Asonekene Luka 13:1-35
-
Kulikonyeka hanji kufwa (1-5)
-
Chishima cha mutondo wa vinyu uze ushi kwima (6-9)
-
Pwo te ukwete kunda yamuwuka lia Sambata (10-17)
-
Chishima cha luchichi wa mosetate ni cha futunwiso (18-21)
-
Ndo kusa tachi mba tunjile ku chikolo chikepe (22-30)
-
Heronde, “mukuza yoze” (31-33)
-
Yesu yalinyenga mumu lia Yerusaleme (34, 35)
13 Ha shimbu liacho, atu amwe waze apwileho yamulweza hakutwala kuli A-Ngalileya waze Pilatu achingile manyinga jo ni yitapo yo.
2 Yesu yaakumbulula ngwenyi: “Shina nunanyongo ngwenu, A-Ngalileya jacho kapwile chinji yivulumunyi kuhiana A-Ngalileya eswe, mumu lia lamba lize ayo amwene?
3 Ngunanulweze ngwami ka, alioze nyi kunwalikonyekene, yenu eswe kumakanunongesa chizechene.
4 Nyi hanji nunanyongo ngwenu waze 18 afwile muze kaposhi wa Sailome waapuzukilile, kapwile ni shili yinji kuhiana atu eswe waze atunga mu Yerusaleme?
5 Ngunanulweze ngwami ka, alioze nyi kunwalikonyekene, yenu eswe kumakanunongesa ngwe chizechene aanongesene ayo.”
6 Mba yaatela chishima chino ngwenyi: “Umwe mutu kapwile ni mukuyu wa kutumba mu munda wenyi wa vinyu, yaya ni kutalako nyi kuli mihuko, alioze kawanyineko muhuko niumwe.
7 Chocho yalweza njimi yenyi ngwenyi: ‘Hineza miaka yitatu ni kufupa mihuko ku mukuyu uno, alioze chishi kuwana muhuko niumwe. Kashika, upatule! Mumu liaka unapihisa mavu?’
8 Alioze njimi yamukumbulula ngwenyi: ‘Mwene, achiweche kama nawa ha mwaka umuwika. Mungufula wina ku sesa ni kusako pinga.
9 Nyi muukema mihuko kulutwe, chinapeme, nyi ka, mukaupatula.’”
10 Yesu te kanalongesa mu yimwe sunangonga ha tangwa lia Sambata.
11 Mwapwile umwe pwo yoze wapwile ni spiritu yipi, yize te yakumuyijisa ha miaka 18, te kahenga nyima, keshi kuhasa kuhetuka chipwe hakehe.
12 Muze Yesu amumwene, yamulweza ngwenyi: “Pwo, hiwatusuka ku musongo we.”
13 Yesu yasayika moko hali iye, hazehene pwo yoloka, yaputuka kuhalisa Zambi.
14 Hachino, kasongo wa sunangonga yevwa kupiha, mumu Yesu kaukile mutu ha tangwa lia Sambata. Mba yamba kuli mbunga ngwenyi: “Kuli matangwa asambano waze atu atamba kukalakala, kashika, tweyenu ha matangwa jacho hanga anuuke, hi ha tangwa lia Sambata ko.”
15 Alioze, Mwene yamukumbulula ngwenyi: “Yilembekese, ngwami mutu mweswe wa kuli yenu ha tangwa lia Sambata, kakukasulula ngombe yenyi hanji chimbulu chenyi hanga amutwale anwe meya?
16 Mba pwo yono, mwana wa Apalahama, akashile kuli Satana ha miaka 18, kuma kuchatambile kumukasulula ha tangwa lia Sambata?”
17 Muze Yesu ambile maliji wano, akwa-kole jenyi eswe yevwa sonyi, alioze mbunga yeswe yawahilila ha yuma yeswe ya uhenya yize iye apwile ni kulinga.
18 Chocho yanunga ni kwamba ngwenyi: “Wanangana wa Zambi walifwa ni yika? Ni yika munguhasa kuutesa?
19 Uli ngwe luchichi wa mosetate, yoze mutu anjile ni kumutumba mu munda wenyi. Luchichi yakola yapwa mutondo unene, mba tujila a mwilu yatunga yaswa ku mitango yawo.”
20 Cheka nawa, yamba ngwenyi: “Ni yika mungutesa Wanangana wa Zambi?
21 Unalifu ni futunwiso yize umwe pwo anjile, yayichinga mu jongo* jinene jitatu ja wunga wa mbolo, ndo haze wunga weswe wafutunukine.”
22 Yesu yendangana mu mbonge ni mbonge, chihunda ni chihunda, ni kulongesa muze te anayi ku Yerusaleme.
23 Umwe lunga yamulweza ngwenyi: “Mwene, shina waze malamwina kali akehe?” Yesu yamukumbulula ngwenyi:
24 “Senu tachi jinji hanga nunjile ku chikolo chikehe, mumu ngunanulweze ngwami, anji makafupa kunjilamo, alioze kechi kahasa.
25 Muze mwenya-zuwo makatuka ni kwajila ku zuwo, yenu munukasala haze ni kungongwela ku chikolo ngwenu: ‘Mwene, twazulwile kama.’ Alioze, iye makanukumbulula ngwenyi: ‘Chanyingikine kuze nunakatuka.’
26 Hohene, munukaputuka kwamba ngwenu: ‘Twalile ni kunwa kumeso jenu, atulongesele mu matapalo anene-anene.’
27 Alioze, iye makanulweza ngwenyi: ‘Chanyingikine kuze nunakatuka. Katukenu kuli yami, yenu eswe nwakulinga yuma yipi!’
28 Kwenako munukalilila mbimbi ni kulikeleketa ku mazo, muze munumona Apalahama, Izake, Yakomba ni aprofeta eswe mu Wanangana wa Zambi, alioze yenu munukapwa akumbila haze.
29 Chikwo nawa, atu makakatuka ku chivumbuko ni ku chitokelo, ku uto ni ku sango, mba meza ni kutwama ku mesa mu Wanangana wa Zambi.
30 Nyingikenu ngwenu, kuli atu akasula waze makapwa atangu, ni atangu waze makapwa akasula.”
31 Ha mashimbu waze ene, amwe A-Fwariseu yakundama kuli iye, yamulweza ngwo: “Katuka kuno, yako kwe, mumu Heronde kanafupu kukushiha.”
32 Yesu yaakumbulula ngwenyi: “Yeenu nulweze mukuza yoze ngwenu: ‘Tala! Ngunatuhwisa andemoniu ni kuuka atu, musono ni hamene, mba ha tangwa liamuchitatu munguhwisa.’
33 Kashika, natamba kununga musono, hamene ni hamene-lia-lize, mumu profeta katambile kumushihila haze lia Yerusaleme.
34 Yerusaleme, Yerusaleme, yena mukwa-kushiha aprofeta ni kwasa mawe kuli waze akukutumina. Yisuho yingahi nazangile kukunga ana je, ngwe chize kasumbi akukunga ana jenyi mushi lia mapulwa! Alioze yenu kunwatayijile.
35 Haliapwila, zuwo lienu makalihichika. Ngunanulweze ngwami: Kunuchi kangumona ndo ni haze munukamba ngwenu: ‘Kawaha yoze uneza mu jina lia Yehova!’”*
