Asonekene Luka 3:1-38
3 Ha mwaka kumi ni wamuchitano wa kuyula cha Tiperiu Sesare, muze Ponshu Pilatu te akuyula Yundeya, Heronde te akuyula mu Ngalileya, mwana-kwo Fwilipe mu chifuchi cha Itureya ni cha Trakonite, Lisane te akuyula Apiliniya,
2 ha matangwa ja sasendote wa lutwe Anase ni Kayafwa, liji lia Zambi yiliza kuli Yoano, mwana wa Zakaria mu puya.
3 Chocho, Yoano yendangana mu chifuchi cheswe cha jingilika Yordau, ni kwambulwila atu hakutwala ku upapachiso ngwe chilayi cha kulikonyeka mba Zambi akonekene shili yo,
4 ngwe chize hanachisoneka mu mukanda wa profeta Izaia ngwo: “Liji lia umwe mutu linakololoka mu puya ngwo: ‘Luliekenu jila ya Yehova!* Lulamisenu matapalo jenyi.
5 Mingulunga yeswe ndo ayishikile, milundu yeswe ni mindundena katamba kuyishikumuna; majila ahenga ndo kwalulamisa, majila api ndo asalame;
6 ni atu eswe makamona ulamwino wa Zambi.’”
7 Chocho, Yoano yamba kuli mbunga waze te aneza kuli iye hanga aapapachise ngwenyi: “Yenu ana ja yihili, iya wanulweza ngwenu munuhasa kuchina upatwilo uze muukeza?
8 Kashika, sololenu mu yitanga yenu ngwenu nwalikonyeka. Kanda nulisamba ngwenu: ‘Tuli ana ja Apalahama.’ Pundu ngunambe kuli yenu ngwami, Zambi mahasa kwalumuna mawe wano hanga apwe ana ja Apalahama.
9 Njimbu ku miji ya mitondo yili. Kashika, mutondo weswe uze kuushi kwima mihuko yipema, makaupatula ni kuukonga mu kahia.”
10 Mbunga yamuhula ngwo: “Mba yika twatamba kulinga?”
11 Yaakumbulula ngwenyi: “Yoze uli ni yikuto yaali, ahane kuli yoze keshi nacho, ni yoze uli ni kulia alinge chizechene.”
12 Chipwe akwa-kufwetesa lijimu yeza hanga aapapachise, yamuhula ngwo: “Longeshi, yika twatamba kulinga?”
13 Iye yaamba ngwenyi: “Kanda nufwetesa kuhiana lijimu lize hanatese.”
14 Maswalale no yamuhula ngwo: “Yika twatamba kulinga?” Iye yaakumbulula ngwenyi: “Kanda nupinjisa mutu niumwe, chipwe kuliongela niumwe, alioze wahililenu ni fweto yenu.”
15 Amu atu apwile ni kushimbwila Kristu, kashika yaputuka kunyonga mu mbunge jo hakutwala kuli Yoano ngwo: “Shina yono mwe Kristu?”
16 Yoano yakumbulula atu eswe ngwenyi: “Yami ngunanupapachisa ni meya, alioze yoze meza kananguhiana chikolo, chishi ni ulite wa kukasulula muya wa sapato jenyi. Iye makanupapachisa ni spiritu yisandu ni kahia.
17 Chifujilo mu kwoko lienyi chili, hanga ahandunune tiliku ni mwambu ni kupemesa kanawa chizungwilo chenyi, tiliku yenyi makayikungila mu chila, alioze mwambu makawocha mu kahia kaze kechi kahasa ku kajima.”
18 Yoano kahanyine nawa yiyulo yikwo yinji, yanunga ni kwambujola sango jipema kuli atu.
19 Alioze, kapwile ni kutoweza nguvulu Heronde mumu lia Herondeya pwo lia mwana-kwo ni ha yuma yeswe yipi yize iye alingile.
20 Ha yuma yino yeswe yipi, Heronde yawezelaho nawa yikwo: Yasa Yoano mu zuwo lia ususu.
21 Mba muze hapapachisa atu eswe, Yesu neye yamupapachisa. Muze te analembe, lilu yiliazuluka,
22 spiritu yisandu yiyihulumuka hali iye ni mujimba ngwe liembe, chocho liji yilituhuka mu malilu ngwo: “Yena uli Mwanami, yoze nazanga chinji; muli yena ngunawahilila.”
23 Muze Yesu aputukile mulimo wenyi, te kali ni miaka 30, ngwe chize atu apwile ni kunyonga, iye kapwile,mwana wa Yosefwe,mwana wa Heli,
24 mwana wa Mata,mwana wa Levi,mwana wa Melichi,mwana wa Yanai,mwana wa Yosefwe,
25 mwana wa Matatia,mwana wa Amose,mwana wa Naume,mwana wa Eseli,mwana wa Nahai,
26 mwana wa Maata,mwana wa Matatia,mwana wa Semine,mwana wa Yosefwe,mwana wa Yunda,
27 mwana wa Yoanane,mwana wa Resa,mwana wa Zorobabele,mwana wa Salatiele,mwana wa Neri,
28 mwana wa Melechi,mwana wa Andi,mwana wa Kozau,mwana wa Elemotau,mwana wa Ere,
29 mwana wa Yosua,mwana wa Elieza,mwana wa Yorime,mwana wa Mata,mwana wa Levi,
30 mwana wa Semone,mwana wa Yunda,mwana wa Yosefwe,mwana wa Yonane,mwana wa Eliakimi,
31 mwana wa Melea,mwana wa Mainane,mwana wa Matata,mwana wa Natane,mwana wa Ndawichi,
32 mwana wa Yese,mwana wa Opete,mwana wa Mboaze,mwana wa Salamone,mwana wa Nasone,
33 mwana wa Aminandambe,mwana wa Arame,mwana wa Hezerone,mwana wa Pereze,mwana wa Yunda,
34 mwana wa Yakomba,mwana wa Izake,mwana wa Apalahama,mwana wa Tera,mwana wa Nehore,
35 mwana wa Selungu,mwana wa Reu,mwana wa Pelenge,mwana wa Epere,mwana wa Shela,
36 mwana wa Kenane,mwana wa Apakasha,mwana wa Sheme,mwana wa Noa,mwana wa Lameke,
37 mwana wa Metusela,mwana wa Enoke,mwana wa Yara,mwana wa Mahalale,mwana wa Kenane,
38 mwana wa Enoshe,mwana wa Sete,mwana wa Alama,mwana wa Zambi.
Footnotes
^ Tala Apendice A5.
