila angelo, mumu o mahasa kunukwika kutambula chawana chenu. Atu jacho kakulikwachilila wika ku yuma yize akumona ni kulinangamisa ha manyonga jo amokomoko.
19 O keshi kukakaminya kuli we mutwe, yoze kupalikila muli iye mujimba weswe wakulinunga mu manungino jawo ni mijipa. Mba Zambi kakutatwisa mujimba kupalikila muli iye.
20 Nyi nwafwile hamwe ni Kristu ha yuma yamokomoko ya hano hashi, mba mumu liaka nwakununga ni kutwama ngwe waze akulinga chihanda cha hano hashi ha kuzeyela shimbi jino ngwo:
21 “Kanda ukwata, kanda upanjika, kanda usunga,”
22 se yuma yino hanayisela ku kwonwona ha kuyilia hanji ha kuyinwa kulita ni shimbi ni malongeso ja atu?
23 Yuma yacho yakusoloka ngwe ya mana muze akuwayila kulita ni manyonga ja utu, muze akulikehesa wika hanga aamone kuli atu, muze akumwesa lamba we mujimba, alioze kuyishi ni tachi mba yihase kuzeyesa usolo wa musunya.
