Asonekene Luka 14:1-35
14 Ha shimbu limwe, iye yaya ni kulia ku zuwo lia umwe mwata wa A-Fwariseu ha tangwa lia Sambata, ayo yaputuka kumutala chinji.
2 Umwe mutu wayiza musongo wa ndondo, te kanamana kulutwe lienyi.
3 Hazehene, Yesu yahula akwa-kunyingika kanawa Shimbi ni kuli A-Fwariseu ngwenyi: “Shina chinalite ni shimbi kuuka ha Sambata?”
4 Alioze, ayo yahola kuluu. Hachino, iye yakwata mutu wacho, yamuuka, yamulweza hanga aye kwenyi.
5 Mba yaalweza ngwenyi: “Iya, hakachi kenu nyi mwanenyi hanji ngombe wenyi maholokela mu wina ha tangwa lia Sambata, kechi kumuchizamo hazehene?”
6 Ayo yahola kuluu.
7 Muze hamona ngwenyi atu kanasakula yitwamo ya kulutwe, yaatela chimwe chishima. Yamba kuli ayo ngwenyi:
8 “Muze umwe makusanyika ku chiwanyino cha umbachiso, kanda utwama ha chitwamo cha kulutwe. Hanji kasanyikanga nawa mutu mulemu chinji kuhiana yena.
9 Mba yoze wanusanyikanga yenu eswe aali, meza kuli yena ni kwamba ngwenyi: ‘Hana chitwamo achi kuli lunga yono.’ Mba muwivwa sonyi ha kuya ni kutwama ha chitwamo cha ku songo.
10 Alioze, muze makusanyika, twama ha chitwamo cha ku songo, hanga muze mutu yoze wakusanyikanga maheta, ambe ngwenyi: ‘Mukwetu, yako utwame ha chitwamo cha ulemu.’ Hohene mba muopwa ni ulemu kumeso ja atu waze unatwama no ku mesa.
11 Mumu mweswe yoze malinangamisa, makamulelesa, yoze malikehesa, makamunangamisa.”
12 Mba Yesu yamba nawa kuli yoze wamusanyikine ngwenyi: “Muze mufupa kusanyika umwe mutu hanga eze ni kulia ha chingoloshi hanji ufuku, kanda usanyika masepa je, chipwe mandumbu je, chipwe asoko je, chipwe enyembo je pichi. Kuchina, hanji no makakusanyika hanga akufwete.
13 Alioze muze mululieka chiteleka, sanyika yiswale, yitonji, yilema ni tupuputa;
14 mba muwahilila, mumu ayo keshi ni chize makufweta. Alioze, mukatambula fweto muze Zambi makahindwisa akwa-ululi.”
15 Umwe wa kuli waze asanyikineho, muze hevwa yuma yino, yamwamba ngwenyi: “Kawaha yoze makalia chiteleka mu Wanangana wa Zambi.”
16 Yesu yamulweza ngwenyi: “Umwe mutu, yasanyika atu anji ku chiteleka chinene chize aluliekele.
17 Muze ola ya chiteleka yahetele, yatuma ndungo yenyi hanga alweze atu waze asanyikine ngwenyi: ‘Tweyenu, yuma yeswe hiyapwa kululieka.’
18 Alioze, ayo eswe yafupa jila yakuliongelamo. Mutangu yamba ngwenyi: ‘Ngunakalanda munda, natamba kuya hanga nguutale. Ngukonekene.’
19 Mukwo yamba ngwenyi: ‘Ngunakalanda ngombe kumi, ngunayi ngwahengwole hanga ngunyingike nyi kali kanawa. Ngukonekene.’
20 Mweka yamba ngwenyi: ‘Haliapwila lume nambata, kashika chichi kuhasa kuya.’
21 Chocho, ndungo yafuna, yalweza yuma yino kuli mwata wenyi. Mwenya-zuwo yevwa uli, yalweza ndungo ngwenyi: ‘Yako kawashi mu matapalo anene-anene ni mu majila akehe-akehe a mu chihunda, hanga unehe kuno yiswale, yilema, tupuputa ni yitonji.’
22 Mba ndungo yamba ngwenyi: ‘Mwata, hinalinga yize nwamba, alioze nihindu kuchili yihela.’
23 Chocho mwata yalweza ndungo ngwenyi: ‘Yako mu matapalo ni mu majila, shinjila atu anjile hanga zuwo liami lizale.
24 Pundu ngunanulweza ngwami, niumwe wa kuli atu waze nasanyikine makalia chiteleka chami wakuhi.’”
25 Mbunga yinene te yinayi mu wenyi hamwe nenyi, mba iye yatewuluka yaalweza ngwenyi:
26 “Nyi mutu meza kuli yami, alioze kechi kuvwila kole tato, naye, mukwo-pwo, ana jenyi, mandumbu jenyi a malunga, mandumbu jenyi a mapwo, ewa, chipwe lume mwono wenyi, kechi kuhasa kupwa kambaji kami.
27 Yoze kechi kumbata mutondo wenyi wa lamba ni kungukaula, kechi kuhasa kupwa kambaji kami.
28 Chakutalilaho, iya hakachi kenu, nyi kanazange kutunga kaposhi, chitangu kechi kutwama hanga alule ndando, amone nyi kali ni mbongo jinakumbana ja kumuhwisa, nyi ka?
29 Nyi ka, iye masa fundamentu, alioze kechi kuhasa kumuhwisa, mba atu eswe waze mapalika, ha kuchimona maputuka kumuseha,
30 ni kwamba ngwo: ‘Wolo-o! Lunga yono kanakaputuka kutunga, alioze kahashile kuhwisa.’
31 Hanji mwanangana muka, shimbu kanda achiya ni kwasa jita ni mwanangana mukwo, kechi kulianga kutwama hanga amone nyi mahasa kwasa jita ni 10,000 a maswalale, ni kukumba mukwa-kole yenyi yoze uli ni 20,000 a maswalale?
32 Nyi mamona ngwenyi kechi kuhasa, matuma tunganda kuli mwanangana wacho, hanga alinge usendo wa sambukila shimbu iye uchili kusuku.
33 Chizechene nawa, nyingikenu ngwenu, mweswawo wa kuli yenu yoze kahichikile yikumba yenyi yeswe, kechi kuhasa kupwa kambaji kami.
34 “Chamwenemwene, mungwa uli upema. Alioze, nyi muusamuka, kuchi mahasa kufunyisa kuyema chawo?
35 Kuuchi kukwasa chipwe mu mavu, chipwe mu pinga, atu kakuumbila. Mweswe uli ni matwi a kwivwa, evwe.”
