Asonekene Luka 9:1-62
-
E kumi ni aali yaalongesa chize mambujola (1-6)
-
Heronde yalihula nyi Yesu te iya (7-9)
-
Yesu yalisa atu 5,000 (10-17)
-
Petulu yanyingika Kristu (18-20)
-
Yesu yalianga kwambujola kufwa chenyi (21, 22)
-
Kambaji wamwenemwene (23-27)
-
Yesu yalumuka ku meso (28-36)
-
Yauka mukweze te uli ni ndemoniu (37-43a)
-
Yesu yambujola cheka nawa kufwa chenyi (43b-45)
-
Tumbaji kanalihamika hanga anyingike yoze uli munene hakachi ko (46-48)
-
Yoze keshi kulimika ni yetu kali sali lietu (49, 50)
-
Chimwe chihunda cha A-Samaria yichilituna Yesu (51-56)
-
Chize mutuhasa kukaula Yesu (57-62)
9 Mba iye yakungulula tumbaji Kumi ni Aali, yaaha ndundo ni chiyulo helu lia andemoniu eswe, ni kuuka misongo yeswe.
2 Iye yaatuma hanga ambujole Wanangana wa Zambi ni kuwuka misongo,
3 yaalweza ngwenyi: “Kanda numbata chuma nichimwe mu wenyi, chipwe lukanda, chipwe chipakumuna, chipwe mbolo, chipwe mbongo, chipwe yikuto yaali.
4 Alioze, mu zuwo lieswalio mununjila, twamenumo ndo muze munutuhukamo.
5 Ku chihela cheswako kuze atu kanutambwile, ha kukatuka ku chihunda chacho, kukumunenu fufuta ku molu jenu hanga chikapwe uchela kuli ayo.”
6 Mba ayo yaya, yendangana mu chifuchi ni mu yihunda ni kwambujola sango jipema ni kuuka mieji ku yihela yeswe.
7 Muze nguvulu Heronde evwile yuma yeswe yize te yinalingiwa, yalipikala chinji, mumu atu amwe kapwile ni kwamba ngwo, Yoano kamuhindwisa hakachi ka afu,
8 alioze, akwo te kakwamba ngwo Eliya hasoloka, eka nawa ngwo umwe wa kuli aprofeta a shakulu wahinduka.
9 Heronde yamba ngwenyi: “Yami hingunatape Yoano mutwe, mba iya mwenawo ngunevu unalingi yuma yacho?” Kashika yafupa kumumona.
10 Muze apostolo afunyine, yalweza Yesu yuma yeswe yize alingile. Hazehene iye yaya no, yaatwala mu yimwe mbonge avuluka ngwo Mbeteseta hanga atwameko ukawo.
11 Alioze, mbunga hakuchinyingika, yamukaula. Iye yaatambula kanawa, yaputuka kwalongesa hakutwala ku Wanangana wa Zambi, ni kuwuka atu waze te ayiza.
12 Muze te kunayi ni kutoka, e tumbaji Kumi ni Aali yakundama kuli iye, yamulweza ngwo: “Lweza mbunga hanga aye kwo mu yihunda ni mu membo a hakamwihi, hanji mahasa kuwana yihela ya kupomba ni yize malia, mumu kuno tuli kwahola.”
13 Alioze, Yesu yaalweza ngwenyi: “Ehenu yenu kulia.” Ayo yamukumbulula ngwo: “Kutushi nichimwe, wika mbolo jino jitano ni yishi aali, nyi chocho ndo tuye yetu tulanjile atu eswe wano kulia.”
14 Mumu kwapwile 5,000 a malunga. Alioze iye yalweza tumbaji ngwenyi: “Alwezenu hanga atwame mu yizavu ya atu 50.”
15 Tumbaji yachilinga, yalweza eswe hanga atwame.
16 Yesu yanda mbolo jitano ni yishi aali, yatala mwilu yalemba. Mba yajipalula, yajihana kuli tumbaji hanga atetele mbunga.
17 Kashika, eswe yalia yakuta, yakunga yipalupalu yize yasalileho yapwile mitonga 12.
18 Ha kupalika cha amwe mashimbu, muze te analembe ukawenyi, tumbaji yakundama kuli Yesu, iye yaahula ngwenyi: “Mbunga kakwamba ngwo yami nguli iya?”
19 Ayo yamukumbulula ngwo: “Yoano Chipapachisa, alioze akwo kakwamba ngwo uli Eliya, eka nawa ngwo uli umwe wa kuli aprofeta a shakulu yoze wahinduka.”
20 Hazehene, iye yaahula ngwenyi: “Mba kuli yenu, yami nguli iya?” Petulu yamukumbulula ngwenyi: “Yenu nuli Kristu wa Zambi.”
21 Mba yaakanjisa chikolo ahone kulweza niumwe,
22 alioze, yaalweza ngwenyi: “Mwana-mutu katamba kumona lamba linji ni kulitunaye kuli makulwana, ni kuli asasendote a lutwe, ni kuli alongeshi a shimbi, chikwo nawa, makamushiha, mba ha tangwa liamuchitatu, makamuhindwisa.”
23 Mba yamba nawa kuli ayo eswe ngwenyi: “Nyi mutu mazanga kungukaula, alitune iye mwene, azundule mutondo wenyi wa lamba tangwa ha tangwa, anunge ni kungukaula.
24 Mumu mweswawo mazanga kulamwina mwono wenyi makautokesa, alioze yoze matokesa mwono wenyi mumu lia yami, mwe makaulamwina.
25 Yika mutu mayuka, nyi mazuka yuma yeswe ya hano hashi, alioze matokesa mwono wenyi hanji kuunongesa mwene?
26 Mumu mweswawo manguvwila sonyi hanji mevwila sonyi maliji jami nawa, ni Mwana-mutu neye makevwila sonyi mutu wacho, muze makeza mu uhenya wenyi ni wa Tato ni wa angelo asandu.
27 Pundu ngunambe kuli yenu ngwami, atu amwe waze anamana hano, kechi kafwa ndo muze makamona Wanangana wa Zambi.”
28 Muze hamba maliji wano, ha kupalika cha matangwa nake, yasanyika Petulu, Yoano ni Tiangu, yakanduka no ku mulundu hanga alembe.
29 Muze te analembe, chifwa chenyi yichalumuka, mazalo jenyi yatoma too.
30 Mba yikusoloka malunga aali te anahanjika nenyi; kapwile Mose ni Eliya.
31 Ayo yasoloka ni uhenya, yaputuka kuhanjika hakutwala ku kuya chenyi, chize te kwasala hakehe hanga achimanunune ku Yerusaleme.
32 Meso ja Petulu ni waze apwile nenyi te kanalemenena ni tulo, alioze muze ayo alawile, yamona uhenya wenyi ni malunga aali waze te anamana hamwe nenyi.
33 Mba muze malunga jacho te analihandununa nenyi, Petulu yalweza Yesu ngwenyi: “Longeshi, chili chipema kupwa hano. Mututunga mbalaka jitatu, yimwe ya yena, yikwo ya Mose, yeka ya Eliya.” Alioze Petulu te keshi kunyingika yize anambe.
34 Muze iye te machihanjika yuma yino, yikusoloka limwe lelwa yiliputuka kwazulamina. Muze hiliaafuka, ayo yevwa woma.
35 Mba liji limwe yilituhuka mu lelwa ngwo: “Yono mwe Mwanami, yoze nasakula. Mupanjikenu.”
36 Ha shimbu lize te anevu liji, Yesu yasala ukawenyi. Alioze, ayo yahola kuluu, ha matangwa waze kalwezele niumwe yuma yize amwene.
37 Mukwachako, muze te anasunuka ku mulundu, mbunga yinene yaya ni kumupatwiza.
38 Umwe lunga hakachi ka mbunga yakololoka ngwenyi: “Longeshi, talenu kama mwanami wa lunga, mumu iye mwanami wa wika.
39 Kuli umwe spiritu mupi wakumukwata, susumuku iye matetwoka, muze spiritu mamulimbula maputuka kukonya ni kutuhwisa fulufulu ku kanwa, chakupwa chikalu kumutusula, muze hamumwesa lamba mba mamwecha.
40 Naliumbanga kuli tumbaji twe hanga atuhwise spiritu yacho, alioze ayo kahashile.”
41 Yesu yakumbulula ngwenyi: “Yenu chisemuko chipi, kuchishi ufulielo, ndo ha mwaka uka mungununga hamwe ni yenu, ni kulihumikiza ni yenu? Neha mwane kuno.”
42 Muze mwana te anakundama, ndemoniu yamulimbula hashi yamukonyesa chikolo. Alioze Yesu yakanjisa spiritu ya luchisa, yauka mwe mwana, yamuhana kuli tato.
43 Atu eswe yakomoka chinji ha ndundo jinene ja Zambi.
Muze eswe te machikomoka ha yuma yeswe yize apwile ni kulinga, iye yalweza tumbaji twenyi ngwenyi:
44 “Panjikenu kanawa, iwulukenu maliji wano, Mwana-mutu kumakamukunjika ku moko ja atu.”
45 Alioze yuma yize te anaalweze kuyaalumbunukine. Mumu yino kanakaaswekelayo hanga ahone kunyingika ulumbunwiso, alioze tumbaji yevwa woma wa kumuhula hakutwala ku maliji jacho.
46 Mba yaputuka kulihangujola hakachi ko hanga anyingike iya mulemu wahiana akwo.
47 Muze Yesu hanyingika manyonga a mu mbunge jo, yaneha umwe kanuke, yamusa hakamwihi ni iye,
48 yamba kuli ayo ngwenyi: “Yoze matambula kanuke yono mu jina liami, yami nawa anatambula; mba yoze matambula yami, katambula nawa Yoze wangutumine. Mumu yoze malipwisa ngwe mwana mukepe hakachi kenu, mwenawo munene.”
49 Yoano yakumbulula ngwenyi: “Longeshi, twamonanga umwe mutu kanatuhwisa andemoniu mu jina lie, alioze yitweseka kumukanjisa, mumu keshi kukukaula hamwe ni yetu.”
50 Alioze Yesu yamulweza ngwenyi: “Kanda nweseka kumukanjisa, mumu mweswe yoze keshi kulimika ni yenu, kali sali lienu.”
51 Amu mashimbu a kumutwala mwilu te anayi ni kukundama, ni hamu lieswe yaya ku Yerusaleme.
52 Chocho yatuma tunganda kulutwe lienyi. Ayo yaya, yanjila mu chimwe chihunda cha A-Samaria hanga amululiekele yuma.
53 Alioze A-Samaria yalituna kumutambula, mumu te kanayi ku Yerusaleme.
54 Muze tumbaji twenyi Tiangu ni Yoano achimwene, yamba ngwo: “Mwene, unazange hanga twite kahia ka mwilu kahulumuke, kaanongese?”
55 Alioze, Yesu yatewuluka yaakumika.
56 Mba yaya ku chihunda chikwo.
57 Muze ayo te anayi mu jila, umwe mutu yamba kuli iye ngwenyi: “Mungukukaula kweswako muoya.”
58 Alioze, Yesu yamulweza ngwenyi: “Mikuza mena akwete, ni tujila a mwilu kakwete yaswa, alioze Mwana-mutu keshi ni haze mashachila mutwe.”
59 Mba Yesu yamba kuli mukwo ngwenyi: “Pwako kambaji kami.” Lunga wacho yamba ngwenyi: “Mwene, ngutayize kama chitangu nguye ni kufunda tata.”
60 Alioze, iye yamwamba ngwenyi: “Echa afu afunde afu jo ene, alioze yena yako wambujole Wanangana wa Zambi.”
61 Mukwo yamulweza ngwenyi: “Mwene, mungukukaula, alioze ngutayize kama chitangu nguye ni kulishika ni asoko jami.”
62 Yesu yamwamba ngwenyi: “Nyi mutu makwata ku temo, matala nawa kunyima, katelele Wanangana wa Zambi.”
