Kuli A-Ngalashia 1:1-24
1 Yami Paulu, postolo hi wa kuli atu ko, hanji kupalikila muli umwe mutu, alioze wa kuli Yesu Kristu ni Zambi Tata yoze wamuhindwishile hakachi ka afu,
2 ni mandumbu waze eswe ali hamwe ni yami ku yikungulwila ya mu Ngalashia.
3 Chawana cha keke ni sambukila ya kuli Zambi Tata yetu ni ya Mwene Yesu Kristu, yikapwe hamwe ni yenu.
4 Iye walihanyine ha shili yetu hanga atupulule ku chifuchi* chino chipi kulita ni upale wa Zambi yetu kanda Tata.
5 Uhenya ukapwe kuli iye ndo ku miaka ya mutolo. Amene.
6 Ngunakomoka ha kumona chize nunehuka* ni kawashi yoze wanusanyikine ni chawana cha keke ya Kristu hanga nukaule sango jipema jeka.
7 Chapwile ngwe kuli sango jipema jeka, alioze kuli amwe waze ananupinjisa ni kuzanga kuhengesa sango jipema hakutwala kuli Kristu.
8 Kashika, chipwe ngwe umwe wa kuli yetu hanji mungelo wa mwilu, manwambulwila sango jipema jalisa ni jize twanwambulwilile, yono akashingiwe.
9 Chizechene ngwe hitwamba kulu, ngunambe nawa haliapwila ngwami: Mweswawo manwambulwila sango jipema jalisa ni jize nwatayijile, yono akashingiwe.
10 Yami chishi kufupa utayizo wa atu, alioze wa Zambi, ewa chishi kufupa kuvwisa atu kuwaha. Mumu, nyi te ndo haliapwila munguchivwisa atu kuwaha, kachi chishi kavumbi ka Kristu.
11 Mandumbu, ngunazange nunyingike ngwenu, sango jipema jize nanwambulwilile hi ja kuli atu ko;
12 mumu chajitambwile kuli mutu niumwe, chipwe kungulongesajo kuli mutu umwe, alioze kangusolwelejo kuli Yesu Kristu.
13 Kwamba pundu, hinunevu hakutwala ku yitanga yami ya kunyima mu uwayilo wa A-Yunda, muze napwile ni kuhungumiona chikolo chikungulwila cha Zambi ni kuchonwona.
14 Chikwo nawa, mu uwayilo wa A-Yunda, nasenyene chinji kulutwe kuhiana anji waze apwile ni miaka yimuwika ni yami, mumu napwile ni kulikwachilila chinji ku mianda ya yisemi jami.
15 Alioze, muze Zambi yoze wanguhandunwine chize mu jimo lia mama, ni kungusanyika kupalikila mu chawana chenyi cha keke, chamupemenene
16 kusolola Mwanenyi kupalikila muli yami, hanga ngukambujole sango jipema kuli akwa-mavungu hakutwala kuli iye, yami chakafupile chiyulo cha mutu* niumwe,
17 chipwe kuya ku Yerusaleme kuli waze aliangile kupwa apostolo, alioze nayile ku Arabia, mba kulutwe nahilukile ku Ndamaseku.
18 Mba ha kupalika cha miaka yitatu, nakandukile ku Yerusaleme ngukameneke Sefwa,* chocho yingutwama nenyi matangwa 15.
19 Alioze chamwene niumwe wa kuli apostolo akwo, shina wika Tiangu mwana-kwo ya Mwene.
20 Hakutwala ku yuma yize ngunanusonekena, ngunahanjika pundu kumeso ja Zambi ngwami, chahanjikile mahuza.
21 Kulutwe lia yuma yino, nayile mu manjiza ja Seria ni Selishia.
22 Alioze Akwa-Kristu a mu yikungulwila ya Yundeya, te kangunyingikine meso ni meso.
23 O kapwile ni kwivwa wika ngwo: “Mutu yoze te wakutuhungumiona, haliapwila kanambujola sango jipema hakutwala ku ufulielo uze apwile ni kwonwona.”
24 Mba yaputuka kuchichimieka Zambi mumu hali yami.
Footnotes
^ Hanji “ananuhandununa.”
^ Chize Alisonekene, “cha musunya ni manyinga.”
^ Yoze avuluka nawa ngwo Petulu.
