Kuli A-Ngalashia 6:1-18
6 Mandumbu, chipwe ngwe umwe mutu matalinga chakuhona kunyingika, yenu nuli ni yiteli ya ku spiritu, esekenu kukwasa mutu wacho ni spiritu ya kushimbika. Alioze, mutu ni mutu akakanyame hanga neye achine kumweseka.
2 Nungenu ni kulimbachila yilemu umwe ni mukwo, nyi nwalinga chino munumanununa shimbi ya Kristu.
3 Mumu nyi umwe malinyonga ngwe kali chuma chimwe, muze iye hi chimwe ko, kanaliongo iye mwene.
4 Alioze, mutu ni mutu akahengwole milimo yenyi mwene, chocho makalisamba wika hakutwala kuli iye mwene. Iye katambile kutesa milimo yenyi ni yize akwo akulinga.
5 Mumu mutu ni mutu makambata chiteli* chenyi mwene.
6 Chikwo nawa, mutu yoze analongesa liji, akalianyine yuma yeswe yipema ni yoze unamulongesa.
7 Kanda nulionga: Zambi keshi kuheha nenyi. Mumu cheswacho mutu makuwa, chenacho nawa makacha.
8 Mumu yoze makuwa kulita ni musunya, ku musunya kumakacha kwonwona.* Alioze yoze makuwa kulita ni spiritu, ku spiritu kumakacha mwono wa mutolo.
9 Kashika, kanda tuhonga kulinga yuma yipema, mumu mutukacha ha mashimbu alita nyi kutwakokolokele.*
10 Kashika, shimbu tuchili ni uhashi,* tulingenu yuma yipema kuli atu eswe. Alioze, chahiana ulemu kuli waze apwa usoko wetu mu ufulielo.
11 Talenu sona jinene jize ngunasoneka kuli yenu ni kwoko liami mwene.
12 Waze akuzanga kulisamba kulita ni yuma ya atu,* kapwa waze akweseka kunushinjila hanga nupwe ngalami. Ayo kakuchilinga wika hanga achine kwahungumiona mumu lia mutondo* wa lamba wa Kristu.
13 Mumu chipwe waze hanaapwisa ngalami, keshi kufunga Shimbi. Alioze kanazange anupwise ngalami hanga ayo apwe ni chitela cha kulisamba nacho mumu ha mujimba* wenu.
14 Alioze, yami kanda ngulisamba ha chuma nichimwe, shina wika muli Mwene wetu Yesu Kristu yoze wafwile ha mutondo wa lamba. Kuli yami, akwa-hashi hanafu* kupalikila muli iye, ni yami hingunafu kuli akwa-hashi.
15 Mumu kupwa ngalami hanji chilima, hi chilemu ko. Alioze, chuma chilemu chili kupwa chitangiwa chaha.
16 Sambukila ni keke yikapwe hali eswe waze akutwama* kulita ni shimbi, ewa, hali A-Izalele a Zambi.
17 Chize haliapwila, niumwe kanda angupinjisa, mumu ngunambata ha mujimba wami yimbandu yize yakusolola ngwo, nguli ndungo ya Yesu.
18 Mandumbu, chawana cha keke ya Mwene wetu Yesu Kristu yipwe hali yenu ngwe chize nwakusolola yitanga yipema. Amene.
Footnotes
^ Hanji “yilemu yenyi.”
^ Chize Alisonekene, “kupola.”
^ Hanji “nyi kutwahongele.”
^ Chize Alisonekene, “mashimbu.”
^ Chize Alisonekene, “kusoloka kanawa ku musunya.”
^ Chize Alisonekene, “ku musunya wenu.”
^ Hanji “ha mutolo wa lamba.”
^ Chize Alisonekene, “ndako.”
