Asonekene Luka 11:1-54
11 Ha shimbu limwe, Yesu te kanalembe ku chimwe chihela, muze hahwisa, umwe wa kuli tumbaji twenyi yamulweza ngwenyi: “Mwene, tulongesenu kama kulemba, ngwe chize Yoano alongesele tumbaji twenyi.”
2 Iye yaalweza ngwenyi: “Shimbu lieswe munulemba ambenu ngwenu: ‘Tata, jina lienu lipwe lisandu. Wanangana wenu wize.
3 Twehenu kama kulia chetu chize tunafupu tangwa ha tangwa.
4 Nutukonekene kama shili yetu; mumu ni yetu nawa twakukonekena yoze uli ni kongo kuli yetu. Kanda nututwala kama mu cheseko.’”
5 Mba yaalweza ngwenyi: “Achinyongenu ngwenu umwe wa kuli yenu kali ni umwe sepa, chocho maya ni kumufupa ha muchima ufuku, mamulweza ngwenyi: ‘Sepa ngwehe kama mbolo jitatu mba mungukakufunyisajo,*
6 mumu umwe sepa liami waheta haliapwila mu wenyi, yami chishi nichimwe chize mungumwaha.’
7 Alioze iye mamukumbulula muchima lia zuwo ngwenyi: ‘Kanda ungupinjisa nawa, chikolo chili cha kuyika, yami ni ana jami ha muhela tuli, chichi kuhasa kuhinduka hanga ngukwehe chimwe chuma.’
8 Ngunanulweze pundu ngwami, iye mahinduka hanga amwehe yeswe yize anafupu, hi mumu liakupwa sepa lienyi ko, alioze mumu lia kunyongonona chenyi ni hamu.
9 Kashika ngunanulweze ngwami, nungenu ni kwita mba kumakanwaha; nungenu ni kufupa mba kumunukawana; nungenu ni kungongwela mba kumakanwazulwila.
10 Mumu mweswawo meta, kumamwaha, yoze mafupa, kumawana, ni yoze mangongwela, kumamwazulwila.
11 Chisemi muka hakachi kenu, nyi mwanenyi mamwita yishi, mamwaha kapela, shimbu amwehe yishi?
12 Hanji nyi mamwita lionda, mamwaha kavwanda?
13 Kashika, nyi yenu chipwe ngwe nuli atu api, nunanyingika kuhana yuma yipema kuli ana jenu, shina Tata, yoze uli mu malilu, kechi kuhana spiritu yisandu kuli waze mamwita nyi?”
14 Ha kupalika cha amwe mashimbu, yatuhwisa ndemoniu kamama kuli umwe mutu. Muze ndemoniu hatuhuka, kamama yahanjika, mbunga yakomoka.
15 Alioze, amwe yaputuka kwamba ngwo: “Kakutuhwisa andemoniu ni ukwaso wa Mbelezepu, mwata wa andemoniu.”
16 Alioze, akwo mba amweseke, yaputuka kumwita chilayi cha mwilu.
17 Yesu ha kunyingika manyonga jo, yaamba ngwenyi: “Wanangana weswe walihandununa wene wakunonga, ni zuwo lieswe lialihandununa liene kuliakupuzuka.
18 Chizechene nawa, nyi Satana malihandununa mwene, kuchi wanangana wenyi muukola? Mumu yenu nunambe ngwenu, nakutuhwisa andemoniu ni ukwaso wa Mbelezepu.
19 Nyi yami nakutuhwisa andemoniu ni ukwaso wa Mbelezepu, mba ana jenu ni ukwaso waya akutuhwisa andemoniu? Kashika ayo makanusopesa.
20 Alioze, nyi nakutuhwisa andemoniu ni ukwaso wa munwe wa Zambi, pundu lume, Wanangana wa Zambi hiuneza kuli yenu.
21 Muze mutu yoze chitakame, unalipakata kanawa yitwa, mafunga zuwo lienyi, yikumba yenyi yakupwa yakufunga kanawa.
22 Alioze, nyi mutu yoze uli ni tachi jinji kuhiana iye meza, mamukumba, mamutambula yitwa yenyi yeswe yize akujikijila, matetela akwo yuma yize amutambula.
23 Mutu yoze keshi sali liami, kali mukwa-kole yami, yoze keshi kukunga hamwe ni yami, kakumwanga.
24 “Muze spiritu ya luchisa yakutuhuka muli mutu, yakupalika mu puya ni kufupa chihela haze muyihwimina, muze kuyishi kuwana chihela nichimwe, yakwamba ngwo: ‘Munguhiluka mu zuwo liami muze natuhukile.’
25 Muze muyiheta, muyiwana zuwo liacho lia kukomba, lia kululieka kanawa.
26 Chocho, muyiya ni kusaka maspiritu akwo shimbiali, api chinji kuhiana iye. Muze muyinjila, muyitungamo; mba kutwama cha yono mutu muchipiha chinji kuhiana ku uputukilo.”
27 Shimbu te machihanjika yuma yino, umwe pwo hakachi ka mbunga yakalumioka ngwenyi: “Kuliawaha jimo lize lianumbachile ni mele waze anupapishile!”
28 Chocho Yesu yamukumbulula ngwenyi: “Ka, alioze kawaha waze akwivwa liji lia Zambi ni kulikaula!”
29 Muze mbunga ya atu te analikungulula, iye yaputuka kwamba ngwenyi: “Chisemuko chino chili chisemuko chipi. Chakufupa chilayi, alioze nichimwe chilayi kechi kaahacho, shina wika chilayi cha Yona.
30 Mumu ngwe chizechene Yona apwile chilayi kuli A-Ninive, Mwana-mutu neye che makapwa ku chisemuko chino.
31 Mwazovu wa ku sule makamuhindwisa ha tangwa lia upatwilo hamuwika ni atu a chisemuko chino, makaahisa, mumu iye kakatukile kusuku hanga aye ni kwivwa maliji a mana ja Solomone. Alioze talenu! Mutu munene wahiana Solomone kali hano.
32 Atu a ku Ninive makahinduka ha tangwa lia upatwilo hamuwika ni chisemuko chino, makachihisa, mumu kanakalikonyeka ha yize Yona anakambujola. Alioze talenu! Mutu munene wahiana Yona kali hano.
33 Muze atu akukwachisa ndeya, keshi kuyisweka chipwe kuyifuka, alioze kakuyisa helu lia mesa hanga waze manjila amone pangu.
34 Ndeya ya mujimba, yili liso. Nyi liso lie mulimona kanawa, mujimba we weswe muupanguka; alioze nyi liso lie lipi, ni mujimba we newo muupwa mu milima.
35 Kashika, kanyama hanga pangu lize lili muli yena lihone kupwa milima.
36 Alioze, nyi mujimba we weswe muupanguka chakuhona chihanda nichimwe chili ni milima, mujimba we weswe wa muundu muupanguka chinji, ngwe chize ndeya yakupanguka hanga yikwehe pangu.”
37 Muze te hahwisa kuhanjika yuma yino, umwe Ka-Fwariseu yamwita hanga alie nenyi hamuwika. Chocho, Yesu yanjila yatwama ku mesa.
38 Alioze, Ka-Fwariseu yakomoka hakumona Yesu kanali shimbu kanda achisana ku moko.
39 Alioze Mwene yamulweza ngwenyi: “Yenu A-Fwariseu nwakukosa haze lia musenge ni haze lia longa, alioze mu mbunge jenu munazale too ni kuzo ni yuma yipi.
40 Yihepuke! Yoze watangile haze mwe watangile nawa muchima, hi chocho ko?
41 Muze munuhana yawana kuli yiswale, hanenu yize yineza muchima, mba yuma yenu yeswe muyipwa yitoma.
42 Alioze lamba lienu, yenu A-Fwariseu, mumu nwakuhana chihanda cha muchikumi cha kambumba ni cha aluta, ni cha yilima-lima yikwo yeswe, alioze nwakulengulula ululi ni zango lia Zambi! Yuma yino ye kachi nwatamba kulinga, alioze chakuhona kulelesa yikwo.
43 Lamba lienu, A-Fwariseu, mumu nwakuzanga yitwamo ya kulutwe mu masunangonga ni kunumeneka ha yitanda!
44 Lamba lienu, mumu nuli ngwe mafuka waze keshi kusoloka, atu kakwaliata chakuhona kunyingika!”
45 Mba umwe wa kuli waze anyingika kanawa Shimbi yamukumbulula ngwenyi: “Longeshi, ha kwamba yino yuma, ni yetu unatusaula.”
46 Iye yamba ngwenyi: “Lamba lienu, ni yenu nwanyingika kanawa Shimbi, mumu nwakutwika akwenu yiteli yilemu, alioze yenwene kunushi kuhasa kuyisunga chipwe ni munwe umuwika!
47 “Lamba lienu, mumu nwakutunga mafuka ja aprofeta, alioze tulamba twenu e aashihile!
48 Pundu lume, yenu nuli yela ja yitanga ya tulamba twenu, chipwe chocho, nwakuyitayiza, mumu ayo kashihile aprofeta, alioze yenu nwakutunga mafuka jo.
49 Kashika mana ja Zambi ambile nawa ngwo: ‘Mungwatumina aprofeta ni apostolo, mba maashiha, ni kuhungumiona amwe a kuli ayo,
50 hanga afwetese chisemuko chino manyinga ja aprofeta eswe waze ashihile chize ku uputukilo wa hashi,
51 chize ku manyinga ja Abele ndo ku manyinga ja Zakaria, yoze ashihile hakachi ka chilumbilo ni tembele.’ Ewa, ngunanulweze ngwami, manyinga jo kumakaafwetesa ha chisemuko chino.
52 “Lamba lienu, yenu nwanyingika kanawa Shimbi, mumu hinwachiza sapi ja chinyingi. Yenwene kunwanjilile, alioze nunakwika waze ananjila!”
53 Chocho, muze Yesu atuhukile mu zuwo, alongeshi a shimbi ni A-Fwariseu yaputuka kumushinjila chikolo ni kumuhula yihula yikwo yinji,
54 te kanamutela miheto hanga ahanjike chipwe liji limuwika mba amone chize mamusuma mulonga.
Footnotes
^ Chize Alisonekene, “ngulevwalise.”
