Kuli A-Roma 16:1-27
16 Tambulenu* ndumbwetu wa pwo Febe, iye kavumbi ka chikungulwila chize chili mu Senekwea.
2 Mutambulenu kanawa mu jina lia Mwene, ngwe chize Akwa-Kristu chatamba kulinga. Mukwasenu ku yuma yeswe yize mahona, mumu iye mwene hakwasa atu anji, ni yami mwene nawa.
3 Menekenu Prisila ni Akwila, akwa milimo-ni-akwetu muli Kristu Yesu,
4 waze asele mwono wo mu ponde mumu hali yami. Ngunaasakwilila hi yami wika ko, alioze ni yikungulwila yeswe yize hi ya A-Yunda ko, no nawa kanaasakwilila.
5 Menekenu nawa chikungulwila chize chakulikungulwila mu zuwo lio. Menekenu sepa liami wa zango Epenetu, yoze wapwile mutu mutangu kufuliela Kristu mu Azia.
6 Menekenu Maria yoze wakilikichile chikolo mumu hali yenu.
7 Menekenu Androniku ni Junia usoko wami ni funge-ni-akwetu, waze ali ni lufuma hakachi ka apostolo, waze nawa aliangile kupwa tumbaji twa Kristu shimbu yami te kanda ngupwa.
8 Menekenu Amplia, sepa liami wa zango muli Mwene.
9 Menekenu Urbane mukwa-milimo-ni-mukwetu muli Kristu, ni sepa liami wa zango Estaki.
10 Menekenu Apeleshi yoze hanasolola kushishika chenyi kuli Kristu. Menekenu akwa-zuwo lia Arisetopulu.
11 Menekenu Herondione usoko wami. Menekenu akwa-zuwo lia Nasisu, waze ali tumbaji a Mwene.
12 Menekenu Trifena ni Trifosa, mapwo waze ahondanganyine mu milimo ya Mwene. Menekenu sepa liami Peresite, yoze wakilikichile chinji nawa mu milimo ya Mwene.
13 Menekenu Rufu, yoze hanasakula kuli Mwene, ni naye yoze hapwa mama kuli yami nawa.
14 Menekenu Asenekritu, ni Flegone, ni Herme, ni Patropa, ni Hermase, ni mandumbu waze ali hamwe no.
15 Menekenu Filolongu ni Julia, ni Nereu ni ndumbwenyi wa pwo, ni Olimpia, ni asandu waze ali hamwe no.
16 Limenekenu umwe ni mukwo ni mbeju yisandu. Yikungulwila yeswe ya Kristu yinanumeneka.
17 Haliapwila, ngunaliumbu kuli yenu mandumbu, kanyamenu ni waze akuhandununa Akwa-Kristu, waze akupihisa ufulielo wa akwo, ni kulimika ni longeso lize nwalilongesele. Kuli wano, kondolokenu.
18 Mumu malunga ngwe wano keshi kulingila Kristu Mwene wetu, alioze kali ndungo ja usolo wo ene,* mba ku maliji akulembejeka ni ulembekese, kakwonga mbunge ja atu alelu.
19 Atu eswe hevwa lufuma wa kwononoka chenu, ni yami ngunawahilila chinji. Kashika, ngunazange nupwe ni mana hakutwala ku yipema, alioze nupwe akwa-kusamba hakutwala ku yipi.
20 Kwasala hakehe hanga Zambi yoze wakuhana sambukila afwenye Satana kushi lia yiliato yenu. Chawana cha keke ya Mwene wetu Yesu Kristu yipwe hali yenu.
21 Timoteu mukwa milimo-ni-mukwetu hamwe ni usoko wami Lusiu, ni Yasone, ni Sosepatere, kananumeneka.
22 Yami Tersiu, ngunasoneka mukanda uno, ngunanumeneka muli Mwene.
23 Ngayu yoze wakunguzumbula, chikwo nawa wakuzumbula chikungulwila cheswe, kananumeneka. Erastu, kaselo ka limbo hamwe ni ndumbwenyi Kwartu, no kananumeneka.
24 * ——
25 Zambi mahasa kunutakamisa ni sango jipema jize nakwambujola hakutwala kuli Yesu Kristu. Sango jino kakujisolola ni kulita ni usolwelo wa chijimbikilo chize aswekele chize ku miakulwila.
26 Alioze, haliapwila hanachisolola ni kuchinyingikisa kuli akwa-mavungu eswe kupalikila mu Yisoneko ya aprofeta, kulita ni chiyulo cha Zambi wa mutolo hanga akononoke ku ufulielo.
27 Haliapwila, uhenya ukapwe kuli Zambi, mwe Zambi umuwika wa mana mu jina lia Yesu Kristu ndo ku miaka ya mutolo. Amene.
