Kuli A-Roma 11:1-36
11 Ngunahulu ngwami: Shina Zambi hanalitunu atu jenyi nyi? Ka, hi chocho ko! Mumu yami mwene nawa nguli Ka-Izalele wa ku munyachi* wa Apalahama, vungu lia A-Mbenjamine.
2 Zambi kehukile atu jenyi waze aliangile kutongola. Shina kunwanyingikine chize chisoneko chinambe hali Eliya muze aliumbile kuli Zambi ha kulimika ni A-Izalele nyi?
3 “Yehova,* o hanashihi aprofeta jenu, hanapuzula yilumbilo yenu, yami wika ngunasala. Haliapwila kanazange kungushiha.”
4 Mba kuchi Zambi amukumbulwile? Ngwo: “Hingunalifungila tununu shimbiali (7,000) a malunga waze kaliumbile kuli Mbale.”
5 Chizechene nawa ni haliapwila. Kuli chimwe chizavu chikehe chize asakwile mumu lia chawana cha keke ya Zambi.
6 Chino chinalumbunuka ngwo, iye kaasakwile mumu lia chawana chenyi cha keke, hi mumu ko lia yize o alingile. Mumu nyi o kalingile chimwe chuma mba aasakule, chino te kuchichi kulingiwa mumu lia chawana chenyi cha keke.
7 Mba yika mutuhasa kwamba? Yuma yize A-Izalele azangile, kapwile nayo, alioze waze atongwele, yapwa nayo. Eka yakalisa mbunge.
8 Ngwe chize chinasonewa ngwo: “Zambi yaapombesa ku spiritu, meso jo keshi kumona, matwi jo keshi kwivwa ndo ha tangwa lia musono.”
9 Ndawichi neye yamba ngwenyi: “Mesa yo yipwe muheto ni chitalingiso, alimbuke aamwese lamba.
10 Meso jo akafukiwe hanga kechi kamona nichimwe, nyima jo jifumbame matangwa eswe.”
11 Haliapwila ngunahula ngwami: Muze A-Yunda atalingile, kalimbukile liakulu? Ka, hi chocho ko! Alioze mumu lia utanguko wo, atu a ku mavungu eka yazuka ulamwino. Chino yichivwisa A-Yunda ukwa.
12 Kashika, nyi utanguko wo waneha upite kuli akwa-hashi, kukeha cho chinalumbunuka upite kuli atu a ku mavungu eka. Chekwamba ngwo, yiwape muyikapwa yinji kuhiana muze A-Yunda eswe ni akwa-mavungu makapwa chimuwika!
13 Haliapwila ngunahanjika kuli yenu atu a ku mavungu eka. Amu nguli postolo wa akwa-mavungu, kashika nakulemesa mulimo wami kuli Zambi,
14 hanga ngumone nyi munguhasa kuvwisa atu jami* ukwa ni kulamwina amwe a kuli ayo.
15 Mumu muze Zambi ehukile, chino yichazulula jila kuli akwa-hashi hanga apwe ni usepa ni iye. Haliapwila, nyi iye maatayiza cheka, muchipwa ngwe kanaahindwisa mukachi ka afu.
16 Chikwo nawa, nyi kachi chihanda chitangu cha mwaha wa mbolo muchipwa chisandu, kachi mwaha weswe nawa usandu; nyi muji usandu kachi mitango nawa yisandu.
17 Mitango yimwe ya ku mutondo ya olevwe kayipatwileko, yikwo yiyisala. Alioze yena, chipwe ngwe uli muhuko wa ku mutondo wa olevwe wa mu yambu, hanakunungu ku mutondo wacho hanga ukapwe hakachi ka mitango yize yasalileko. Kashika wakuyuka ha miji ni maji a mutundo wacho.
18 Kanda unyonga ngwe uli mulemu kuhiana mitango yikwo. Nyi munyonga ngwe uli mulemu, iwuluka ngwe hi yena ko wakukwata miji, alioze miji ye yakukwata yena.
19 Amwe a kuli yenu mamba ngwo: “Mitango yimwe hanayipatula hanga anungeho yami.”
20 Ewa! Kayipatwile mumu kakafulielele, alioze yena unamana nguu mumu lia ufulielo we. Kashika kanda ulinangamisa, pwako ni woma.
21 Mumu nyi Zambi kevwilile keke mitango yitangu, ni yena nawa kechi kakuvwila keke.
22 Kashika muhasa kumona keke ni utenu wa Zambi. Iye kapwa chitenu ni atu waze keshi kunyongonona mumu lia kuhona ufulielo, alioze Zambi masolola keke kuli yena nyi mununga mu keke yenyi; nyi ka, makakupatula ngwe mutango.
23 Ni A-Yunda no nyi maputuka kusolola ufulielo, makaanunga ku mutondo mumu Zambi mahasa kwanunga cheka.
24 Mumu nyi kakupatwile ku olevwe wa mu yambu kulita ni chisemewa ni kukununga ku olevwe wa kutumba uze kuwalitele ni chisemewa, muchikapwa chashi mitango ya chisemewa kuyinunga ku mutondo kuze yakatukile!
25 Mandumbu, ngunazange nunyingike chijimbikilo chisandu hanga nuchine kunyonga ngwe nukwete mana: Chihanda chimwe cha A-Izalele yichinakalisa mbunge jo ndo haze kwoka cha atu a ku mavungu akwo muchikumbana,
26 hanga A-Izalele eswe akaalamwine. Ngwe chize chinasonewa ngwo: “Chilamwina makakatuka ku Zaione makachiza utanganyanyi weswe wa vungu lia Yakomba.
27 Uno we usendo mungukalinga no muze mungukachiza shili yeswe.”
28 Kwamba pundu, o kali akwa-kole ja sango jipema, chino chanuyukishile. Alioze, Zambi kaatongwele ni kwazanga mumu lia tulamba two.
29 Mumu yawana ni kusanyika chenyi, yili yuma yize Zambi keshi kuliseha ha kuyilinga.
30 Se kunyima, yenu te kunushi kwononokena Zambi, alioze haliapwila Zambi hananuvwila keke mumu ha uhulia wa A-Yunda.
31 Haliapwila, o keshi kwononokena kuli Zambi, mba Zambi yanuvwila keke. Alioze, no mahasa kwavwila keke ngwe chize chalingiwile kuli yenu.
32 Mumu Zambi hanapwisa atu eswe funge ku uhulia hanga akavwile eswe keke.
33 Upite, mana ni yinyingi ya Zambi, kuyajotoka! Upatwilo ni majila jenyi, niumwe mahasa kuyinyingika yeswe kanawa wakuhi!
34 Yisoneko yisandu yakwamba ngwo: “Iya mahasa kunyingika manyonga a Yehova?* Hanji, iya mahasa kumulweza yuma yalita yize iye atamba kulinga?”
35 Hanji, “iya waliangile kuhana chuma kuli Zambi mba te amufwetecho?”
36 Mumu yuma yeswe yakukatuka kuli iye, yakukola ku tachi jenyi, yakuswila muli iye. Uhenya ukapwe kuli iye ndo ku miaka ya mutolo. Amene.
Footnotes
^ Chize Alisonekene: “mbuto.”
^ Tala Apendice A5.
^ Chize Alisonekene: “musunya wami.”
^ Tala Apendice A5.
