Asonekene Marku 11:1-33
11 Muze te anakundama ku Yerusaleme, ku yihunda ya Mbetefweje ni Mbetaniya, ku Mulundu wa Olevwe, Yesu yatuma aali a kuli tumbaji twenyi,
2 yamba kuli ayo ngwenyi: “Yeenu mu chihunda chize nunamono, muze mununjilamo, munuwana mwana chimbulu wa kukasa yoze kanda achimunyina kama kuli mutu niumwe. Mukasululenu, numunehe kuno.
3 Mba nyi umwe manuhula ngwenyi: ‘Mumu liaka nunamukasulula?’ Ambenu ngwenu: ‘Mwene kanamufupu mba mamuhwilwisa cheka.’”
4 O yaya yawana mwana wa chimbulu wakukashila ku chikolo haze, chocho yamujitula.
5 Alioze, waze apwileko yaahula ngwo: “Mumu liaka nunakasulula mwana chimbulu?”
6 Tumbaji yakumbulula ngwe chize Yesu aalwezele. Mba yeecha hanga aye.
7 Chocho, o yaneha mwana chimbulu kuli Yesu, yala mahina jo helu lia chimbulu, mba Yesu yatwamaho.
8 Chikwo nawa, anji yala mahina jo mu jila, akwo yala mitango ya mitondo yize atetele.
9 Mba waze atetekelele ni waze akawile yanunga ni kukololoka ngwo: “Tunaliumbu, mulamwine! Kawaha yoze uneza mu jina lia Yehova!*
10 Wawaha Wanangana uze muukeza wa kalamba* ketu Ndawichi! Mulamwine, tunaliumbu kuli yenu nwatwama mwilu mwahiana!”
11 Yesu yaya mu Yerusaleme yanjila mu tembele, yahengwola yuma yeswe. Alioze amu te hikwatoka, yatuhuka ni e Kumi ni Aali yaya ku Mbetaniya.
12 Mukwachako, muze te anakatuka ku Mbetaniya, Yesu yevwa zala.
13 Muze te uchili kusuku, yamona mukuyu uli ni mafwo, yakundamako hanga amone nyi te mawanako kama umwe muhuko. Alioze muze aheteleko, kawanyineko nichimwe, shina mafwo wika. Mumu mashimbu a makuyu te kanda achiheta.
14 Mba Yesu yambila mukuyu ngwenyi: “Mutu niumwe kanda akalia nawa mihuko ye ndo ku miaka yeswe.” Tumbaji twenyi te kanamwivu.
15 Yesu ni tumbaji twenyi yaheta nawa ku Yerusaleme. Chocho iye yanjila mu tembele, yaputuka kuhanga atu eswe waze apwile ni kulanjisa ni kulanda mu tembele. Yanunguna mesa ja akwa-kusumbakenya mbongo ni yitwamo ya akwa-kulanjisa membe.
16 Chikwo nawa, kakechele niumwe kumbata nichimwe chuma mu tembele.
17 Yesu yaalongesa ngwenyi: “Kuchasonewene ngwo: ‘Zuwo liami makalivuluka ngwo, zuwo lia kulembela lia akwa-mavungu eswe nyi’? Alioze yenu, hinwalitenga chiswamo cha eji.”
18 Muze asasendote a lutwe ni alongeshi a shimbi achivwile, yaputuka kufupa majila akumushihilamo. Alioze amuvwilile woma, mumu atu akomokene ha malongeso jenyi.
19 Muze te hikwapwa chingoloshi, Yesu ni tumbaji twenyi yatuhuka mu mbonge.
20 Alioze, ha chimenemene muze te anapalika, yamona mukuyu te hiwoma chau ndo ku miji.
21 Petulu yewuluka, yamba kuli Yesu ngwenyi: “Longeshi, tala! Mukuyu uze unakashinga hiwoma chau.”
22 Yesu yakumbulula ngwenyi: “Fulielenu muli Zambi.
23 Pundu ngunambe kuli yenu ngwami: Mweswawo mamba ku mulundu uno ngwenyi: ‘Tutuluka ulimbile mu kalunga-lwiji,’ nyi kayambashanyine mu mbunge yenyi, alioze mafuliela ngwenyi chize amba muchilingiwa, muchilingiwa lume.
24 Kashika ngunanwambe ngwami, yuma yeswayo munwita ha kulemba, fulielenu ngwenu hinwayitambula kulu, mumu munukapwa nayo.
25 Muze nunamana ni kulemba, konekenenu mutu mweswawo yoze unakanulinga chuma chipi, hanga Tatenu wa mu malilu neye akakonekene tupalia twenu.”
26 * ——
27 Yesu ni tumbaji twenyi, yaaheta nawa mu Yerusaleme. Shimbu iye te machenda mu tembele, asasendote a lutwe ni alongeshi a shimbi ni makulwana yeza,
28 yamuhula ngwo: “Shina uli ni ulite wa kulinga yuma yino? Iya wakuhele ulite wa kulinga yuma yino?”
29 Yesu yamba kuli ayo ngwenyi: “Ni yami nawa mungunuhula chimwe chuma, nyi nwangukumbulula, ni yami mungunwambulwila yoze wanguhele ulite wa kulinga yuma yino.
30 Shina upapachiso wa Yoano wakatukile mu malilu nyi kuli atu? Ngukumbululenu.”
31 Kashika o yaputuka kuhanjika umwe ni mukwo ngwo: “Nyi twamba ngwetu, ‘Wakatukile mu malilu,’ iye mamba ngwenyi: ‘Mba mumu liaka kunwafulielele muli iye?’
32 Alioze nyi twamba ngwetu: ‘Wakatukile kuli atu’ yika muyilingiwa kuli yetu?” O kevwile woma wa mbunga mumu eswe te kananyingika ngwo, Yoano kapwile profeta.
33 Kashika, ayo yakumbulula Yesu ngwo: “Kutwanyingikine.” Mba Yesu yamba kuli ayo ngwenyi: “Nyi chocho, ni yami chichi kunulweza ulite uze nakulinga nawo yuma yacho.”
