Asonekene Marku 12:1-44
12 Hohene, Yesu yaputuka kwatela yishima ngwenyi: “Umwe mutu watumbile munda wa uva, yaujingilika mu chipanga, yafulamo wina wa kukamina vinyu. Yatungamo nawa kaposhi musuku; mba yauhana kuli njimi yaya mu wenyi mu chifuchi cheka.
2 Muze mwaka wa kuhela uva te hiwaheta, yatuma ndungo yenyi kuli njimi hanga akatambule yimwe mihuko ya mu munda.
3 Alioze e njimi yamukwata, yamulamba, yamuhuma mokomoko.
4 Mwenya-munda yatuma kavumbi mukwo, alioze o yamulemeka mu mutwe ni kumukolesa sonyi.
5 Cheka nawa, yaatumina kavumbi mukwo, o yamushiha. Yaatumina nawa tuvumbi anji: Amwe yaalamba, eka yaashiha.
6 Mba kwasalile mukwo umuwika, mwanenyi yoze te azanga chinji. Chocho yamutuma kuli njimi mumu wanyongene ngwenyi: ‘Amu ali mwanami, mamuvumbika.’
7 Alioze, e njimi yalitesa hakachi ko ngwo: ‘Au mwe swana. Tweyenu tumushihe hanga chihinga chipwe nichetu.’
8 Chocho, ayo yamukwata, yaamushiha ni kumumbila haze lia munda.
9 Yika mwenya-munda makalinga kuli njimi wano? Makahiluka ashihe e njimi, ni kuhana munda wa vinyu kuli njimi eka.
10 Shina kanda nuchitanga kama chisoneko chakwamba ngwo: ‘Liwe lize alitunyine tungi, lienalio hiliapwa liwe litangu lia ha mbango nyi?
11 Kutala, kanda nutanga kama ngwenu, chuma chino chakatukile kuli Yehova,* mba chinapu chikomokeso kumeso jetu’?”
12 Mumu lia chino, o yazanga kumukwata, ha kunyingika ngwo chishima chize iye anate ayo te anachitela. Alioze yevwa woma wa mbunga, yamwecha yaya kwo.
13 Kulutwe, yamutumina amwe a kuli A-Fwariseu ni amwe a kuli A-Heronde, hanga amukwate ha yize mamba.
14 Muze ahetele, yamba kuli iye ngwo: “Longeshi, tunanyingika ngwetu yena wakuhanjika umwenemwene, kushi kuvwila atu woma, mumu kuwatwamine ni katonde, alioze wakulongesa jila ya Zambi kulita ni umwenemwene. Shina chinalite kufweta lijimu kuli Sesare, nyi ka?
15 Twatamba kufweta nyi ka?” Yesu hakumona ulembekese wo, yamba kuli ayo ngwenyi: “Mumu liaka nunangweseka? Ngunehenenu lumbongo* umuwika hanga ngumutale.”
16 O yamunehenaye, mba yaahula ngwenyi: “Chizulie chino ni chisoneko chino yaya?” O yamukumbulula ngwo: “Ya Sesare.”
17 Mba Yesu yaalweza ngwenyi: “Fwetenu kuli Sesare yuma ya Sesare, alioze kuli Zambi, yuma ya Zambi.” Chocho o yakomoka chinji.
18 Kashika, ni A-Satuseu waze akwamba ngwo, uhindukilo wa afu watwamineko, yeza kuli Yesu yamuhula ngwo:
19 “Longeshi, Mose kasonekene ngwenyi, nyi lunga umwe mafwa mahichika pwo, alioze kahichikile ana, mwana-kwo hanji yayo katamba kumbata tuliwa hanga amusemene ana.
20 Kwapwile malunga shimbiali a mu jimo limuwika. Mutangu yambata pwo, alioze yafwa kakasemene nenyi.
21 Wamuchiali yalimbata ni mwe tuliwa, alioze neye yafwa kahichikile ana. Chocho chalingiwile nawa kuli wamuchitatu.
22 Eswe shimbiali yafwa chakuhona kuhichika ana. Kusulaho, ni mwe pwo neye yafwa.
23 Ha tangwa lia uhindukilo, pwo wacho makapwa waya? Mumu eswe shimbiali kalimbachile nenyi.”
24 Yesu yamba kuli ayo ngwenyi: “Kashika nunapianguka ha chikuma chino, mumu kunwanyingikine nichimwe chipwe Yisoneko, chipwe ndundo ja Zambi, nyi?
25 Mumu muze atu makahinduka hakachi ka afu, malunga kechi kambata, chipwe mapwo kechi kahangisa, alioze makapwa ngwe angelo mu malilu.
26 Hakutwala ku uhindukilo wa afu, shina kunwatangile mu mukanda wa Mose, ha lusango wa chiputa cha mungonga, muze Zambi ambile kuli iye ngwenyi: ‘Yami nguli Zambi ya Apalahama, Zambi ya Izake ni Zambi ya Yakomba’?
27 Iye kali Zambi, hi wa afu ko, alioze wa waze ali ni mwono. Kashika nunapianguka chikolo.”
28 Umwe wa kuli alongeshi a shimbi yoze wakundamine kuli ayo ni kwivwa kulihangujola cho, hakumona ngwenyi Yesu kakumbulwile kanawa, yamuhula ngwenyi: “Shimbi yika yilemu* yahiana mukachi ka shimbi jeswe?”
29 Yesu yakumbulula ngwenyi: “Panjikenu, yenu A-Izalele, ‘Shimbi yitangu yili yino: Yehova* Zambi yetu iye umuwika, Yehova.*
30 Zanga Yehova,* Zambi ye, ni mbunge ye yeswe, ni mwono* we weswe, ni kunyonga che cheswe, ni tachi je jeswe.’
31 Shimbi yamuchiali yili yino: ‘Zanga mwenyembo we ngwe chize wakulizanga yena mwene.’ Kukushi shimbi yikwo yahiana shimbi jino.”
32 Longeshi ya shimbi yamba kuli Yesu ngwenyi: “Longeshi, wahanjika umwenemwene. Kwamba pundu, ‘Iye kali Zambi umuwika, kukushi mukwo shina wika iye;’
33 kashika, kumuzanga ni mbunge yeswe, ni malinjekela eswe, ni tachi jeswe, ni kuzanga mwenyembo wetu ngwe chize twakulizanga yetwene, chino kuchahiana milambu yeswe yakulumba ni yitapo yeswe.”
34 Muze Yesu hamona ngwenyi kakumbulula ni mana, yamba kuli iye ngwenyi: “Yena hakamwihi uli ni Wanangana wa Zambi.” Chize tangwa lize niumwe wahamukine nawa kumuhula wakuhi.
35 Shimbu Yesu te machinunga ni kulongesa mu tembele, yamba ngwenyi: “Mba mumu liaka alongeshi a shimbi akwamba ngwo, Kristu kali mwana wa Ndawichi?
36 Mumu Ndawichi mwene kambile kupalikila mu spiritu yisandu ngwenyi: ‘Yehova* hanambe kuli Mwene wami ngwenyi: “Twama ku kwoko liami lia utata, ndo muze mungukasa akwa-kole je kwishi lia yiliato ye.’”
37 Mwe Ndawichi kakumuvuluka ngwenyi Mwene, mba kuchi mahasa kupwa mwanenyi?”
Ye mbunga yinene yamupanjikile ni chiseke.
38 Iye yaalongesa ni kwamba ngwenyi: “Kanyamenu ni alongeshi a shimbi waze akuzanga kwendangana ni kuzala mazalo asuku-asuku, akuzanga chinji hanga aameneke ha yitanda,
39 akuzanga yitwamo ya kulutwe* mu masunangonga ni yihela yilemu ha yiwanyino ya kulia cha chingoloshi.
40 O kakwiya yuma ya mapwo waze ali tuliwa, ni kulinga yilemba yisuku-yisuku hanga akomwese atu. Alongeshi a shimbi wano, usopeso wo muukapwa ukalu chinji.”
41 Yesu yatwama hakamwihi ni mishete* ya milambu, chocho yaputuka kutala chize atu apwile ni kusamo mbongo. Mba pichi anji aselemo mbongo jinji.
42 Hazehene, hikuheta umwe tuliwa wa pwo chiswale yoze waselemo tumbongo twaali twa ndando yikehe.*
43 Chocho, iye yasanyika tumbaji twenyi, yamba kuli ayo ngwenyi: “Pundu ngunambe kuli yenu ngwami: Tuliwa yono chiswale kasa mbongo jinji mu mishete ya milambu kuhiana atu eswe.
44 Mumu akwo eswe kasa yuma yize yasalile ha kulumbama cha upite wo. Alioze iye ha uswale wenyi, kasa yuma yeswe yize apwile nayo, yize te malikwasa nayo ku mwono wenyi.”
Footnotes
^ Tala Apendice A5.
^ Hanji “lumbongo wa ndenariu.” Tala Apendice B14.
^ Hanji “yitangu.”
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Hanji “yilemu.”
^ Hanji “chikasa.”
^ Chize Alisonekene, “lepton jaali, hanji ngwetu ndando ya quadrante yimuwika.” Tala Apendice B14.
