Asonekene Marku 10:1-52
10 Yesu yakatuka yaya mu manjiza ja Yundeya, mu sali likwo lia Yordau, cheka nawa mbunga yalikungulula kuli iye. Chocho yaputuka kwalongesa ngwe chize te akulinga.
2 A-Fwariseu yeza kuli iye yazanga kumweseka ni kumuhula nyi chinalite ni shimbi lunga kulakula mukwo-pwo.
3 Yesu yaakumbulula ngwenyi: “Shimbi yika Mose anuhele?”
4 Ayo yamba ngwo: “Mose katayijile lunga kusoneka mukanda wa kulakula nawo pwo mba amweche.”
5 Alioze Yesu yaalweza ngwenyi: “Mose kasonekene shimbi yino, mumu lia kukala cha mbunge jenu.
6 Mumu chize ku uputukilo muze Zambi atangile yuma yeswe, ‘waatangile lunga ni pwo.
7 Kashika ha chikuma chino, lunga makahichika tato ni naye,
8 mba eswe aali makapwa musunya umuwika,’ ayo hi aali ko nawa, alioze musunya umuwika.
9 Kashika, chize Zambi hananungu, mutu katambile kuchihandununa.”
10 Muze anjilile cheka nawa mu zuwo, tumbaji twenyi yamuhula hakutwala ku chikuma chacho.
11 Yesu yaakumbulula ngwenyi: “Mweswawo yoze malakula mukwo-pwo ni kumbata pwo mweka, malinga upangala.
12 Ni pwo neye nyi malilakula ni lunga lienyi ni kulimbata ni lunga mweka, malinga upangala.”
13 Atu yaputuka kuneha twanuke kuli Yesu hanga aakwate, alioze tumbaji twenyi yakanjisa atu jacho.
14 Yesu ha kuchimona yevwa chinyengo, yamba kuli ayo ngwenyi: “Echenu twanuke hanga eze kuli yami, kanda nwakanjisa, mumu Wanangana wa Zambi uli wa waze apwa ngwe twanuke.
15 Pundu ngunambe kuli yenu ngwami, yoze keshi kutayiza Wanangana wa Zambi ngwe chize kanuke akutayiza yuma, kechi kanjilamo.”
16 Yesu yasa ana mu kondo, yaawahisa ni kusayika moko jenyi hali ayo.
17 Muze te anatuhuka mu zuwo, umwe lunga yazomboka yaliumba kumeso jenyi ni kumuhula ngwenyi: “Longeshi Mupema, yika natamba kulinga mba ngukahinge mwono wa mutolo?”
18 Yesu yamba kuli iye ngwenyi: “Mumu liaka unangusanyika ngwe, mupema? Niumwe mupema wakuhi shina wika umuwika, iye Zambi.
19 Yena unanyingika shimbi jinambe ngwo: ‘Kanda ushiha, kanda ulinga upangala, kanda wiya, kanda uhana uchela wa mahuza, kanda ulaka, lemesa tatenu ni noko.’”
20 Lunga yamba kuli iye ngwenyi: “Longeshi, yami nakukaula shimbi jino jeswe chize ku wanuke wami.”
21 Yesu yamutala, yamuzanga, chocho yamulweza ngwenyi: “Chuma chimuwika unahono: Yako ulanjise yuma yeswe yize uli nayo uhane mbongo kuli yiswale, mukapwa ni upite mwilu, mba wize ungukaule.”
22 Alioze hakwivwa kumbululo lia Yesu, lunga yanyakana ku meso, yaya kwenyi ni chinyengo, mumu kapwile ni yikumba yinji.
23 Muze Yesu hatala sali ni sali, yamba kuli tumbaji twenyi ngwenyi: “Muchikapwa chikalu chinji kuli waze ali ni mbongo kunjila mu Wanangana wa Zambi!”
24 Tumbaji yalishimoka kuhiana ha maliji jenyi. Alioze Yesu yaambila nawa cheka ngwenyi: “Ana jami, chikalu kunjila mu Wanangana wa Zambi!
25 Chili chashi kamelu kupalika mu chituwa cha ndongo, alioze chikalu kuli pichi kunjila mu Wanangana wa Zambi.”
26 Tumbaji yakomoka chinji kuhiana, chocho yamuhula ngwo: “Nyi chocho, iya mba mahasa kulamwina?”
27 Yesu yatala kuli ayo ni kwalweza ngwenyi: “Kuli atu chino chili chikalu, alioze kuli Zambi ka, mumu kuli Zambi, yuma yeswe yapwa yashi.”
28 Petulu yaputuka kumwamba ngwenyi: “Tala! Yetu twahichikile yuma yeswe, yitukukaula.”
29 Yesu yamba ngwenyi: “Pundu ngunambe kuli yenu ngwami: Nyi umwe kahichikile zuwo, mandumbu jenyi a malunga ni a mapwo, naye, tato, ana hanji minda mumu hali yami ni ha sango jipema,
30 kumakatambula 100 lia yisuho haliapwila ha mwaka uno, mazuwo, mandumbu a malunga ni a mapwo, anaye, ana, ni minda hamwe ni yihungumiona ni ha mwaka uze muwizaho* mwono wa mutolo.
31 Alioze anji waze ali atangu kumakapwa akasula, akasula kumakapwa atangu.”
32 Mu jila ya kukanduka ku Yerusaleme, Yesu waatetekela, tumbaji endele ni kukomoka, atu waze te anaakaula evwile woma. Cheka nawa, iye yasanyika e Kumi ni Aali kutenga yaputuka kwambulwila yuma yize te muyimuwana ngwenyi:
33 “Panjikenu! Tunakanduka ku Yerusaleme, mba mwe Mwana-mutu makamuhana kuli asasendote a lutwe ni alongeshi a shimbi. Ayo makamuhisa hanga akamushihe ni kumukunjika kuli akwa-mavungu,
34 ayo makamukekuna, makamufwila mate, makamulamba ni shikote ni kumushiha, mba kulutwe lia matangwa atatu makamuhindwisa.”
35 Tiangu ni Yoano ana a Zebedeu yakundama kuli iye ni kumulweza ngwo: “Longeshi, tunazange hanga utulingile yize mutukwita.”
36 Iye yaahula ngwenyi: “Yika nunazange hanga ngunulingile?”
37 O yamukumbulula ngwo: “Tutayize kama tukatwame umwe ku kwoko lie lia utata, mukwo ku kwoko lie lia umama mu uhenya wenu.”
38 Yesu yaakumbulula ngwenyi: “Yenu kunwanyingikine yize nunechi. Shina munuhasa kunwa musenge uze yami mungunwa nyi? Shina munuhasa kutambula upapachiso uze mangupapachisa nawo nyi?”
39 Ayo yamukumbulula ngwo: “Ewa, mutuhasa.” Chocho Yesu yamba kuli ayo ngwenyi: “Munukanwa musenge uze yami mungunwa ni kutambula upapachiso uze mangupapachisa nawo.
40 Alioze ami chishi ni ulite wa kusakula yoze makatwama ku kwoko liami lia utata hanji ku kwoko liami lia umama, mumu yihela yino yili ya waze hanaaluliekelayo.”
41 Muze tumbaji akwo kumi achivwile, yevwila kupiha Tiangu ni Yoano.
42 Alioze, Yesu yaasanyika, yamba kuli ayo ngwenyi: “Nunanyingika ngwenu, waze akuvuluka ngwo manguvulu ja akwa-mavungu, kakulipwisa miata hali ayo, ni alemu jo kakuyula hali ayo.
43 Kuchatambile kupwa chocho hakachi kenu; alioze yoze mazanga kupwa munene hakachi kenu, mwenawo watamba kunulingila.
44 ni yoze mazanga kupwa mutangu hakachi kenu, mwe watamba kupwa ndungo wa eswe.
45 Mumu chipwe mwe Mwana-mutu kakejile hanga amulingile, alioze hanga alingile akwo ni kuhana mwono wenyi ngwe ukuule hali anji.”
46 O yaheta ku Yeriku. Shimbu te Yesu machituhukamo hamwe ni tumbaji twenyi, ni mbunga yinene, Mbatimeu (mwana wa Timeu) kapuputa te kanatwama ku sesa lia jila.
47 Muze hevwa ngwo auze Yesu Ka-Nazare, yaputuka kukololoka ngwenyi: “Yesu, Mwana wa Ndawichi, nguvwile kama keke!”
48 Chocho anji yaputuka kumukanjisa ni kumuholesa. Alioze iye yanunga ni kukololoka chinji kuhiana ngwenyi: “Mwana wa Ndawichi, nguvwile kama keke!”
49 Chocho Yesu yamana ni kwamba ngwenyi: “Musanyikenu.” Atu yasanyika kapuputa yamulweza ngwo: “Hamuka! Katuka; Yesu kanakusanyika.”
50 Hazehene yambila hina lienyi, yanyangumuka yaya kuli Yesu.
51 Yesu yamuhula ngwenyi: “Yika unazange hanga ngulinge hali yena?” Kapuputa yamukumbulula ngwenyi: “Longeshi,* ngunazange kama hanga meso jami alaule.”
52 Yesu yamwamba ngwenyi: “Yako. Ufulielo we wakuwuka.” Hazehene kapuputa yaputuka kumona, chocho yaputuka kumukaula.
