Asonekene Marku 13:1-37
13 Muze Yesu te anatuhuka mu tembele, umwe wa kuli tumbaji twenyi yamba kuli iye ngwenyi: “Longeshi, tala mawe apwahaha ni mazuwo apema chize!”
2 Yesu yamukumbulula ngwenyi: “Unamono mazuwo wano anene-anene? Kechi kahichika liwe nilimwe helu lia liwe likwo, lize kechi kapuzula.”
3 Muze Yesu te anatwama ha Mulundu wa Olevwe, hatalanganyi ni tembele, Petulu, Tiangu, Yoano ni Andeleu yakundama kuli iye kwaukawo ni kumuhula ngwo:
4 “Tulweze kama, shimbu lika yino yuma muyikalingiwa? Chikwo nawa, chilayi chika muchikasolola ngwo songo lia yino yuma linakundama?”
5 Chocho Yesu yaputuka kwalweza ngwenyi: “Kanyamenu hanga niumwe achine kunupiangula.
6 Mumu anji makeza mu jina liami ni kwamba ngwo: ‘Yami nguli Kristu,’ mba makapiangula atu anji.
7 Chikwo nawa, muze munwivwa zungo lia jita ni sango ja jita, kanda nwivwa woma; mumu yuma yino yatamba kulingiwa, alioze hi songo ko.
8 “Vungu limwe mulikasa jita ni vungu likwo, wanangana umwe muukalimika ni wanangana ukwo; kumukukapwa minyiko ku yihela yeka ni yeka, chikwo nawa kumukukapwa zala yinji. Yuma yino yeswe kumuyikapwa uputukilo wa lamba.
9 “Alioze yenu kanyamenu. Mumu atu kumakanukunjika ku yota ya usopelo, kumakanulamba mu masunangonga, kumakanumanyisa kumeso ja manguvulu ni mianangana mumu lia yami hanga nukambujole kuli ayo.
10 Chikwo nawa, sango jipema katamba kulianga kujambujola ku mavungu eswe.
11 Muze makanukwata ni kunukunjika kuli ngaji, kanda nukalipikala* ha chize munukakumbulula; mumu munukahanjika yeswe yize makanwaha ha ola yize. Mumu hi yenu ko munukahanjika, alioze spiritu yisandu.
12 Chikwo nawa, mwana-kwo ni yayo, umwe makakunjika mukwo ku kufwa, tata makakunjika mwanenyi, ni ana no makakatukila yisemi ni kwashihisa.
13 Ni yenu makanuvwila kole kuli atu eswe mumu lia jina liami. Alioze, yoze manyongonona ndo ku songo, makamulamwina.
14 “Kashika, muze munukamona chuma cha chizelwokeso chize cha kwenyeka chinamana kuze kuchatambile kumana, (mukwa-kutanga akase chinyingi), hohene waze mapwa mu Yundeya akachinyine ku milundu.
15 Mutu yoze makapwa ha fulumba kanda akasunuka, chipwe kunjila mu zuwo lienyi hanga akande chimwe chuma;
16 yoze makapwa ku munda kanda akahilukila yuma ya kunyima hanga akande mazalo jenyi.
17 Lamba kuli tufumba, ni kuli amama waze mamwisa ana ha matangwa waze!
18 Kashika nungenu ni kulemba hanga yuma yino yichine kulingiwa ha mashimbu a chishika;
19 mumu ha matangwa jacho, mukukapwa luyinda yoze kanda alingiwa kama chize ku uputukilo muze Zambi atangile yuma ndo musono,* kechi keza kalingiwa nawa nilimwe tangwa.
20 Kwamba pundu, nyi kachi Yehova* kakatepulwile matangwa waze, kachi niumwe makalilamwina wakuhi. Alioze mumu lia waze hanaatongola, iye hanatepulula matangwa jacho.
21 “Kashika, nyi mutu manulweza ngwenyi: ‘Talenu! Kristu kali kuno,’ hanji ngwenyi, ‘Talenu! Kristu kali akuze,’ kanda nutayiza.
22 Mumu kumukukasoloka Kristu a mahuza ni aprofeta a mahuza, makalinga yilayi ni yikomokeso hanga akapiangule waze hanaatongola, nyi muchilita.
23 Kashika, Lawolenu. Mumu hinalianga kunulweza yuma yeswe.
24 “Alioze ha matangwa aze, muze luyinda yoze hahwa, tangwa mulikalaa, ni kakweji kechi katwa mieji,
25 ni tutongonoshi a mwilu makaholoka, ni ndundo ja mwilu mujikanyika.
26 Hohene atu makamona mwe Mwana-mutu kaneza mu malelwa, ni ndundo jinji ni uhenya.
27 Iye makatuma angelo ni kukungulula waze hanaatongola ku mbango jeswe jiwana, chize ku songo lia hashi ndo ku songo lia lilu.
28 “Lilongesenu ha chishima chino cha mukuyu: Muze mitango yawo yakwovula ni kusokoloka mafwo, nwakunyingika ngwenu, kuma lwiza hapwa hakamwihi.
29 Chizechene nawa, muze munumona yuma yino muyilingiwa, nyingikenu ngwenu, iye* hakamwihi ali, kwe ku yikolo.
30 Ngunanulweze pundu ngwami, chisemuko chino kuchichi kahwa ndo muze yuma yino yeswe muyikalingiwa.
31 Lilu ni hashi muyipalika, alioze maliji jami kechi kapalika nilimwe tangwa.
32 “Hakutwala ku tangwa lize ni ola yize, niumwe kanyingikine, chipwe angelo a mwilu chipwe mwe Mwana, shina Tata wika.
33 Kanyamenu, lawolenu, mumu kunwanyingikine shimbu lize hanatese.
34 Chino chinalifu ni umwe lunga, ha kuya mu wenyi yahichika zuwo lienyi mu chiyulo cha tuvumbi twenyi, mutu ni mutu yamwaha mulimo wenyi. Mba yatoweza mukwa-kufunga pito hanga anunge ni kulawola.
35 Kashika, nungenu ni kulawola, mumu kunwanyingikine tangwa lize mwenya-zuwo mahiluka, nyi ha chingoloshi, nyi ha muchima ufuku, nyi ha mandemba* nyi ha chichamene,
36 hanga muze meza susumuku kanda anuwana mu tulo.
37 Kashika chize ngunambe kuli yenu, ngunachambe kuli eswe ngwami: Nungenu ni kulawola.”
Footnotes
^ Hanji “nukasakalala.”
^ Hanji “ndo ha mashimbu jetu.”
^ Tala Apendice A5.
^ Hanji “Mwana-mutu.”
^ Chize Alisonekene, “muze ndemba akusanyika.”
