Kuli A-Roma 15:1-33
15 Alioze yetu tuli ni ufulielo ukolo, twatamba kukwasa waze analele, hi kulivwisako yetwene kuwaha.
2 Mutu ni mutu avwise mwenyembo wenyi kuwaha ni kumulingila yipema hanga amutakamise.
3 Mumu chipwe Kristu kakaliwahishile iye mwene. Ngwe chize chinasonewa ngwo: “Yuma yize atu ambile ni kulinga hanga akuchoke, haliapwila yami anayichoko.”
4 Yuma yeswe yize yasonewene kunyima, kayisonekene yitulongese ni kutwaha kutalatala mumu ha kunyongonona chetu ni utakamiso uze Yisoneko yakutwaha.
5 Kashika, Zambi yoze wakutukwasa kunyongonona ni kututakamisa, makanukwasa kupwa ni manyonga amuwika ngwe waze Kristu apwile no,
6 hanga nukapwe alinunga ni kuhalisa Zambi Tato ya Mwene wetu Yesu Kristu.
7 Kashika, litambulenu* umwe ni mukwo ngwe chize Kristu anutambwile hanga atu akahalise Zambi.
8 Mumu ngunambe ngwami, Kristu walipwishile kavumbi ka A-Yunda mukusolola umwenemwene wa Zambi hanga akakolese yilakenyo yize alakenyene tushakulu two.
9 Yino yalingiwile hanga akwa-mavungu achichimieke Zambi mumu ha keke yenyi. Ngwe chize chinasonewa ngwo: “Mungukakuhalisa hakachi ka akwa-mavungu, mungukemba miaso ya uhaliso mu jina lie.”
10 Zambi yamba nawa ngwenyi: “Wahililenu yenu akwa-mavungu hamwe ni atu jenu.”
11 Cheka nawa ngwenyi: “Halisenu Yehova* yenu akwa-mavungu, ni atu eswe amuhalise.”
12 Izaia yamba nawa ngwenyi: “Kumukukeza mutu wa mu usoko wa Yese,* yoze makayula mavungu eswe; mavungu eswe makamujikijila.”
13 Nakulemba hanga Zambi yoze wakuhana kutalatala anuzalise ni uwahililo ni sambukila mumu nwakumufuliela. Chikwo nawa, ni ukwaso wa ndundo ja spiritu yisandu, kumunutakama mu kutalatala chenu.
14 Yami mwene nawa nguli ni shindakenyo hakutwala kuli yenu mandumbu jami ngwami, yenwene nunazala too ni yuma yipema, a too ni yinyingi yeswe, chikwo nawa, nwakuhasa kulitoweza* umwe ni mukwo.
15 Kashika nanusonekena zwalala hakutwala ku yikuma yimwe hanga nukayiwuluke cheka. Nachilinga mumu lia chawana cha keke ya Zambi yize anguhele.
16 Iye kangusolwelele chawana cha keke hanga nguhase kupwa kavumbi ka Kristu Yesu ni kwambujola sango jipema kuli akwa-mavungu eswe, mumu mulimo uno wapwa usandu. Ngunalingi mulimo wacho hanga atu akwa-mavungu ahase kupwa asandu kupalikila mu spiritu yisandu ni kwahana kuli Zambi ngwe mulambu uze wamupemena.
17 Kashika, nakuwahilila ha kupwa kambaji ka Kristu Yesu ni kulinga mulimo wa Zambi.*
18 Ami chichi kahanjika hakutwala ku chuma nichimwe chize nalingile. Alioze munguhanjika wika hakutwala ku yuma yize Kristu alingile ni yize ahanjikile kupalikila muli yami hanga ngukwase atu a ku mavungu akwo amwononokene.
19 O kononokene mumu lia yikomokeso ya ndundo ni yilayi yize yalingiwile kupalikila mu spiritu ya Zambi. Kashika nambujolwele sango jipema hakutwala kuli Kristu sali ni sali, chize ku Yerusaleme ndo ku Iliriku.
20 Nasele tachi nguhone kwambujola sango jipema ku yihela kuze jina lia Kristu te halinyingika kulu hanga nguchine kutunga ha fundamentu ya mutu mweka;
21 alioze, ngwe chize chinasonewa ngwo: “Waze kanda evwa sango jenyi makamona, waze kanda achivwa makanyingika.”
22 Yenayo yangukwikile yisuho yinji kwiza ni kunumeneka.
23 Alioze, haliapwila hinamanununa kwambujola chami mu yihela yacho, ha miaka* yinji yize nafupile kwiza ni kunumeneka.
24 Kashika, muze mungukaya ku Espanya, mu jila ngunashimbwila kunumona, mba muze mungutwamako amwe mashimbu ni yenu, munuhasa kungushinjikila yimwe ndambu mu jila.
25 Alioze, chitangu munguya ku Yerusaleme hanga ngukwase mandumbu* waze aliko.
26 Mandumbu a mu Masendoniya ni Akeya kawahilile ha kuhana yawana kuli yiswale mukachi ka atu ja Zambi mu Yerusaleme.
27 O kawahilile kuchilinga, mumu kalivwile ngwo yino ye te atamba kulinga. A-Yunda kanakalianyina yuma yipema ni akwa-mavungu yize yakukatuka kuli Zambi. Haliapwila, akwa-mavungu no katamba kwakwasa ha yize A-Yunda no mafupiwa.
28 Mba muze hinamanununa milimo yino ni kwaha yawana* yeswe yize aahele, munguya ku Espanya. Mu jila mungupalikila ku mahienu.
29 Alioze ngunanyingika ngwami, muze mungukaya ni kunumeneka, mungukaheta ni yiwape yahiana ya Kristu.
30 Ngunaliumbu mandumbu kuli yenu mu jina lia Mwene wetu Yesu Kristu, ni ku zango lize liakwiza kupalikila mu spiritu yisandu, senu tachi hamwe ni yami ha kungulembela kuli Zambi.
31 Lembenu hanga A-Yunda waze keshi kufuliela ahone kungulinga chipi, ni yawana yize ngunatwalila atu ja Zambi mu Yerusaleme akayitambule kanawa.
32 Kashika, nyi Zambi mapala, mungukaya kunumeneka ni uwahililo hanga tulitakamise eswe.
33 Zambi yoze wakuhana sambukila apwe hamwe ni yenu eswe. Amene.
Footnotes
^ Hanji “litayizenu.”
^ Tala Apendice A5.
^ Chize Alisonekene, “wa mu chikota cha Yese.”
^ Hanji “kulikanyamisa.”
^ Hanji “yuma hakutwala kuli Zambi.”
^ Kota nawa, “yimwe.”
^ Chize Alisonekene, “asandu.”
^ Chize Alisonekene, “mihuko.”
