Asonekene Luka 6:1-49
-
Yesu, “Mwenya Sambata” (1-5)
-
Mutu uli ni kwoko lia sosewa yamuwuka (6-11)
-
Apostolo 12 (12-16)
-
Yesu kanalongesa, kanauka (17-19)
-
Uwahililo ni lamba (20-26)
-
Kuzanga akwa-kole (27-36)
-
Kulitwamina kupatwila (37-42)
-
Kwanyingikina ku mihuko yo (43-45)
-
Zuwo lia kutunga kanawa, zuwo kulishi ni fundamentu yipema (46-49)
6 Ha tangwa lia sambata yimwe, iye te kanapalika mu minda ya tiliku, tumbaji twenyi yahulula mitwe ya tiliku yayifenya ha moko jo, yaputuka kulia.
2 A-Fwariseu amwe ha kuchimona yamba ngwo: “Mumu liaka nunalingi chuma chize kuchatelele kulinga ha Sambata?”
3 Alioze Yesu yaakumbulula ngwenyi: “Kanda nuchitanga kama yuma yize Ndawichi alingile muze iye ni atu waze apwile nenyi evwile zala?
4 Chize anjilile mu zuwo lia Zambi yatambula mbolo ja kutumbieka yalia, yahana nawa kuli malunga waze apwile hamwe nenyi, jize te kulita ni shimbi katelele kujilia kuli mutu mweswawo, alioze asasendote wika?”
5 Iye yamba nawa kuli ayo ngwenyi: “Mwana-mutu mwe Mwenya-Sambata.”
6 Ha sambata yikwo, Yesu yanjila mu sunangonga yaputuka kulongesa. Mwapwile umwe lunga ni kwoko lia chindume liasosewa.
7 Alongeshi a shimbi ni A-Fwariseu te kanatale kanawa Yesu hanga amone nyi te mauka umwe mutu ha tangwa lia Sambata, hanga awane chitela chize mamusumina mulonga.
8 Alioze Yesu yanyingika yize ayo te ananyongo, kashika, iye yalweza lunga ukwete kwoko liasosewa ngwenyi: “Katuka, mana mukachi.” Iye yakatuka yamana.
9 Yesu yamba kuli ayo ngwenyi: “Ngunanuhula ngwami: Shina chinalite ha tangwa lia Sambata kulinga chuma chipema hanji chipi, kulamwina mwono hanji kuunongesa?”
10 Muze iye hatala kuli atu eswe waze apwile hamwe nenyi, Yesu yamba kuli lunga ngwenyi: “Olola kwoko lie.” Iye yaliolola, mba kwoko lienyi yilihinduka.
11 Alioze, ayo yevwa uli unji, yaputuka kuhanjika kuli umwe ni mukwo hanga anyingike yize malinga hali Yesu.
12 Ha tangwa limwe, iye yaya ku mulundu hanga alembe, yalemba ufuku weswe kuli Zambi.
13 Muze hikwacha, yasanyika tumbaji twenyi, yasakulaho 12, waze iye alukile ngwenyi, apostolo:
14 Semone, yoze iye alukile jina likwo ngwo Petulu, ni mwana-kwo Andeleu, Tiangu, Yoano, Fwilipe, Mbatolomeu,
15 Mateu, Tomase, Tiangu mwana wa Alfweu, Semone yoze te avuluka nawa ngwo, “mukwa-kulihana chinji,”*
16 Yundase mwana wa Tiangu, ni Yundase Ka-Keriote, yoze wamukunjikile.
17 Iye yapalumuka no, yamana homa hasalama, kwapwile mbunga yinene ya tumbaji twenyi, ni chizavu chinene cha atu, a mu Yundeya yeswe ni a ku Yerusaleme ni waze te atwama ku Teru ni Sendone kusesa lia kalunga-lwiji, waze ejile hanga amupanjike ni kwawuka ku misongo yo.
18 Chipwe waze apwile ni kupinjisa kuli maspiritu a luchisa, iye yaauka.
19 Mbunga yeswe yeseka kumukwata, mumu ndundo jize japwile ni kutuhuka muli iye, japwile ni kuuka eswe.
20 Mba iye yahetula meso yatala kuli tumbaji twenyi yamba ngwenyi:
“Nwawaha yenu yiswale, mumu Wanangana wa Zambi ni wenu.
21 “Nwawaha yenu nuli ni zala haliapwila, mumu kumakanukuchisa.
“Nwawaha yenu nunalili haliapwila, mumu kumunukaseha.
22 “Nwawaha yenu muze atu manwivwila kole ni kulihandununa ni yenu, muze manwihia ni kupihisa jina lienu mumu lia mwe Mwana-mutu.
23 Wahililenu muze yino muyilingiwa, tumbwokenu ni chiseke mumu fweto lienu linene mwilu, mumu yuma yino ye tulamba two apwile ni kulinga kuli aprofeta.
24 “Alioze, lamba kuli yenu pichi, mumu hinunatambula kulembejeka chenu cheswe.
25 “Lamba kuli yenu waze nunakuta haliapwila, mumu kumunukevwa zala.
“Lamba kuli yenu nunasehe haliapwila, mumu munukalinyenga ni kulila.
26 “Lamba kuli yenu muze atu manuchichimieka mashimbu eswe, mumu yino ye tulamba twenu apwile ni kulinga kuli aprofeta a mahuza.
27 “Alioze, ngunambe kuli yenu eswe nunangupanjika ngwami: Nungenu ni kuzanga akwa-kole jenu, ni kulinga yuma yipema kuli waze akunuvwila kole,
28 wahisenu waze akunushinga, lembelenu waze akunusaula.
29 Yoze makulamba ku tafu limwe, mwehe tafu likwo nawa, yoze makutambula chikuto, kanda umukinda kumbata nawa kazaku.
30 Hana kuli mweswawo yoze makwita, nyi mutu makutambula chuma che, kanda umwitacho nawa.
31 “Chikwo nawa, chuma chize nunazange hanga akwenu alinge hali yenu, ni yenu chilingenu hali ayo.
32 “Nyi nwazanga waze akunuzanga, yika munuzuka ko? Mumu chipwe yivulumunyi kakuzanga waze akwazanga.
33 Nyi nwalinga yipema kuli waze akulinga yipema kuli yenu, yika munuzuka ko? Mumu chipwe yivulumunyi no che akulinga.
34 Chizechene nawa, nyi munuhana mikuli kuli waze munushimbwila ngwenu manufwetayo cheka, yika munuzuka ko? Chipwe yivulumunyi kakuhana mikuli kuli yivulumunyi hanga akaafunyiseyo cheka.
35 Alioze, nungenu ni kuzanga akwa-kole jenu, lingenu yipema kuli ayo, ehenu mikuli chakuhona kushimbwila nichimwe. Nyi nwachilinga, fweto lienu mulipwa linene, nawa munupwa ana ja mwe Chitunda, mumu iye utu akwete kuli akwa-kaleleso ni yingulungulu.
36 Nungenu ni kupwa akwa-keke, ngwe chizechene Tatenu neye ali mukwa-keke.
37 “Chikwo nawa, litwaminenu kupatwila akwenu, hanga ni yenu akachine kunupatwila; litwaminenu kuhisa akwenu, mba ni yenu akachine kunuhisa. Nungenu ni kukonekena, mba ni yenu makanukonekena.
38 Pwenu ni kuhana, mba ni yenu makanwaha. Makanuzukwila njongo yipema ha hina lienu, yakushinda, yakunyikumuna, nawa yinazala too. Mumu cheseko chize nwakweseka nacho, chenacho makanwesekela.”
39 Yesu yaatela nawa chimwe chishima ngwenyi: “Shina kapuputa mahasa kusongwela kapuputa ni mukwo? Eswe aali kechi kuholokela mu wina?
40 Longi keshi kuhiana longeshi wenyi, alioze yoze malongesa ni ungunu weswe malifwa ni longeshi wenyi.
41 Mba mumu liaka unatale kachiswaswa kakehe kali mu liso lia ndumbwe, alioze kuwamwene lumutondo* luze luli mu liso lie?
42 Kuchi muhasa kulweza ndumbwe ngwe: ‘Ndumbu, mana ngukuchize kachiswaswa kali mu liso lie,’ alioze yena mwene kuwamwene lumutondo luze luli mu liso lie? Chilembekese! Lianga kuchiza lumutondo luze luli mu liso lie, mba uhase kumona kanawa chize muchiza kachiswaswa kaze kali mu liso lia ndumbwe.
43 “Mumu mutondo upema kuushi kwima mihuko yipi, chipwe mutondo upi kuushi kwima mihuko yipema.
44 Mumu mutondo weswe kakuunyingikina ku mihuko yawo. Chakutalilaho, atu keshi kuhela makuyu ku mingonga, chipwe uva ku mikalale.
45 Mutu mupema, kakutuhwisa yuma yipema ya ku upite upema wa ku mbunge yenyi, alioze mutu mupi, kakutuhwisa yuma yipi ya ku upite wenyi upi; mumu kanwa lienyi liakuhanjika yize yinazala ku mbunge.
46 “Mba mumu liaka nwakungusanyika ngwenu, ‘Mwene! Mwene!’ alioze kunushi kulinga yize nakwamba?
47 Mweswawo yoze meza kuli yami, mevwa maliji jami ni kwakaula, mungunulweza ni yoze analifwu:
48 Iye kanapu ngwe umwe lunga, hakutunga zuwo, yafula wina usuku, yasa fundamentu ha liwe. Muze lwiji azalile, mihwiji ya meya yalundumukine chikolo ha zuwo liacho, alioze kuyahashile kulipuzula mumu kalitungile kanawa.
49 Chikwo nawa, yoze mevwa maliji jami alioze kechi kulinga nichimwe, kanapu ngwe umwe lunga yoze watungile zuwo ha lusenga, kafulile hanga ase fundamentu. Muze mihwiji ya meya yalundumukine ha zuwo lize, hazehene zuwo yilipuzuka, kupuzuka cha zuwo liacho, chapwile chinene.”
