Asonekene Luka 2:1-52
2 Ha matangwa jacho Sesare Augustu yahana shimbi hanga atu eswe a mu wanangana* wenyi alisonekese.
2 (Kulisonekesa chino chitangu chalingiwile muze Kirinu apwile nguvulu wa Seria.)
3 Atu eswe yaya ni kulisonekesa, mutu ni mutu mu mbonge yenyi.
4 Yosefwe neye yakatuka ku Ngalileya mbonge ya Nazare, yakanduka ku Yundeya ku mbonge ya Ndawichi yize avuluka ngwo Mbeteleme, mumu neye te mukwa-zuwo ni munyachi wa Ndawichi.
5 Yaya ni kulisonekesa ni Maria mukwo-pwo, yoze ambachile ngwe chize amulakenyene, yoze te kwasala hakehe hanga ashite.
6 Muze te ali kuzekwene, ola ya kushita yiyiheta.
7 Chocho yashita mwanenyi mutangu wa lunga, yamuvunga ha mahina, yamupombesa mu chililo, mumu kakawanyine chihela mu zuwo lia kutambwila ngeji.
8 Mu chifuchi chacho mwapwile nawa tufunga waze te anafungu mapanga jo haze ufuku.
9 Susumuku, mungelo wa Yehova* yasoloka kuli ayo, uhenya wa Yehova* yiupanguka haze te ali, chocho yevwa woma unji.
10 Alioze mungelo yaalweza ngwenyi: “Kanda nwivwa woma, mumu neza hanga ngunwambulwile sango jipema ja uwahililo unene uze atu eswe makapwa nawo.
11 Mumu musono kanusemena chilamwina, mu mbonge ya Ndawichi, iye Kristu, Mwene.
12 Chino muchipwa chilayi kuli yenu: Munuwana mwana-kemba wakuvunga ha mahina kanapombo mu chililo.”
13 Mba susumuku yikupwa hamwe ni mungelo wacho yizavu ya tujita twa mwilu, kanahalisa Zambi ngwo:
14 “Uhenya kuli Zambi mwilu mwahiana, sambukila hano hashi hakachi ka atu waze ali ni utayizo wenyi.”
15 Hazehene, muze angelo hahiluka mwilu, tufunga yaputuka kwamba kuli umwe ni mukwo ngwo: “Tuyenu haliapwila ku Mbeteleme, hanga tutale yize yalingiwako kulita ni yize Yehova* hatunyingikisa.”
16 O yaya kawashi, yawana Maria ni Yosefwe ni mwe mwana-kemba kanapombo mu chililo.
17 Muze hamumona, yalumbununa yuma yize evwanga hakutwala kuli mwana.
18 Atu eswe yakomoka chinji ha kwivwa yuma yize alwezele kuli tufunga,
19 alioze Maria yaputuka kufunga maliji jacho eswe ni kwanyonga mu mbunge yenyi.
20 Mba tufunga yafuna ni kuchichimieka ni kuhalisa Zambi, mumu lia yuma yeswe yize hevwa ni yize hamona, ngwe chizechene lume aalwezele.
21 Ha kupalika cha matangwa nake, muze tangwa lia kumupwisa ngalami liahetele, yamuluka jina ngwo, Yesu, jina lize mungelo amulukile shimbu naye te kanda achimita.
22 Chikwo nawa, muze matangwa a kwapemesa ahetele kulita ni Shimbi ya Mose, ayo yatwala Yesu ku Yerusaleme hanga amusolole kuli Yehova,*
23 ngwe chize hanasoneka mu Shimbi ja Yehova* ngwo: “Tupula majimo eswe a malunga katamba kwavuluka ngwo, asandu a Yehova.”*
24 Chocho yahana mulambu kulita ni yize hanambe mu Shimbi ja Yehova* ngwo: “Tutele aali hanji ana a membe aali.”
25 Mu Yerusaleme mwapwile umwe lunga avuluka ngwo Semone; lunga mukwa-ululi, mukwa-kuvwila Zambi woma, te kakushimbwila tangwa lize maneha ulembejeko kuli A-Izalele, spiritu yisandu yapwile hali iye.
26 Chikwo nawa, katambwile usolwelo wa Zambi kupalikila mu spiritu yisandu ngwo, kechi kufwa ndo muze mamona Kristu wa Yehova.*
27 Chocho, ni ukwaso wa ndundo ja spiritu, yaya mu tembele, mba muze yisemi anjilile ni mwe mwana-kemba Yesu hanga amulinge kulita ni ndako ya Shimbi,
28 Semone yakwata mwana, yamusa mu kondo, yahalisa Zambi ni kwamba ngwenyi:
29 “Haliapwila, Mwanangana Munene, uneche ndungo ye hanga aye ni sambukila kulita ni maliji jenu,
30 mumu meso jami hamona jila yize munehenamo ulamwino,
31 yize hiwalulieka kumeso ja atu eswe,
32 pangu lize mulichiza hina ha meso ja akwa-mavungu ni kuneha uhenya kuli atu je A-Izalele.”
33 Yosefwe ni Maria kapwile ni kukomoka ha yuma yize atu apwile ni kwamba hali mwe mwana-kemba.
34 Chikwo nawa, Semone yaawahisa, yalweza Maria naye ya mwana ngwenyi: “Tala! Mwana yono hanamuse hanga alimbwise ni kukatwisa atu anji mu Izalele, makapwa nawa chilayi chize makalengulula,
35 (alioze yena, mukwale usuku muukakutuwa), hanga manyonga ja mbunge ja atu akasoloke hatoma.”
36 Kwapwile nawa umwe profeta wa pwo, jina lienyi Ana, mwana wa Fwanwele wa ku vungu lia Ashe. Pwo wacho te hapwa chinji kashinakaji, katwamine ni mukwo-lunga miaka shimbiali chize ku umbachiso wo,
37 iye te tuliwa, chikwo nawa, kapwile ni miaka 84. Te kakuya mashimbu eswe ku tembele ni kulinga mulimo usandu ufuku ni mwalwa, ni kulitwamina kulia ni kuliumba.
38 Ha ola yizeyene yakundama hakamwihi, yaputuka kusakwilila Zambi ni kuhanjika hakutwala kuli mwe mwana kuli atu eswe waze apwile ni kushimbwila utuswilo wa Yerusaleme.
39 Muze ayo halinga yuma yeswe kulita ni Shimbi ya Yehova,* yahiluka ku Ngalileya mu mbonge yo, ku Nazare.
40 Mwe mwana yanunga ni kukola, yajikiza ni kuzala too ni mana, yanunga ni utayizo wa Zambi.
41 Miaka yeswe yisemi jenyi te kakuya ku Yerusaleme ha chiwanyino cha Chizomboka.
42 Muze te Yesu hapwa ni miaka 12, ayo yakanduka ku Yerusaleme kulita ni ndako ya chiwanyino.
43 Muze chiwanyino chahwile, ayo yahiluka, Yesu yasala ku Yerusaleme, alioze yisemi jenyi te kachinyingikine.
44 Ayo yanyonga ngwo Yesu kali mu chizavu chize analingi nacho wenyi, yenda tangwa liamuwundu, mba yaputuka kumufupa mukachi ka usoko ni enyembo jo.
45 Alioze, amu kamuwanyine, yahiluka ku Yerusaleme, yamufupa chinji.
46 Ha kupalika cha matangwa atatu, yamuwana mu tembele kanatwama mukachi ka alongeshi, kanaapanjika ni kwahula yihula.
47 Alioze, atu eswe apwile ni kumupanjika, kapwile ni kukomoka ha malinjiekela ni makumbululo jenyi.
48 Chocho, yisemi jenyi yakomoka muze amumwene, mba naye yamba ngwenyi: “Mwanami mumu liaka watulinga chuma chino? Yami ni tatenu te tunakufupa chinji ni kulipikala.”
49 Alioze, iye yaakumbulula ngwenyi: “Mumu liaka te nunangufupu? Kunwanyingikine ngwenu natamba kupwa mu zuwo lia Tata?”
50 Alioze, o kevwile ulumbunwiso wa yize ambile.
51 Chocho, iye yafuna no ku Nazare, yanunga ni kwononokena. Chikwo nawa, naye yafunga kanawa maliji wano eswe mu mbunge yenyi.
52 Yesu yanunga ni kutatuka ku mujimba, ku mana ni ku utayizo wa Zambi ni wa atu.
Footnotes
^ Chize Alisonekene, “atu a hashi heswe.”
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
