Asonekene Luka 1:1-80
1 Atu anji kasele tachi hanga akunge ni kusoneka sango jize twakutayiza hakachi ketu,
2 ngwe chize atulwezelejo kuli waze ajimwene ni kujambujola chize ku uputukilo.
3 Kashika, ni yami nawa muze hinahengwola ni kusa shindakenyo yuma yeswe chize ku uputukilo, yichingupemena kukusonekenayo kanawa yena Teofwilu, mutu mulemu,
4 hanga upwe ni shindakenyo ha yuma yeswe yize akulongesele.
5 Ha matangwa a Heronde mwanangana wa Yundeya, kwapwile umwe sasendote te avuluka ngwo Zakaria wa mu chizavu cha Abija. Mukwo-pwo te umwe wa kuli ana ja Arone, jina lienyi te Izabele.
6 Ayo eswe aali kapwile akwa-ululi kumeso ja Zambi, keshi kapalia, mumu kendele ni kukaula kanawa shimbi jeswe ja Yehova.*
7 Alioze kakapwile ni ana, mumu Izabele te mumba, chikwo nawa, eswe aali te hapwa chinji tushinakaji.
8 Muze Zakaria te analingi mulimo wenyi wa usasendote kumeso ja Zambi ni chizavu chenyi,
9 kulita ni ndako ya usasendote yize asele, shimbu lienyi lia kulambula insensu yiliheta yanjila muma musandu mwa Yehova.*
10 Mbunga yeswe ya atu te yinalembe haze, ha ola yakulambula insensu.
11 Chocho mungelo wa Yehova* yasoloka kuli iye, te kanamana sali lia utata lia chilumbilo cha insensu.
12 Muze amumwene, Zakaria yalihulumba ni kwivwa woma unji.
13 Alioze, mungelo yamulweza ngwenyi: “Zakaria kanda wivwa woma, mumu kuliumba che hachivwa kuli Zambi, mukwenu-pwo Izabele makakushichila mwana wa lunga, mukamuluka jina ngwo, Yoano.
14 Mukevwa chiseke ni uwahililo unji, atu anji makawahilila ha kusemuka chenyi,
15 mumu iye makapwa munene kumeso ja Yehova.* Alioze, kanda akanwa vinyu chipwe walwa ukwo usasu, makazala too ni spiritu yisandu chipwe muze kanda achisemuka,
16 iye makahilwisa ana anji A-Izalele kuli Yehova,* Zambi yo.
17 Chikwo nawa, makatetekela kulutwe lia Zambi ni spiritu ni ndundo ja Eliya, hanga afunyise mbunge ja atata kuli ana, ni kukwasa yihulia hanga apwe ni mana ni kulinga yuma yalita hanga aluliekele Yehova* amwe atu.”
18 Zakaria yalweza mungelo ngwenyi: “Kuchi munguhasa kupwa ni shindakenyo ha chikuma chino? Mumu yami hinapwa kashinakaji ni mukwetu-pwo neye hakola chinji.”
19 Mungelo yamukumbulula ngwenyi: “Yami nguli Gabriele, yoze wakumana kulutwe lia Zambi, kangutuma hanga nguhanjike ni yena, ngukulweze sango jino jipema.
20 Alioze, haliapwila muopwa kanaye, kuuchi kuhanjika ndo ha tangwa lize yuma yino muyilingiwa, mumu kuwafulielele maliji jami waze makamanunuka ha shimbu lize atesele.”
21 Ha shimbu liacho, atu te kananungu ni kushimbwila Zakaria ni kukomoka mumu te kanashimbula chinji muma musandu.
22 Muze atuhukile, kahashile kuhanjika no, chocho atu yanyingika ngwo, kamona usolwelo muma musandu. Zakaria yaputuka kwalweza ni minwe, mumu te hapwa kanaye.
23 Muze hamanununa matangwa a mulimo wenyi usandu, yahiluka ku zuwo.
24 Ha kupalika cha amwe matangwa, mukwo-pwo Izabele yapwa kafumba, yaswama ha tukweji atano ni kwamba ngwenyi:
25 “Chino che Yehova* alinga hali yami matangwa wano. Iye hangunyonga kama hanga anguchize sonyi hakachi ka atu.”
26 Ha kakweji wenyi wamuchisambano, Zambi yatuma mungelo Gabriele mu yimwe mbonge ya Ngalileya yize te avuluka ngwo, Nazare,
27 kuli umwe mwana-pwo yoze te kanda achilimona ni lunga, te hamwambisa kuli umwe lunga avuluka ngwo, Yosefwe wa ku munyachi wa Ndawichi, jina lia mwana-pwo te Maria.
28 Muze mungelo hanjila kuze iye te ali, yamulweza ngwenyi: “Ngunakumeneka, yena hanawahisa kuli Zambi, Yehova* kali hamwe ni yena.”
29 Alioze iye yalipikala chinji ha maliji jacho, yafupa kunyingika ulumbunwiso wa kumeneka chacho.
30 Chocho, mungelo yamulweza ngwenyi: “Maria, kanda wivwa woma, mumu hiwapwa ni utayizo kumeso ja Zambi.
31 Tala! Mukapwa kafumba, mukasema mwana wa lunga, ukamuluke jina ngwe, Yesu.
32 Iye makapwa munene, makamuvuluka ngwo, Mwana wa mwe Chitunda, Yehova* Zambi kumakamwaha ngunja ya tato Ndawichi,
33 iye makayula akwa-zuwo lia Yakomba ku miaka yeswe, Wanangana wenyi kuuchi kahwa.”
34 Maria yamba kuli mungelo ngwenyi: “Kuchi chuma chino muchihasa kulingiwa, se kanda nguchilimona ni lunga?”
35 Mungelo yamukumbulula ngwenyi: “Spiritu yisandu muyiza hali yena, ni ndundo ja mwe Chitunda mujikuzulamina. Kashika, yoze musema makamuvuluka ngwo, musandu, Mwana wa Zambi.
36 Nyingika ngwe, usoko we Izabele akuvuluka ngwo mumba, neye makasema mwana wa lunga ku ushinakaji wenyi, yono kali kakweji wenyi wamuchisambano,
37 mumu kukushi maliji niamwe waze Zambi kechi kuhasa kumanununa.”
38 Mba Maria yamba ngwenyi: “Yami nguli ndungo wa Yehova,* chilingiwe kuli yami kulita ni maliji je.” Chocho mungelo yaya kwenyi.
39 Ha matangwa jacho, Maria yakatuka kawashi, yaya ku chifuchi cha milundu, ku yimwe mbonge ya mu Yunda,
40 yanjila mu zuwo lia Zakaria, yameneka Izabele.
41 Muze Izabele hevwa kumeneka cha Maria, mwe mwana mu jimo lienyi yatumbuka, mba Izabele yazala too ni spiritu yisandu,
42 yakololoka chikolo ngwenyi: “Zambi hakuwahisa hakachi ka mapwo, muhuko wa mu jimo lie wawaha!
43 Chino chili chiwape chinene, ha kumona naye ya Mwene wami kaneza ni kungumeneka!
44 Muze nevwa liji lia kumeneka che, mwana mu jimo liami katumbuka ni chiseke.
45 Kawaha pwo yoze wafuliela ha yuma yino, mumu yuma yeswe yize Yehova* amulweza, muyimanunuka pundu.”
46 Maria yamba ngwenyi: “Mwono wami unahalisa Yehova,*
47 spiritu yami, muyinunga ni kuwahilila muli Zambi, Chilamwina chami,
48 mumu hatala hali yami ndungo yenyi wa pwo keshi ulemu. Kukatuka musono, yisemuko yeswe kumuyikanguvuluka ngwo, kawaha,
49 mumu Mukwa-Ndundo-Jeswe, kalinga yuma yinene-yinene hali yami, jina lienyi lisandu,
50 ku chisemuko ni chisemuko, kakusolola keke kuli waze akumuvwila woma.
51 Hanalingi yuma ya ndundo ni kwoko lienyi, hanamwange waze ali ni manyonga akulizata mu mbunge.
52 Hachiza akwa-kuyula a ndundo ha ngunja jo, hanangamisa akwa-kulikehesa,
53 hakuchisa akwa-zala ni yuma yipema, alioze pichi haahilwisa mokomoko.
54 Iye heza ni kukwasa Izalele kavumbi kenyi, mumu hewuluka keke yenyi,
55 ngwe chize alakenyene kuli tulamba twetu, Apalahama ni munyachi wenyi ku miaka yeswe.”
56 Maria yatwama ni Izabele ha tukweji atatu, mba yafuna ku zuwo lienyi.
57 Tangwa lia kusema cha Izabele yiliheta, chocho yasema mwana wa lunga.
58 Enyembo ni asoko jenyi yevwa ngwo, Yehova* hamusolwela keke yinji, chocho yawahilila nenyi.
59 Ha tangwa liamuchinake, yaya ni kupwisa mwana ngalami, o yamba kumuluka jina lia tato Zakaria.
60 Alioze naye yamba ngwenyi: “Ka! Jina lienyi mulipwa Yoano.”
61 Chocho ayo yamulweza ngwo: “Kukushi usoko we niumwe yoze uli ni jina lino.”
62 Mba yahula tato ni minwe hanga ambe jina lize anazange kuluka mwana.
63 Iye yeta chihanda cha lipaya, mba yasoneka ngwenyi: “Jina lienyi Yoano.” Chocho atu eswe yakomoka.
64 Ha shimbu lizeliene, kanwa lienyi yilipakuka, limi lienyi yilitusuka, yaputuka kuhalisa Zambi.
65 Atu eswe waze te atunga nenyi yevwa woma, mba yaputuka kuhanjika yino yuma mu chifuchi cheswe cha ku milundu ya Yundeya.
66 Eswe waze ayivwile yayifunga mu mbunge, yamba ngwo: “Mwana yono makapwa iya?” Mumu kwoko lia Yehova* liapwile hali iye.
67 Mba, tato Zakaria yazala too ni spiritu yisandu, yaprofeteza ngwenyi:
68 “Yehova* Zambi ya Izalele, afumane, mumu hanyonga hali atu jenyi, ni kwanehena ulamwino.
69 Iye hatwaha chilamwina wa ndundo, wa mu usoko* wa Ndawichi, kavumbi kenyi,
70 ngwe chize ahanjikile mu makanwa ja aprofeta jenyi asandu a kushakulu,
71 hanga atulamwine kuli akwa-kole jetu ni ku moko ja waze eswe keshi kutuzanga,
72 hanga atusolwele keke yize alakenyene kuli tulamba twetu ni kwiwuluka usendo wenyi usandu,
73 shingo lize iye alishingile kuli Apalahama kalamba ketu,
74 hanga muze hatupulula kuli akwa-kole jetu, atwehe chiwape cha kumulingila mulimo usandu chakuhona woma,
75 ni ushishiko ni ululi kumeso jenyi matangwa jetu eswe.
76 Alioze, yena mwana, makakuvuluka ngwo profeta wa mwe Chitunda, mumu mukatetekela kulutwe lia Yehova* hanga ululieke majila jenyi,
77 hanga ahane kuli atu jenyi chinyingi cha ulamwino kupalikila mu ukonekeno wa shili yo,
78 mumu lia keke yinene ya Zambi yetu. Ku keke yacho, kucha cha tangwa mu chikeza kuli yetu kukatuka mwilu,
79 hanga pangu litemuke kuli waze anatwama mu milima ni mu chizulie cha kufwa, ni kusongwela molu jetu mu jila ya sambukila.”
80 Chocho mwana yakola ni kutatuka mu spiritu, yanunga mu puya ndo ha tangwa lize alisolwele hatoma kuli A-Izalele.
Footnotes
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Hanji “wa mu zuwo.”
^ Tala Apendice A5.
