Kuli A-Roma 10:1-21
10 Mandumbu jami, kuzanga cha mbunge yami ni kuliumba chami kuli Zambi chili ngwo, atu jami akaalamwine.
2 Mumu ngunashindakenya ngwami, o kakusa tachi jinji hanga alingile Zambi, alioze o kakuchilinga chakuhona kunyingika kanawa upale wenyi.
3 Amu o kanyingikine yize Zambi akumona ngwo yalita, kashika akukaula shimbi jo ene. Mumu lia chino o keshi kwononokena shimbi ja Zambi hakutwala ku yize yalita.
4 Kristu kasele songo ku Shimbi, hanga eswe waze mafuliela muli iye kumaapwisa akwa-ululi.
5 Mose kambile ngwenyi: “Mutu yoze wakulinga yuma yipema kulita ni yize Shimbi yinambe kumakapwa ni mwono.”
6 Alioze liji lia Zambi linambe hakutwala ku ululi uze wakwiza ha kusolola ufulielo ngwo: “Kanda wamba mu mbunge ye ngwe: ‘Iya yoze makazezuka mu malilu hanga akasunwise Kristu?’
7 Hanji: ‘Iya yoze makasunuka mu jondo’ hanga akahindwise Kristu mukachi ka afu?”
8 Mba yika yisoneko yinambe? “Liji lili hakamwihi ni yena mu kanwa lie ni mu mbunge ye” hanji ngwetu “liji” lia ufulielo lize tunambujola.
9 Kashika nyi mwambujola ni kanwa lie ngwe, Yesu mwe Mwene, ni kufuliela mu mbunge ye ngwe, Zambi kamuhindwishile mukachi ka afu, kumakakulamwina.
10 Mutu katamba kufuliela mu mbunge yenyi mba apwe mukwa-ululi, katamba nawa kwambujola sango jenyi mba akamulamwine.
11 Mumu chisoneko chimwe chinambe ngwo: “Niumwe yoze mafuliela muli iye makaliseha wakuhi.”
12 Mumu kulisa chakuhi hakachi ka A-Yunda ni A-Ngresia. Se eswe Mwene umuwika akwete, chikwo nawa iye kakukwasa eswe waze akumutambika.
13 Kashika, “Mweswawo yoze matambika ha jina lia Yehova* kumakamulamwina.”
14 Alioze kuchi mahasa kutambika kuli yoze kamufulielele? Kuchi mahasa kufuliela yoze kevwile sango hakutwala kuli iye? Mba kuchi mahasa kwivwa nyi mukwa-kwambujola wakuhi?
15 Chikwo nawa, kuchi mambujola nyi kaatumine? Ngwe chize chinasonewa ngwo: “Cho kuwaha molu ja waze akwambujola sango jipema ja yuma yipema!”
16 Alioze hi eswe ko ononokene ku sango jipema. Kashika Izaia asonekene ngwenyi: “Yehova,* iya yoze wafuliela ha yize twahanjika?”*
17 Ufulielo wakwiza ha kwivwa sango. Sango jakwiza kupalikila mu liji hakutwala kuli Kristu.
18 Alioze, ngunahulu hakutwala kuli A-Izalele ngwami: Shina o kakavwile sango jize nyi? Chamwenemwene hanajivu. Ngwe chize Yisoneko yinambe ngwo: “Liji lio hanalivu hashi heswe, sango jo hijinahete ku masongo ja yifuchi yeswe ya hashi.”
19 Ngunahulu nawa ngwami, shina A-Izalele kanyingikine nyi? Mose wambile chitangu ngwenyi: “Mungukanupwisa akwa-ukwa kuli atu waze hi vungu ko, mungukanushinjika kuvwila uli vungu lize kulishi mana.”
20 Izaia hanahamuka kuhiana ni kwamba ngwenyi: “Atu waze kangufupile hananguwane, hingunasoloka kuli waze kanguhulile.”
21 Alioze, hali A-Izalele kanambe ngwenyi: “Tangwa lieswe nganganga nolwele moko jami kuli atu yihulia kanda akwa-pami.”
